BMW-ն դիտարկում է V8 շարժիչով Alpina շքեղ կուպեի սերիական արտադրության հնարավորությունը
Auto08:03 | նոյեմբերի 11, 2026BMW-ն դիտարկում է V8 շարժիչով Alpina շքեղ կուպեի սերիական արտադրության հնարավորությունը
լսել հոդվածըԿիսվել
նախընտրելի դարձնել
<!—>]—>
Գերմանական BMW ավտոարտադրողը դիտարկում է մայիսին Villa d’Este էլեգանտության մրցույթում ներկայացված Vision BMW Alpina կոնցեպտուալ կուպեի սերիական արտադրության հնարավորությունը։ Եթե նախագիծը հավանության արժանանա, այն կարող է շրջադարձային իրադարձություն դառնալ վերածնվող Alpina ապրանքանիշի համար՝ յուրատեսակ «M1-ի պահ», ինչպես այն անվանում են ընկերության ներկայացուցիչները։ Սակայն վերջնական որոշում դեռ չի ընդունվել, հաղորդում է Autocar-ը։
Խոսքը 5,2 մետր երկարությամբ, V8 շարժիչով, չորս անձի համար նախատեսված երկդռնանի կուպեի մասին է։ Ավտոմեքենան առանձնանում է շքեղ հարդարմամբ և պետք է ընդգծի Alpina-ի ինքնուրույն բնույթը՝ ապրանքանիշը BMW-ի լիակատար վերահսկողության տակ անցնելուց հետո։
Նախկինում Alpina-ն մշակում էր BMW ավտոմեքենաների սպորտային տարբերակները՝ իրավական առումով մնալով անկախ արտադրող։ Ընկերությունը հասանելիություն ուներ BMW-ի վաղ նախատիպերին և ինժեներական տվյալներին, ինչի շնորհիվ կարողանում էր իր մոդելները ստեղծել գերմանական կոնցեռնի բազային ավտոմեքենաներին զուգահեռ։ Ընդ որում, Alpina-ի ավտոմեքենաները BMW M ստորաբաժանման մոդելներից ավանդաբար տարբերվում էին հարմարավետության ավելի բարձր մակարդակով։ BMW-ն մտադիր է պահպանել այս առանձնահատկությունը նաև ապրանքանիշի վերագործարկումից հետո։
Ընկերությունում մտավախություն ունեն, որ գնորդները վերածնված Alpina-ն կարող են ընկալել ընդամենը որպես համալրման հերթական մակարդակ։ Ուստի առանձին մոդելը կարող էր օգնել ընդգծել ապրանքանիշի ինքնատիպությունը։
Neue Klasse ստորաբաժանման ղեկավար Մայք Ռայխելտը, ելույթ ունենալով նոր BMW i3-ի շնորհանդեսին, կասկած է հայտնել, որ Vision Alpina կոնցեպտը ներկայիս տեսքով կմտնի արտադրության մեջ։ Միաժամանակ նա ընդունել է, որ դիզայներներն ինժեներներին բարդ դրության մեջ են դրել ավտոմեքենայի նկատմամբ մեծ պահանջարկի պատճառով, և նշել, որ Alpina-ն կցանկանար մոդելը թողարկել սահմանափակ քանակով։
Ակնկալվում է, որ վերածնված ապրանքանիշի առաջին ավտոմեքենան կլինի BMW 7 Series-ի հիման վրա ստեղծված շքեղ սեդանը։ Դրա չափսերն ու հարմարավետության վրա շեշտադրումը թույլ կտան այն տարբերել BMW M-ի մոդելներից, որոնք ներկայացված չեն այս սեգմենտում։ Հարցը, թե արդյոք BMW-ն միաժամանակ կառաջարկի նույն մոդելի M և Alpina տարբերակները, դեռ քննարկվում է։ Ըստ Autocar-ի՝ հենց երկու ուղղությունների միջև հստակ տարբերությունների պահպանումն է առանձին շքեղ ավտոմեքենայի թողարկումը դարձնում ամենատրամաբանական լուծումը։ Alpina B7-ի նախորդ սերունդը բարձր գնահատականի էր արժանանում ավտոարդյունաբերության մեջ և ուղենիշ էր ծառայում մրցակիցների համար։
Մինչ այդ Alpina-ն հիմնադրած Բովենզիպենների ընտանիքը պատրաստվում է սեփական ազգանունը կրող ավտոմոբիլային ապրանքանիշ ստեղծել։ Alpina-ի վաճառքից հետո ընտանիքը կորցրել է նախկին արտադրական առավելությունները. նախկինում ավտոմեքենաները հավաքվում էին BMW-ի գործարաններում, ապա կատարելագործվում գերմանական Բուխլոե քաղաքում։ Բովենզիպենների նոր ավտոմեքենաները կարտադրվեն փոքր խմբաքանակներով՝ տասնյակ կամ հարյուրավոր օրինակներով։ Սպասվող նորույթների թվում է Spider ռոդսթերը, որը կթողարկվի ընդամենը 99 օրինակով։
<!—>
Հասանելի է
[—>русский
Թեմա
Կազմակերպություն
Աղբյուրը՝ NEWS.am
