Թուրքիան Ադրբեջանին է փոխանցել HvBS օդային գործողությունների կառավարման համակարգի մի մասը
Թուրքիան Ադրբեջանին է փոխանցել HAVELSAN ընկերության մշակած HvBS օդային գործողությունների կառավարման համակարգի կարևոր բաղադրիչներից մի քանիսը։ Համակարգն արդեն ներառվել է Ադրբեջանի ռազմաօդային ուժերի հրամանատարության տեխնիկական համալիրում, հայտնում է Anadolu գործակալությունը։
HvBS համակարգը մշակվել է Թուրքիայի ռազմաօդային ուժերի կարիքների համար և նախատեսված է օդային գործողությունների հիմնական գործընթացների թվային կառավարման՝ պլանավորումից և նախապատրաստումից մինչև առաջադրանքների իրականացում, իրավիճակի վերահսկում և արդյունքների վերլուծություն։
Համակարգի փոխանցումից հետո Ադրբեջանի օպերատիվ կենտրոնների աշխատակիցները կկարողանան իրական ժամանակում ստանալ և մշակել օդային իրավիճակի տվյալները, աշխատել միասնական օպերատիվ պատկերով և ավելի արագ որոշումներ ընդունել գործողությունների ընթացքում։
HAVELSAN-ում նշել են, որ մատակարարումը Թուրքիայի և Ադրբեջանի միջև պաշտպանական արդյունաբերության ոլորտում համագործակցության զարգացման հերթական քայլն է։
Աղբյուր՝ 24News.am
