Բաժին : Իրադարձային
Արիությանը վախկոտություն մի խառնեք․ մեր պատգամն ենք բերում իշխանություններին․ Գարեգին Բ
Առկա անվտանգային սպառնալիքների հանդիման լինենք համերաշխ, լինենք միասնական և միաբան, որ կարողանանք անկորուստ պահպանել հայրենի մեր երկիրը։
Այս մասին Ծիծեռնակաբերդի հուշահամալիրում լրագրողների հետ զրույցում ասաց Ամենայն Հայոց Կաթողիկոս Գարեգին Բ-ն։
«Անխռով ազգային մեր կյանքը, մեր պատգամն ենք բերում իշխանություններին, ինչպես սուրբ Վարդան Մամիկոնյան քաջ զորավարը պետք է ասեր՝ արիությանը վախկոտություն մի խառնեք։
Վախկոտությունը կորստաբեր է, մահ է սփռում, արիությունը ոգու զորություն է, արդարությունն ու ճշմարտությունը պաշտպանելու համար։ Սիրելի՛ ժողովուրդ, ապրենք աստվածաբանությամբ, հավատքով ու հույսով հզոր, աննկուն, չտկարանանք դժվարությունների առջև։
Մեր սուրբ նահատակների բարեխոսությամբ, Աստված երկնային բարձրունքներից հեղելու է մեր կյանքին խաղաղության ապահովության ու անվտանգության իր օրհնությունները։ Մշտահունչ պահենք մեր հոգիներում և մեր սրտերում աղոթքն առ Աստված, Աստված միշտ օգնական է լինելու և պահապան է լինելու մեր ժողովրդին այսօր և հավիտյան»,- եզրափակեց նա։
