Բաժին : Պատահարներ
1 զոհ, 1 վիրավոր. Արարատի մարզում 15-ամյա վարորդը «BMW»-ով բախվել է «ԶԻԼ»-ին
Երեկ՝ ապրիլի 21-ին, խոշոր ու ողբերգական ավտովթար է տեղի ունեցել Արարատի մարզում:
Ժամը 22:00-ի սահմաններում Արարատի մարզի բնակիչ 15-ամյա Գագիկ Վ-ն իր վարած «BMW» մակնիշի ավտոմեքենայով Ազատավան գյուղի Արտաշատյան խճուղու վրա գտնվող կամրջի հատվածում բախվել է ճամփեզրին կայանված Արարատի մարզի բնակիչ 61-ամյա Սուրիկ Թովմասյանին պատկանող «ԶԻԼ» մակնիշի բեռնատարին:
Ինչպես հայտնում է Shamshyan․com-ը, բախման հետևանքով 2 ավտոմեքենան հայտնվել են Ազատ գետի մեջ: «BMW»-ն կողաշրջվել է:
«BMW»-ի վարորդ Գագիկ Վ.-ն և ուղևոր՝ Արարատի մարզի բնակիչ 15-ամյա Հայկ Հ.-ն մարմնական վնասվածքներով տեղափոխվել են «Արտաշատ» բժշկական կենտրոն:
Մինչ դեպքի վայրում աշխատում էր քննչական խումբը, հիվանդանոցից ահազանգ է ստացվում ոստիկանության Արտաշատի բաժին, որ վիրավորներից Հայկ Հ.-ն գիտակցության չգալով մահացել է:
Հիվանդանոց տեղափոխվածները սովորում են Արտաշատի 1-ին դպրոցի 9-րդ դասարանում և նշել են «BMW»-ի վարորդի ծննդյան օրը, իսկ հիվանդանոցում Արտաշատի ոստիկաններն ու պարեկները, ըստ դեպքի վայրում հավաքվածների, կանխել են հաշվեհարդարը, քանի որ մահացած երեխայի բարեկամները փորձել են հաշվեհարդար տեսնել «BMW»-ի վարորդի հարազատների հետ:
