Զուսպ շքեղություն և սպորտային բնավորություն. ինչով զարմացրեց էլեկտրական Range Rover Sport-ը
Auto08:04 | հոկտեմբերի 29, 2026Զուսպ շքեղություն և սպորտային բնավորություն. ինչով զարմացրեց էլեկտրական Range Rover Sport-ը
լսել հոդվածըԿիսվել
նախընտրելի դարձնել
<!—>]—>
Էլեկտրական Range Rover Sport-ը շքեղության, հարմարավետության և սպորտային կառավարելիության համադրության շնորհիվ իր դասի ամենահաջողված էլեկտրամոբիլներից մեկն է դարձել։
Autocar ավտոմոբիլային պարբերականի գնահատմամբ՝ էլեկտրաքարշի անցումն ամենագնացն է՛լ ավելի լավն է դարձրել՝ պահպանելով դրա գլխավոր առավելությունները։
Նոր տարբերակը կառուցված է MLA հարթակի վրա, որն օգտագործվում է նաև Range Rover ընտանիքի մյուս մոդելներում։ Երկու էլեկտրաշարժիչները՝ յուրաքանչյուր առանցքի վրա մեկական, միասին ապահովում են 542 ձիաուժ հզորություն և 849 Ն·մ պտտապահ։ Մարտկոցի օգտագործելի տարողությունը 118,5 կՎտ·ժ է։ Այս բնութագրերը համընկնում են էլեկտրական Range Rover-ի ցուցանիշների հետ։
Մարտկոցը տեղադրված է հատակի մեջ, ինչի շնորհիվ ծանրության կենտրոնն ավելի ցածր է դարձել, իսկ թափքի կոշտությունը հասել է այս հարթակի համար ռեկորդային մակարդակի։ Ընդ որում՝ սրահի դասավորությունն ու ուղևորների համար նախատեսված տարածքը չեն փոխվել։ Չնայած լիաքարշ համակարգին՝ ավտոմեքենան ընթացքի բնույթով շարունակում է հետևաքարշի զգացողություն հաղորդել։
Լրագրողները նշում են, որ էլեկտրական ուժային համակարգն ուշադրությունն իր վրա չի սևեռում, այլ ընդգծում է շասսիի առավելությունները։ Ավտոմեքենան վստահ է անցնում շրջադարձերը, ճշգրիտ արձագանքում է ղեկին և միաժամանակ հարմարավետության բարձր մակարդակ ապահովում։ Այն կարող է լինել թե՛ հանգիստ ընթացքով շքեղ ճամփորդական ավտոմեքենա, թե՛ դինամիկ ամենագնաց՝ առանց այս հատկանիշների միջև ընտրություն կատարելու անհրաժեշտության։
Մշակողները զուգահեռաբար ստեղծել են էլեկտրական Range Rover-ն ու Range Rover Sport-ը՝ ձգտելով պահպանել յուրաքանչյուր մոդելի անհատական բնավորությունը։ Autocar-ի գնահատմամբ՝ նրանց հաջողվել է մեքենաների միջև նկատելի տարբերություն ապահովել. Sport-ը պահպանել է նախորդ սերնդի վարելու ոգևորությունն ու դինամիկան։
Սակայն թերություններ ևս կան։ Լրագրողները քննադատել են սենսորային էկրանը՝ պատկերի միջակ որակի և օգտագործման անհարմարության համար։ Դրա միջոցով է հարկավոր կառավարել նույնիսկ Terrain Response համակարգը, որը պատասխանատու է տարբեր տեսակի ճանապարհածածկերի համար ավտոմեքենայի կարգավորումների ընտրության համար։ Dynamic ռեժիմը ևս լավագույն ընտրությունը չէ սովորական ճանապարհների համար. կախոցը չափազանց կոշտ է դառնում, իսկ էլեկտրաշարժիչի արհեստական ձայնն ընկալվում է որպես կասկածելի էֆեկտ։
Եվս մեկ թերություն է գինը։ Էլեկտրական տարբերակը համադրելի մեղմ հիբրիդից մոտ 20 հազար ֆունտ ստեռլինգով թանկ է, իսկ լիցքավորվող հիբրիդից՝ 15 հազար ֆունտ ստեռլինգով։ Միաժամանակ այն մոտ 10 հազար ֆունտ ստեռլինգով էժան է V8 շարժիչով բենզինային տարբերակից և, պարբերականի գնահատմամբ, դինամիկ հատկանիշներով գերազանցում է դրան։
Autocar-ը Range Rover Sport-ի անցումն էլեկտրաքարշի բացառիկ հաջողված է համարել։ Լրագրողների կարծիքով՝ վարորդը հիմնականում այն ժամանակ կհիշի, որ էլեկտրամոբիլ է վարում, երբ գա էներգիայի պաշարը համալրելու պահը։
Հասանելի է
Թեմա
Աղբյուրը՝ NEWS.am
