Հավատում եմ, որ հայկական ակումբն առաջին անգամ կխաղա ՉԼ հիմնական փուլում. Բերեզովսկի

Հայաստանի ազգային հավաքականի նախկին դարպասապահ Ռոման Բերեզովսկին մեկնաբանել է Չեմպիոնների լիգայի որակավորման երրորդ փուլում սլովենական «Ցելյեի» նկատմամբ «Արարատ-Արմենիայի» տարած տնային հաղթանակը։

Հիշեցնենք, որ օգոստոսի 4-ին Երևանի Վազգեն Սարգսյանի անվան «Հանրապետական» մարզադաշտում կայացած հանդիպումն ավարտվել էր հայկական թիմի հաղթանակով՝ 2:1։

«Իմ կարծիքով՝ առաջին խաղում հաղթելով «Ցելյեին», «Արարատ-Արմենիան» փոքր, բայց շատ կարևոր քայլ արեց։ Կասկած չունեմ, որ սլովենացիների հետ պատասխան խաղում շատ բարդ է լինելու։ Բայց, ըստ իս, երևանյան թիմն ի զորու է դուրս գալ որակավորման փլեյ-օֆֆ փուլ և հաղթել թե՛ «Մյելբյուին», և թե՛ «Սլովանին»։

Այնպես որ, ես հավատում եմ, որ շուտով հայկական ակումբը պատմության մեջ առաջին անգամ կհայտնվի Չեմպիոնների լիգայի հիմնական փուլում»,- Բերեզովսկու խոսքերն է մեջբերում «РБ Спорт»-ը։

Աղբյուր՝ 24News.am