Մեծ Բրիտանիայի մսարդյունաբերությունը սառնարանների վրա կիբերհարձակումների պատճառով հայտնվել է արտադրանքի կորստի վտանգի առջև

Կիբեռանվտանգություն22:36 | նոյեմբերի 3, 2026Մեծ Բրիտանիայի մսարդյունաբերությունը սառնարանների վրա կիբերհարձակումների պատճառով հայտնվել է արտադրանքի կորստի վտանգի առջև
լսել հոդվածըԿիսվել նախընտրելի դարձնել

<!—>

]—>

Եվրոպական սուպերմարկետների սառնարանների և սառցարանների կառավարման համակարգերի վրա կիբերհարձակումներն անդրադարձել են նաև բրիտանական սննդարդյունաբերության ձեռնարկությունների վրա։ Մեծ Բրիտանիայի Կիբերանվտանգության ազգային կենտրոնը (NCSC) հայտնել է երկրի տարածքում տեխնոլոգիական խոցելիությունների շահագործման մի քանի դեպքի մասին, հաղորդում է BBC News-ը։

NCSC-ի ղեկավար Ռիչարդ Հորնը BBC-ին հայտնել է, որ կենտրոնի մասնագետներն աշխատել են ամբողջ գիշեր՝ նախազգուշացնելով այն կազմակերպություններին, որոնք կարող էին տուժել հարձակումներից։

Մեծ Բրիտանիայի մսի անկախ մատակարարների ասոցիացիայի (AIMS) տվյալներով՝ միջադեպերի հետևանքներն անդրադարձել են իր ավելի քան 300 անդամներից մի քանիսի վրա։ Երկու ընկերությունում սառնարաններն անսպասելիորեն սկսել են հալեցվել, իսկ ևս մեկում սառնարանային կայանքների ջերմաստիճանը հասել է 100 աստիճանի ըստ Ցելսիուսի։ Ըստ ասոցիացիայի ներկայացուցիչ Թոնի Գուջերի՝ այդ պահին սարքավորումները դատարկ են եղել, ուստի մթերքը չի վնասվել։ Նա սննդարդյունաբերության ձեռնարկություններին կոչ է արել ավելի ուշադիր լինել կիբերանվտանգության հարցերում։

Երկուշաբթի նմանատիպ միջադեպերի մասին հայտնել են Իռլանդիայի, Շվեդիայի, Էստոնիայի, Բելգիայի, Նիդեռլանդների և Ֆինլանդիայի սուպերմարկետները։ Բելգիայում և Լյուքսեմբուրգում տուժել է Delhaize ցանցի շուրջ 40 խանութ։ Որոշ առևտրային կետեր ստիպված են եղել դեն նետել փչացած մթերքը, իսկ առանձին մանրածախ վաճառողների վնասները հասել են հարյուր հազարավոր եվրոյի։

Սառնարանային սարքավորումներ արտադրող բելգիական Sabcobel ընկերությունը հայտնել է, որ տուժած սարքերում գոլորշիացուցիչները փոխադրվել են հալեցման ռեժիմի, ինչի պատճառով սառնարանների ներսում ջերմաստիճանը բարձրացել է։ Ենթադրվում է, որ նմանատիպ եղանակ է կիրառվել հոկտեմբերի սկզբին ֆրանսիական հարյուրավոր սուպերմարկետների վրա կիբերհարձակումների ժամանակ։ Այն ժամանակ միլիոնավոր եվրո արժողությամբ թարմ և սառեցված մթերք էր փչացել։

Ըստ Հորնի՝ դեռ վաղ է ասել՝ ով է կանգնած հարձակումների հետևում։ Միաժամանակ նա ընդգծել է, որ շատ ընկերություններ օգտագործում են հնացած համակարգեր, որոնք չեն թարմացվում և շարունակում են միացված մնալ համացանցին, ինչն այդ համակարգերը խոցելի է դարձնում կոտրելու փորձերի նկատմամբ։ Նրա գնահատմամբ՝ լրացուցիչ սպառնալիք է այն, որ չարագործներն նման խոցելիությունները հայտնաբերելու և շահագործելու համար արհեստական բանականություն են օգտագործում։

<!—>

Հասանելի է

[—>русский

Թեմա

ԿիբեռանվտանգությունՍննդի անվտանգություն

Տեղադրություն

Միացյալ Թագավորություն

Աղբյուրը՝ NEWS.am