Հյուսիսային Կորեայի առաջնորդ Կիմ Չեն Ընն ԱՄՆ պետքարտուղար Մայք Պոմպեոյի հետ հանդիպման փոխարեն կարտոֆիլի ֆերմա է այցելել։ Այդ մասին հայտնում է Sky News-ը՝ Կորեայի կենտրոնական հեռագրային գործակալությանը հղումով։
Հիշեցնենք, որ հուլիսի 6-7-ին Պոմպեոն այցելել է Հյուսիսային Կորեա։ Նա մտադիր էր հանդիպել երկրի առաջնորդ Կիմ Չեն Ընի հետ, սակայն, ինչպես հայտնի է դարձել ավելի ուշ, հանդիպումը չի կայացել։
Հեռուստաալիքը հայտնում է, որ Կորեայի կենտրոնական հեռագրային գործակալությունը 7 օր ոչինչ չի հրապարակել հյուսիսկորեացի առաջնորդի գործունեության մաաին, սակայն վերջերս 4 նյութ է հրապարակվել Կիմ Չեն Ընի՝ Սամջիոնի շրջան այցի մասին։
Հաղորդագրություններից մեկում ասվում է, որ Հս. Կորեայի առաջնորդը եղել է կարտոֆիլի ֆերմայում։ Թեև չի նշվում, թե կոնկրետ որ օրն է այցելել նա ֆերմա, Sky News-ը նշում է, որ նախորդ շաբաթ հյուսիսկորեացի չինովնիկը երկիր ժամանած հարավկորեացի գործընկերոջը հայտնել է ԿԺԴՀ առաջնորդի «շրջան» այցի մասին։
Հեռուստաալիքը կարծում է, որ ֆերմա այցը կարող էր տեղի ունենալ Պոմպեոյի այցի օրերին։
Ավելի վաղ հաղորդվել էր, որ Փհենյանը դժգոհ է մնացել ԱՄՆ պետքարտուղարի հետ բանակցություններից։