Թրամփը զայրացել է Reuters-ի լրագրողի վրա՝ ինքնազգացողության մասին հարցերի պատճառով

Դոնալդ Թրամփ15:14 | հոկտեմբերի 30, 2026Թրամփը զայրացել է Reuters-ի լրագրողի վրա՝ ինքնազգացողության մասին հարցերի պատճառով
լսել հոդվածըԿիսվել նախընտրելի դարձնել

<!—>

]—>

ԱՄՆ նախագահ Դոնալդ Թրամփը Reuters գործակալության լրագրողին անվանել է հիվանդ և զզվելի այն բանից հետո, երբ վերջինս հետաքրքրվել է նրա ինքնազգացողությամբ և Քանզասի նահանգ այցը չեղարկելու պատճառներով։

Միջադեպը տեղի է ունեցել նախագահի՝ Հարավային Կարոլինայից վերադառնալուց հետո։ Լրագրողը հետաքրքրվել է Թրամփի առողջական վիճակով՝ ուշադրություն հրավիրելով ԱՄՆ Կոնգրեսի միջանկյալ ընտրություններին ընդառաջ նրա ուղևորությունների հագեցած ժամանակացույցի վրա։ Նախագահը պատասխանել է, որ իրեն լավ է զգում, սակայն թղթակիցը շարունակել է հարցեր տալ շաբաթ օրը նախատեսված՝ Քանզաս այցը չեղարկելու պատճառների մասին։

«Դուք հիվանդ մարդ եք։ Ի դեպ, Reuters-ը սարսափելի գործակալություն է», — հարցերին ի պատասխան հայտարարել է Թրամփը, որի խոսքերը մեջբերել է The New York Post (NYP) թերթը։

ԱՄՆ առաջնորդը նաև քննադատել է լրագրողի ֆիզիկական վիճակը՝ հայտարարելով, որ հենց նա է վատ վիճակում։ Թրամփը բացատրել է, որ հրաժարվել է ուղևորությունից, քանի որ հանրապետական սենատոր Ռոջեր Մարշալը հաջողությամբ է վարում նախընտրական քարոզարշավը և իր անձնական աջակցության կարիքը չունի։

«Դուք արդեն երկու շաբաթ է՝ հետևում եք ինձ։ Ես ինձ հիանալի եմ զգում։ Դուք զզվելի եք։ Ձեզ կարգի բերեք։ Դուք սարսափելի տեսք ունեք», — դիմել է Թրամփը թղթակցին։

Նախագահը հավելել է, որ Քանզաս մեկնելու փոխարեն նախընտրական միջոցառմանը կմասնակցի հեռախոսով, իսկ հաջորդ օրը մտադիր է այցելել Ֆլորիդա։

Ինչպես նշել է NYP-ն, լեզվակռիվը տեղի է ունեցել լրագրող Ջեյքոբ Բոգեջի հետ։ Միջադեպից հետո Սպիտակ տան թիմը X սոցիալական ցանցում (նախկինում՝ Twitter) հաղորդագրություն է հրապարակել՝ աջակցություն հայտնելով նախագահի արձագանքին։

ԱՄՆ վարչակազմի ներկայացուցիչը նաև NYP-ին հայտնել է, որ մինչև միջանկյալ ընտրությունների օրը Թրամփը նախատեսում է հեռավար ձևաչափով անցկացնել ավելի քան 20 նախընտրական միջոցառում՝ ընտրողների հետ շփումը շարունակելու համար։

Հասանելի է

русский

Անձ

Դոնալդ Թրամփ

Թեմա

ԸնտրություններՔաղաքականություն

Աղբյուրը՝ NEWS.am