Բաժին : Իրադարձային
Ժամն է՝ ամբո՛ղջ Հայաստանը պետք է պաշտպանի մեր երկրի դարպասները պահած Կիրանցի, Բաղանիսի, Ոսկեպարի, մյուս սահմանապահ գյուղերի բնակիչների իրավունքներն ու կյանքը․ Բագրատ Սրբազան
Հայ Առաքելական Եկեղեցու Տավուշի թեմի առաջնորդ Բագրատ Սրբազանը Կիրանցում ոստիկանների հետ բախումից հետո իրավիճակը որոշակիորեն հանդարտվելուց հետո խոսքով դիմեց տավուշցիներին՝ մեր ժողովուրդը, ինչպես միշտ, հերոսաբար պատնեշ եղավ իր տանը․
«Սա ստի և ճշմարտության պայքար է, և ճշմարտությունը պետք է հաղթի։ Այսօր դուք այստեղ հաղթանակի հիմքերն եք դրել։ Ոչ ոք ո՛չ այդ պատիվը, ո՛չ այդ հաղթանակը ձեզնից ու մեզնից չի կարող խլել։ Դուք՝ ընդամենը մի բուռ ժողովուրդ, խառնել եք իրար հաշիվները։
Տեսնում եք՝ զոռով, բռնությամբ, ինչպես ասես՝ փորձում են իրենցն առաջ տանել, բայց այս գործընթացը պետք է կասեցվի։ Պիտի այս շունչը տարածվի ամեն քաղաք, ամեն գյուղ, ամեն դպրոց ու հաամալսարան, ամեն ավտոբուս ու միկրոավտոբուս։ Պիտի՛ տարածվի։
Կիրանցը, Բաղանիսը, մեր գյուղերը 30 տարի շարունակ պահել են ամբողջ Հայաստանի Հանրապետությունը, որպես սահմանապահ ժողովուրդ՝ Հայաստանի դարպասները պահած ժողովուրդ։ Հիմա ամբո՛ղջ Հայաստանը պետք է պաշտպանի Կիրանցի, Բաղանիսի, Ոսկեպարի, մեր մյուս սահմանապահ բնակիչների իրավունքներն ու կյանքը։ Ամբո՛ղջ Հայաստանը։ Դրա ժամն է»։
