Ֆրանսիան անօդաչու համակարգերով համալրված, ցածր նկատելիությամբ էսկադրային ականակրի նախագիծ է ներկայացրել
Պաշտպանություն07:01 | նոյեմբերի 7, 2026Ֆրանսիան անօդաչու համակարգերով համալրված, ցածր նկատելիությամբ էսկադրային ականակրի նախագիծ է ներկայացրել
լսել հոդվածըԿիսվել
նախընտրելի դարձնել
<!—>]—>
Ֆրանսիական Naval Group ընկերությունը ներկայացրել է հեռանկարային SCX26 նավի հայեցակարգը, որը ցույց է տալիս խոշոր վերջրյա մարտական նավերի զարգացման հնարավոր ուղղությունները՝ հաշվի առնելով առաջիկա տասնամյակներում ծովային պատերազմի պահանջները։
Հայեցակարգը մշակելիս հաշվի են առնվել վերջին զինված հակամարտությունների դասերն ու նոր տեխնոլոգիաների ի հայտ գալը։ Naval Group-ում ընդգծել են, որ SCX26-ը ծովային մարտի ոլորտում հեռանկարային լուծումների ուսումնասիրման հարթակ է, այլ ոչ թե անմիջապես կառուցման համար նախատեսված նավի նախագիծ։ Այդուհանդերձ, այս մշակումը հնարավորություն է տալիս գնահատել, թե ինչպիսին կարող են լինել հաջորդ սերնդի էսկադրային ականակիրները։
Առանձնապես ուշագրավ է էսկադրային ականակիրը տարբեր տեսակի անօդաչու սարքերի համար որպես լողացող բազա օգտագործելու գաղափարը։ Նույնիսկ համեմատաբար փոքր և էժան անօդաչու սարքերը կարող են զգալիորեն մեծացնել ժամանակակից նավի մարտական ճկունությունն ու ընդհանուր հնարավորությունները։ Հատկապես զգալի արդյունք կարող է տալ դրանց կիրառումը խմբերով և շարաններով։
SCX26-ի հիմնական առանձնահատկություններն են ռադիոլոկացիոն ցածր նկատելիությամբ նավակմախքը, բաշխված սենսորային համակարգերը, հրթիռային մեծ զինանոցը և անօդաչու սարքերի տեղակայման համար նախատեսված տարողունակ ներքին հատվածը, գրում է Naked Science-ը։ Կառուցվածքի ամենաանսովոր տարրերն են միմյանցից հեռու տեղադրված երկու վերնաշենքերը, որոնք միաժամանակ ծառայում են որպես սենսորների տեղադրման կայմեր, ինչպես նաև անօդաչու սարքերի շահագործման, տեխնիկական սպասարկման և, հնարավոր է, նույնիսկ արտադրության համար նախատեսված զարգացած ենթակառուցվածքը։
SCX26-ի երկարությունը մոտ 170 մետր է, լայնությունը՝ 24 մետր, իսկ լրիվ ջրատարողությունը գնահատվում է մոտ 8000 տոննա։ Այսպիսով, նավն իր չափերով զգալիորեն գերազանցում է նույն Naval Group-ի մշակած FDI նախագծի ֆրեգատներին։ Այս ժամանակակից նավերի ջրատարողությունը մոտ 4460 տոննա է, երկարությունը՝ 122 մետր, լայնությունը՝ 18 մետր։
Նոր նախագիծը ներկայացվել է Euronaval 2026 ցուցահանդեսում։ Ըստ հայտարարված բնութագրերի՝ SCX26-ի առավելագույն արագությունը պետք է հասնի ժամում 55 կիլոմետրի, իսկ նավարկության հեռահարությունը՝ 14 հազար 800 կիլոմետրի։ Առաջարկվող ուժային կայանքը դիզելով աշխատող էլեկտրական կայանքի և գազային տուրբինների համատեղ աշխատանք է նախատեսում։
Naval Group-ում նաև նշել են, որ նախագծման ընթացքում հաշվի է առնվել վերևից, ներառյալ՝ ռադիոլոկացիոն արբանյակների միջոցով նավի հայտնաբերման հնարավորությունը։ Հատուկ ուշադրություն է դարձվել վերնաշենքերի վերին մակերեսներին, որոնք նույնպես պետք է նպաստեն նկատելիության նվազեցմանը։
Առայժմ հայտնի չէ՝ առաջարկվող լուծումները կկիրառվե՞ն արդյոք ֆրանսիական հեռանկարային նավերի կամ Naval Group-ի արտահանման նախագծերի ստեղծման ժամանակ։ Սակայն SCX26 հայեցակարգը հստակ ցույց է տալիս, թե որքան արագ է փոխվում ռազմածովային ուժերի դիմագիծը։ Ապագայի էսկադրային ականակիրներից ակնկալվում է ոչ միայն հզոր հրթիռային սպառազինություն, այլև տարբեր տեսակի բազմաթիվ անօդաչու համակարգեր տեղակայելու, սպասարկելու և կիրառելու կարողություն։
<!—>
Հասանելի է
[—>русский
Թեմա
Օբյեկտ
Տեղադրություն
Աղբյուրը՝ NEWS.am
