Բաժին : Աշխարհ/Տարածաշրջան
ԱՄՆ-ում կորոնավիրուսի ախտորոշման թեստավորումը խնդիր չի լինելու. Դոնալդ Թրամփ
ԱՄՆ նախագահ Դոնալդ Թրամփը ճեպազրույցի ժամանակ հայտարարել է, որ կորոնավիրուսի դեմ պայքարի իրենց որոշումը օգնել է նվազեցնել մահերի թիվը:
«Արմենպրես»-ի հաղորդմամբ, այս մասին տեղեկացնում է «Ամերիկայի ձայն»-ի ռուսական ծառայությունը:
«Մենք կորցրել ենք շատ մարկանց, բայց եթե նայում ենք նախնական կանխատեսումներին՝ 2.2 միլիոն, ապա մենք այսօր ամենայն հավանականությամբ կմոտենանք 60-70 հազարին, որը, իրոք, շատ է: Մեկ մարդու մահն իսկ արդեն շատ է: Ես կարծում եմ, որ մենք շատ ճիշտ որոշումներ ենք կայացրել: Կարևոր որոշում էր սահմանները փակելը կամ Չինաստանից մարդկանց մուտքն արգելելը՝ բացառությամբ ԱՄՆ քաղաքացիների, որոնք պետք է վերադառնային»,-ասել է Թրամփը:
Անդրադառնալով այն մեղադրանքներին, թե բավարար աշխատանք չի կատարվել թեստավորման շրջանակն ընդլայնելու համար՝ նախագահ Թրամփը նշել է, որ այդ ուղղութամբ աշխատանքները շարունակվում են:
«Մենք շարունակում ենք շատ արագ ընդլայնել մեր հնարավորությունները և վստահ ենք, որ ունենք բավարար քանակությամբ թեստ, որպեսզի սկսենք բացել տնտեսությունը: Մենք ցանկանում ենք բացել մեր երկիրը և թեստավորումը խնդիր չի լինելու»,-ասել է նախագահը:
Ներկայում ԱՄՆ-ում անցկացվել է կորոնավիրուսի ախտորոշման շուրջ 5.4 մլն թեստավորում:
