Արցախն Ադրբեջանի մաս չէ, այն օկուպացված է Ադրբեջանի կողմից․ Շարմազանով

ՀՀԿ խոսնակ Էդուարդ Շարմազանովը գրում է․ «Արցախն Ադրբեջանի մաս չէ, այն օկուպացված է Ադրբեջանի կողմից։

Գործող ռեժիմի ներկայացուցիչներն Արցախի հանձնումը մարսեցին, հիմա էլ ԱԺ-ում հարցեր են հնչեցնում՝ Արցախն Ադրբեջանի մաս է, թե՞՝ ոչ։ Հարցն էլ տալիս են մի մարդու, ով ստիպված է եղել լքել Արցախն ադրբեջանցիների հանցավոր գործողության արդյունքում։

Ես Արցախում չեմ ծնվել, ապրել եմ բացառապես ՀՀ -ում, բայց համոզված եմ, որ ցանկացած պետական ու ազգային շահ գիտակցող ՀՀ քաղաքացու համար Արցախը չի կարող լինել Ադրբեջանի մաս։

Զուտ այն պատճառով, որ Փաշինյանը 2022-ի հոկտեմբերի 6-ին Արցախը ճանաչել է Ադրբեջանի մաս, մենք չենք կարող ու չպետք է նույն բանն անենք։

Արցախն այսօր օկուպացված է Ադրբեջանի կողմից։ Ես դրա մասին ասել եմ ոչ միայն ՀՀ-ում, այլ նաեւ Մոսկվայում՝ ադրբեջանցիների աչքերին նայելով։

Եվ մեր խնդիրը պետք է լինի դրա մասին բարձրաձայնել ամենուր, որպեսզի որեւէ քպ-ականի մտքով չանցնի նման հարց տալու։

Արցախն օկուպացված է Ադրբեջանի կողմից, ինչպես օկուպացված է Կիպրոսի հյուսիսային մասը Թուրքիայի կողմից»։

Աղբյուր՝ 24News.am