Նուռը նվազեցնում է քաղցկեղի որոշ տեսակների առաջացման վտանգը․ մանրամասներ
Սվաբիի համալսարանի (Պակիստան) գիտնականները՝ որպես միջազգային հետազոտական թիմի մաս, պարզել են, որ նռան պտուղները, կեղևը, յուղը, էքստրակտը և հյութը կարող են նվազեցնել շագանակագեղձի, միզապարկի, կրծքագեղձի, մաշկի, թոքերի և հաստ աղիքի քաղցկեղի առաջացման վտանգը։ Հետազոտության արդյունքները հրապարակվել են Food Science & Nutrition (FSN) ամսագրում։
Գիտնականների կարծիքով՝ հակաօքսիդանտները հատուկ դեր են խաղում նռան հակաբազմացնող, հակաուռուցքային և հակաբորբոքային հատկություններով ապահովելու գործում։ Դրանք ներառում են այնպիսի օգտակար նյութեր, ինչպիսիք են պոլիֆենոլները, ֆլավոնոիդները և տանինները: Դրանք նվազեցնում են բորբոքումը, կանխում ուռուցքի առաջացումը և դանդաղեցնում քաղցկեղի բջիջների աճը:
Բացի այդ, գիտնականներն ընդգծել են, որ նռան կանոնավոր օգտագործումը կարող է կանխել քաղցկեղի մետաստազները, դրանց տարածումը մարմնի այլ մասեր։ Նուռը նաև հարուստ է բջջանյութով, հանքանյութերով և վիտամիններով, պարունակում է քիչ ճարպեր և կալորիաներ: Այն ուտելն օգնում է պայքարել ավելորդ քաշի դեմ, որը քաղցկեղի զարգացման ռիսկի գործոններից է։
Որոշ ուսումնասիրություններ նաև ցույց են տվել, որ նռան մեջ հայտնաբերված էլագիտանինները կարող են պաշտպանել Ալցհեյմերի և Պարկինսոնի հիվանդությունից: Այնուամենայնիվ, նուռը կարող է ազդել դեղամիջոցների, այդ թվում՝ հիպերտոնիայի դեմ դեղամիջոցների արդյունավետության վրա, ուստի այս ապրանքը պետք է զգուշությամբ օգտագործվի՝ որպես տարբեր հիվանդությունների օժանդակ թերապիայի մաս:
