Գերմանիայում արգելվել է թուրքական «Գորշ գայլերի» հետ կապերի մեջ կասկածվող Hells Angels-ի տեղի խմբավորման գործունեությունը

Հանցագործություն21:37 | նոյեմբերի 17, 2026Գերմանիայում արգելվել է թուրքական «Գորշ գայլերի» հետ կապերի մեջ կասկածվող Hells Angels-ի տեղի խմբավորման գործունեությունը
լսել հոդվածըԿիսվել նախընտրելի դարձնել
<!—>]—>
Գերմանիայի արևմուտքում գտնվող Հյուսիսային Հռենոս-Վեստֆալիա երկրամասի իշխանություններն արգելել են Hells Angels մոտոակումբի տեղական մասնաճյուղի գործունեությունը և լուծարել այն։ Մասնաճյուղի անդամները կասկածվում են ծանր հանցագործություններ կատարելու մեջ, հաղորդում է dpa-ն։
Երկուշաբթի երեկոյան ոստիկանությունը խուզարկություններ է անցկացրել Մյոնխենգլադբախ քաղաքում գտնվող West Central մասնաճյուղի տարածքներում և ձերբակալել ակումբի բարձրաստիճան անդամներից մեկին, հայտնել են երկրամասի ներքին գործերի նախարարությունից։
Քննության տվյալներով՝ խմբավորման անդամները, ամենայն հավանականությամբ, հանցավոր միավորում են ստեղծել և առնչություն ունեն ծանր մարմնական վնասվածքներ պատճառելու, թմրանյութերի առևտրի, փողերի լվացման, շորթման, սպառնալիքների, կողոպուտների և սպանության փորձերի հետ։
Ինչպես հաղորդում է dpa-ն՝ վկայակոչելով իր ստացած տեղեկությունները, քննիչները նաև ստուգում են մասնաճյուղի հնարավոր կապերը թուրքական ծայրահեղ աջ «Գորշ գայլեր» շարժման, քրեական կլանների ներկայացուցիչների և ալբանախոս կազմակերպված հանցավոր խմբերի հետ։
West Central մասնաճյուղը 2019 թվականին ստեղծել են Hells Angels-ի մեկ այլ տեղական խմբից դուրս եկած անդամները։ 2021 թվականին դրա գործունեությունը փաստացի դադարել է երկու ղեկավարների ձերբակալությունից և դատապարտումից հետո։ Սակայն 2025 թվականի ապրիլին անդամները վերսկսել են կանոնավոր հանդիպումներն ակումբի տարածքում, որը նույնպես խուզարկվել է երկուշաբթի։
Հյուսիսային Հռենոս-Վեստֆալիայի ներքին գործերի նախարար Հերբերտ Ռոյլը հայտարարել է, որ արգելքը ոստիկանության տևական հետաքննության արդյունք է։ Միաժամանակ, ըստ նրա, հավաքված ապացույցները դեռ պետք է ուսումնասիրվեն։
Որոշմամբ արգելվում է նաև օգտագործել մասնաճյուղի խորհրդանիշները և ստեղծել իրավահաջորդ կազմակերպություններ։
Ապրիլին Հյուսիսային Հռենոս-Վեստֆալիայի իշխանություններն արգելել էին Hells Angels-ի մեկ այլ մասնաճյուղի գործունեությունը Լևերկուզենում։ Սեպտեմբերին Դույսբուրգում ձերբակալվել էին ակումբի բարձրաստիճան անդամներ։
Հասանելի է
Թեմա
ՀանցագործությունԹմրամիջոցների ապօրինի շրջանառությունԿազմակերպված հանցավորություն
Տեղադրություն
Աղբյուրը՝ NEWS.am
