Էրդողանը Անթալիայի գագաթնաժողովում Իսրայելին մեղադրել է «ցեղասպանության» և «էկոցիդի» մեջ․ Թել Ավիվն արձագանքել է

Կլիմայի փոփոխություն00:41 | նոյեմբերի 12, 2026Էրդողանը Անթալիայի գագաթնաժողովում Իսրայելին մեղադրել է «ցեղասպանության» և «էկոցիդի» մեջ․ Թել Ավիվն արձագանքել է
լսել հոդվածըԿիսվել նախընտրելի դարձնել

<!—>

]—>

Թուրքիայի նախագահ Ռեջեփ Թայիփ Էրդողանը Գազայի հատվածում պատերազմն անվանել է «էկոցիդ» և հայտարարել, որ միջազգային հանրությունը պետք է ճանաչի շրջակա միջավայրի համար դրա կործանարար հետևանքները։ Դրա մասին նա ասել է նոյեմբերի 11-ին Անթալիայում անցկացվող ՄԱԿ-ի կլիմայական COP31 գագաթնաժողովում, հաղորդում է Associated Press-ը։

«Այն, ինչ տեղի է ունեցել Գազայում, ոչ միայն ցեղասպանություն է, այլև էկոցիդ»,- հայտարարել է Էրդողանը՝ դիմելով համաշխարհային առաջնորդներին և կլիմայական կազմակերպությունների ներկայացուցիչներին։

Ըստ նրա՝ Գազայում հատվել են դարավոր ձիթենիներ, աղտոտվել են հողն ու ջուրը, իսկ քաղաքները վերածվել են «փլատակների հսկայական կույտերի»։ Էրդողանը նշել է նաև, որ ենթակառուցվածքների ավերումը՝ տեղատարափ անձրևների և ջրհեղեղների հետ մեկտեղ, հանգեցրել է տասնյակ հազարավոր վրանների և ժամանակավոր ապաստարանների ջրածածկմանը։

Իսրայելը, որը COP31-ին մասնակցելու հրավեր չէր ստացել, կտրուկ արձագանքել է Թուրքիայի նախագահի հայտարարություններին։

«Բռնապետ Էրդողանը հերթական անգամ օգտագործում է միջազգային հարթակը՝ ստի վրա հիմնված իր հակաիսրայելական արշավն առաջ մղելու համար»,- հայտարարել է Իսրայելի արտաքին գործերի նախարարությունը X սոցիալական ցանցում հրապարակման մեջ։

Գերատեսչությունը Գազայի հատվածում ավերածությունների պատասխանատվությունը դրել է պաղեստինյան ՀԱՄԱՍ խմբավորման վրա՝ հայտարարելով, որ շարժումը պատերազմը սկսել է հոկտեմբերի 7-ի հարձակմամբ և իր ռազմական ենթակառուցվածքները տեղակայել քաղաքացիական թաղամասերում։

Իսրայելի ԱԳՆ-ում ընդգծել են նաև, որ նրանք, ովքեր իսկապես մտահոգված են Գազայի ապագայով, պետք է ՀԱՄԱՍ-ից պահանջեն զինաթափվել, որպեսզի հնարավոր դառնա տարածքի վերականգնումը։

Իսրայելը կտրականապես մերժում է ցեղասպանության մեղադրանքները։

Հասանելի է

русский

Թեմա

Կլիմայի փոփոխությունՔաղաքականությունՊատերազմ

Անձ

Էրդողան

Տեղադրություն

Գազայի հատված

Աղբյուրը՝ NEWS.am