Բաժին : Կրթական
Սերիալներ նայելուն վերջ ենք տալիս. Կրթության նախարարի ուղերձը դպրոցականներին
Սերիալները նայելուն վերջ ենք տալիս, «odnoklassnik»-ներին վերջ ենք տալիս: Քիչ ժամանակ տրամադրեք սոցիալական ցանցերին: Ինքնակրթվե՛ք: Աշակերտներին նման կոչով ֆեյսբուքյան ուղիղ եթերում դիմել է կրթության և գիտության նախարար Արայիկ Հարությունյանը:
«Այսօր մի հարց տվեցին, թե ինչ պետք է անեք հնդկական սերիալների, աշակերտների համար անիմաստ հաղորդումների դեմն առնելու համար, ինչո՞վ ենք դա փոխարինելու: Շատ լավ հարց է: Այս ընթացքում անընդհատ բողոքել են սերիալներից: Ես դեմ եմ սերիալների արգելմանը, փակելուն, ես կարծում եմ, որ զուգահեռ դրանց պետք է ստեղծվեն սերիալներին փոխարինող հետաքրքիր հաղորդումներ, այլ բովանդակություն, որ աշակերտներին հետաքրքիր լինի: Նոր բովանդակության ստեղծման պարագայում վստահաբար սերիալները ռեյտինգ չեն ունենա, դրանք նայող չի լինի, հեռուստաալիքները չեն գնի դրանք, չեն ցուցադրի, կլինեն կրթական ծրագրեր»,- ասել է Արայիկ Հարությունյանը:
Նա նշել է, որ աշակերտների համար սովորելը հետաքրքիր պետք է լինի: «Գաղափար կա, որ ցերեկային ժամերին ցուցադրվեն հետաքրքիր դասախոսություններ, բացատրություններ տրվեն տվյալ դասի հետ կապված, որպեսզի դպրոցական նյութը մարսելը հեշտ լինի: ԿԳՆ-ում աշխատող նոր թիմի համար կարևոր է, որ կրթությունը հետաքրքիր լինի, դպրոցը հետաքրքիր լինի: Կարճ ժամանակում մենք չենք կարող ստեղծել այդ բովանդակությունը, աշխատանք պետք է տարվի»,- նշել է Հարությունյանը:
