Կարևոր է, որ կիբեռհիգիենայի կանոններն ապահովվեն. կրթության դերակատարումը համար մեկն է. ԲՏԱ նախարար
Մենք նաև ակնկալում ենք, որ սրան զուգահեռ թիրախավորելու ենք հանրության, հասարակության տարբեր շերտերի՝ դպրոցականներից մինչև ավագ սերունդ, մանկավարժներ, կրթողներ, ծնողներ, որոնք, ըստ էության, ամենօրյա ռիսկի տակ են: Այս մասին Կառավարության այսօրվ՝ օգոստոսի 14-ի նիստում ասել է Բարձր տեխնոլոգիական արդյունաբերության նախարար Մխիթար Հայրապետյանը՝ արձագանքելով ԿԳՄՍ նախարար Ժաննա Անդրեասյանին:
Հայրապետյանը ներկայացրել է «Կիբեռանվտանգության մասին», «Հանրային տեղեկությունների մասին», «Տեղեկատվական համակարգերի մասին» և հարակից օրենքների նախագծերի փաթեթը, շեշտել, որ պետական տարբեր կառույցներ անելիքներ ունեն այս խնդրի կարգավորման առումով: Նա ասել է, որ օրենսդրությունը հնարավորություն է տալիս կիբեռհանցագործությունների մասին իրազեկվածության ընդհանուր մակարդակը բարձրացնել հանրության շրջանում:
«Կարևոր է, որ կիբեռհիգիենայի կանոնները ապահովվեն, և այստեղ, իհարկե, կրթության դերակատարումը ունի համար մեկ առաջնահերթություն: Սա անգամ քննարկելու նյութ չէ», – եզրափակել է Հայրապետյանը:
