Եվրոպական ֆոնդային ինդեքսներն աճով են փակվել՝ բացառությամբ իսպանական IBEX 35-ի

Կենտրոնական բանկ10:27 | հոկտեմբերի 30, 2026Եվրոպական ֆոնդային ինդեքսներն աճով են փակվել՝ բացառությամբ իսպանական IBEX 35-ի
լսել հոդվածըԿիսվել նախընտրելի դարձնել

<!—>

]—>

Արևմտյան Եվրոպայի երկրների բաժնետոմսերի շուկաները հինգշաբթի հիմնականում աճել են․ ներդրողները գնահատել են Եվրոպական կենտրոնական բանկի հոկտեմբերյան նիստի արդյունքներն ու ընկերությունների բազմաթիվ ֆինանսական հաշվետվությունները։

Եվրոպական խոշորագույն ընկերությունների Stoxx Europe 600 համախմբված ինդեքսն աճել է 0,77%-ով՝ հասնելով 649,11 կետի։

Բրիտանական FTSE 100 ցուցիչն ավելացել է 0,3%-ով, գերմանական DAX-ը՝ 1,3%-ով, ֆրանսիական CAC 40-ը՝ 1,1%-ով, իտալական FTSE MIB-ը՝ 0,4%-ով։ Մինչդեռ իսպանական IBEX 35-ը նվազել է 0,1%-ով։

ԵԿԲ-ն, ինչպես և սպասվում էր, անփոփոխ է թողել բոլոր երեք հիմնական տոկոսադրույքները։ Այսպես, ավանդների տոկոսադրույքը պահպանվել է տարեկան 2,5%, հիմնական վերաֆինանսավորման գործառնությունների (main refinancing operations, MRO) տոկոսադրույքը՝ 2,65%, իսկ սահմանային վարկավորման տոկոսադրույքը՝ 2,9% մակարդակում։

Տոկոսադրույքներն անփոփոխ թողնելու որոշումը կարգավորող մարմնի կառավարիչների խորհուրդն ընդունել է միաձայն, ընդ որում՝ նիստի ընթացքում քննարկվել է փոխառությունների արժեքի բարձրացման հարցը, մամուլի ասուլիսում ասել է ԵԿԲ նախագահ Քրիստին Լագարդը։ Քննարկումից հետո ԵԿԲ ղեկավարությունը եկել է ընդհանուր համաձայնության, որ կարգավորող մարմինն այժմ բարենպաստ դիրքում է՝ նոր տվյալների սպասելու համար, նախքան դրամավարկային քաղաքականության ուղղության մեջ փոփոխություններ կատարելը։

Տարեսկզբից ԵԿԲ-ն երկու անգամ բարձրացրել է տոկոսադրույքները՝ ընդհանուր առմամբ 50 բազիսային կետով։ Վերլուծաբաններն ու շուկայի մասնակիցները հիմնականում ակնկալում են տոկոսադրույքների բարձրացում 25 բազիսային կետով այս տարվա վերջին նիստում, որը տեղի կունենա դեկտեմբերի 16-17-ին։

Մինչդեռ եվրոգոտու գործարարների և սպառողների վստահության համախմբված ինդեքսը հոկտեմբերին նվազել է մինչև 96,9 կետ՝ սեպտեմբերի վերանայված 97,5 կետից, ասվում է Եվրոպական հանձնաժողովի հաշվետվության մեջ։ Trading Economics-ի տվյալներով՝ վերլուծաբանները միջինում ակնկալում էին ինդեքսի նվազում մինչև 97,5 կետ՝ սեպտեմբերի համար սկզբնապես հայտարարված 97,9 կետից։

Stoxx 600-ի բաղադրիչների թվում հինգշաբթի աճի առաջատարը նավթարդյունաբերությանը ծառայություններ մատուցող նորվեգական Kongsberg Gruppen ASA-ն էր (+13%), իսկ անկման առաջատարը՝ առանց դեղատոմսի վաճառվող դեղեր և անձնական հիգիենայի ապրանքներ արտադրող բրիտանական Haleon-ը (-15%)։

Renault-ի կապիտալիզացիան եռամսյակային հաշվետվության հրապարակումից հետո աճել է 6,9%-ով։ Ֆրանսիական ավտոմոբիլային կոնցեռնի հասույթը տարեկան համեմատությամբ աճել է 1,5%-ով՝ գերազանցելով շուկայի սպասումները։

Գերմանական adidas-ի շուկայական արժեքն աճել է 5,8%-ով այն բանից հետո, երբ սպորտային ապրանքներ արտադրողը հաստատել է հուլիս-սեպտեմբերին ռեկորդային հասույթի ստացումը և բարելավել այդ ցուցանիշի տարեկան կանխատեսումը։

Airbus-ի բաժնետոմսերի գնանշումներն աճել են 2,3%-ով։ Եվրոպական օդատիեզերական կորպորացիայի զուտ շահույթը երրորդ եռամսյակում աճել է 20%-ով՝ չնայած հասույթի նվազմանը։ Ընկերությունը նաև հաստատել է 2026 թվականի կանխատեսումը։

Բրիտանա-նիդերլանդական Shell-ի բաժնետոմսերը թանկացել են 2,1%-ով, ֆրանսիական TotalEnergies-ինը՝ 1,2%-ով։ Նավթագազային երկու ընկերություններն էլ անցած եռամսյակում ավելի քան կրկնապատկել են զուտ շահույթը, իսկ նրանց շահույթի ճշգրտված ցուցանիշները գերազանցել են փորձագետների գնահատականները։

Volkswagen-ի բաժնետոմսերը թանկացել են 1,7%-ով՝ չնայած այն հանգամանքին, որ ավտոարտադրողի գործառնական վնասը հուլիս-սեպտեմբերին ավելացել է 4,5 անգամ, իսկ հասույթը չի արդարացրել սպասումները։

Բրիտանական WPP-ի շուկայական արժեքն աճել է 5,4%-ով։ Գովազդային կոնցեռնը հայտնել է, որ հուլիս-սեպտեմբերին հասույթի անկումը դանդաղել է մինչև 2,1%՝ նախորդ եռամսյակի 2,8%-ի համեմատ, ինչպես նաև հաստատել է տարեկան կանխատեսումը։

STMicroelectronics-ի բաժնետոմսերի գնանշումներն աճել են 1,9%-ով։ Եվրոպայում կիսահաղորդչային բաղադրիչների խոշորագույն նախագծող և արտադրող ընկերության զուտ շահույթը ֆինանսական տարվա երրորդ եռամսյակում աճել է 22,8%-ով, հասույթը՝ 17,9%-ով։ Ընդ որում՝ շահույթը չի արդարացրել շուկայի սպասումները, իսկ հասույթը գերազանցել է դրանք։

Ֆրանսիական Societe Generale բանկի կապիտալիզացիան աճել է 0,7%-ով՝ շնորհիվ եռամսյակային զուտ շահույթի մեկ քառորդով աճի՝ մինչև 1,89 մլրդ եվրո։

Lloyds-ի բաժնետոմսերի արժեքը նվազել է 5%-ով՝ չնայած բրիտանական բանկի երրորդ եռամսյակի դրական արդյունքներին։ Lloyds-ի շահույթը մինչև հարկումը նախորդ տարվա 1 մլրդ ֆունտ ստեռլինգից աճել է մինչև 2,3 մլրդ ֆունտ ստեռլինգ (3,1 մլրդ դոլար), ինչը համապատասխանել է վերլուծաբանների գնահատականներին։

Նիդերլանդական ING Groep-ի բաժնետոմսերն էժանացել են 2%-ով։ Բանկի զուտ շահույթն անցած եռամսյակում աճել է 3,5%-ով, սակայն զիջել է փորձագետների կանխատեսումներին։

Carlsberg-ի բաժնետոմսերի գնանշումները նվազել են 3%-ով։ Դանիական գարեջրագործական կոնցեռնի հասույթը երրորդ եռամսյակում տարեկան կտրվածքով աճել է 4,9%-ով՝ ավելի քիչ, քան կանխատեսում էին վերլուծաբանները։

<!—>

Հասանելի է

[—>русский

Կազմակերպություն

Կենտրոնական բանկ

Թեմա

ՏնտեսությունԵվրոպական բաժնետոմսեր

Տեղադրություն

Եվրոպա

Աղբյուրը՝ NEWS.am