Բաժին : Քաղաքականություն
Գործող ընտրակարգը հանգեցրեց տարածքներում միլիարդատերերի և քաղաքական գործիչների միջև մրցակցությանը. Է. Մարուքյան
ԱԺ «Ելք» խմբակցության պատգամավոր, «Լուսավոր Հայաստան» կուսակցության նախագահ Էդմոն Մարուքյանը ՀՀ ընտրական օրենսդրության բարեփոխումների նպատակով ստեղծված խորհրդարանական աշխատանքային խմբի քննարկմանը ժամանակագրորեն հետ գնաց ու ՀՀ-ում գործող համամասնական ընտրական կարգի պատմությանը հիշեց: Նա նշեց, որ ինչ հիշում է, ընդդիմությունը միշտ կողմ է եղել համամասնական ընտրակարգին, իսկ արդեն 2015 -2016 թթ., երբ փոփոխեցին Սահմանադրությունը, իշխանությունը հայտարարեց, թե բավարարել է ընդդիմության ցանկությունը:
«Սակայն հետո ԸՕ-ով ամրագրվեց համամասնականի մի տարատեսակ, որի մասին առաջիններից եմ ասել, որ սա մեզ վատ տեղ է տանում: Այն ժամանակն էլ մանրամասն ներկայացրել էի, թե ինչ է լինելու և այդպես էլ եղավ: Այսինքն՝ գործող ընտրակարգը, որը նախատեսում է տարածքային ցուցակներով ընտրություն, հանգեցրեց նրան, որ տարածքներում մրցակցություն էր ընթանում միլիարդատերերի և քաղաքական գործիչների միջև, դրա արդյունքում քաղաքական գործիչները հայտնվել էին ծանր իրավիճակում»,- ասաց նա:
Մարուքյանը շեշտեց, որ շատ դժվար էր նախկին պայմաններում քաղաքական խոսք տեղ հասցնել, քանի որ գաղափարների պայքար տեղի չէր ունենում: Ըստ նրա՝ այսօրվա կառավարությունն առաջարկում է անցնել այն 100 տոկոսանոց համամասնական ընտրակարգին, որի մասին ընդդիմությունը միշտ խոսել է:
«Երբ ասվում է փակ ցուցակ, դա, բնականաբար փակ չէ: Դա ցուցակ է, որը կազմում է քաղաքական ուժը, որը ներքին քննարկումների ժամանակ պետք է այնպես անի, որ մարզային ներկայացվածություն ունենա: Եթե մարզերից մարդիկ չի ներգրավում, այդ մարզերից ձայներ չի ստանա: Այսինքն՝ վտանգը, որ կունենանք երևանցիների խորհրդարան, այդ վտանգը կա նաև կուսակցության ներսում»,- շարունակեց Էդմոն Մարուքյանը:
Պատգամավորը, խոսելով ՀՅԴ առաջարկի մասին, այսինքն՝ ընտրությունների գնալ բաց ցուցակներով, ասաց, որ լավ տարբերակ է, քանի որ խոսքը թեկնածուների ռեյտինգավորման մասին է հանրապետության տարածքով մեկ:
«Մենք կարող ենք բոլոր տարբերակները քննարկել, բայց այսօրվա գործող ընտրակարգը վատն է»,- եզրափակեց Էդմոն Մարուքյանը:
