Մարտական անօդաչու՝ առանց օդանավակայանի. ԱՄՆ-ը փորձարկումների է պատրաստում եզակի X-BAT-ը

Ավիացիա04:36 | նոյեմբերի 5, 2026Մարտական անօդաչու՝ առանց օդանավակայանի. ԱՄՆ-ը փորձարկումների է պատրաստում եզակի X-BAT-ը
լսել հոդվածըԿիսվել նախընտրելի դարձնել

<!—>

]—>

Ամերիկյան Shield AI ընկերությունն ավարտել է ուղղահայաց թռիչք և վայրէջք կատարելու ունակ X-BAT անօդաչու մարտական ինքնաթիռի առաջին լիաչափ նախատիպի ստեղծումը, գրում է Interesting Engineering-ը։

Մշակողները սարքը պատրաստում են փորձարկումների, որոնց ընթացքում պետք է ստուգվեն ուժային կայանքի աշխատանքը և առանց սովորական թռիչքուղիների օգտագործման թռչելու հնարավորությունը։

X-BAT 001 անվանումով նախատիպը դուրս է բերվել Թեքսաս նահանգի Ֆրիսկո քաղաքում գտնվող ընկերության գործարանից։ Այժմ այն տեղափոխվում է Կանզասում գտնվող X-Forge 2 փորձադաշտ։

Ստուգումները կիրականացվեն փուլ առ փուլ։ Նախ ինժեներները շարժիչը կփորձարկեն հորիզոնական դիրքում, ապա կստուգեն դրա աշխատանքը ուղղահայաց թռիչքի ժամանակ։ Դրանից հետո կսկսվեն կռունկով ինքնաթիռը պահելու միջոցով փորձարկումները՝ հնարավոր տեխնիկական խափանումների դեպքում սարքի վնասվելու վտանգը նվազեցնելու համար։ Եթե այդ փորձարկումները հաջող անցնեն, մշակողները կանցնեն առանց ապահովող հենարանի թռիչքների։

X-BAT-ը համալրված է GE Aerospace-ի արտադրության F110-GE-129E տուրբոօդափոխիչային շարժիչով։ Պտտվող ծայրափողակը հնարավորություն է տալիս ուղղորդել արտանետվող գազերի հոսքը՝ ուղղահայաց զորաշարժերի ժամանակ ինքնաթիռի դիրքը կառավարելու համար։ Հուլիսին ընկերություններն ավարտել են շարժիչի գործարկման, ծայրափողակի շարժման և այդ համակարգերի ինտեգրման փորձարկումները։

Shield AI-ը նախատեսում է X-BAT-ն օգտագործել ցամաքային թիրախներին հարվածներ հասցնելու, օդային մարտի և ռադիոէլեկտրոնային պայքարի համար։ Ինքնաթիռը կկարողանա սպառազինություն կրել ներքին խցիկներում և արտաքին կախոցների վրա։ Մշակողի տվյալներով՝ ներքին խցիկները նախատեսված են մինչև 907 կգ զանգվածով զինամթերքի համար։

Թռիչքն ու առաջադրանքների կատարումը պետք է կառավարի Shield AI-ի մշակած Hivemind ինքնավար համակարգը։ Այն նախատեսված է աշխատելու այնպիսի պայմաններում, երբ GPS արբանյակային նավիգացիան կամ կապն անհուսալի են դառնում։

Ընկերությունը հայտարարում է, որ լիարժեք մարտական բեռնվածությամբ թռիչքի հեռահարությունը գերազանցում է 3,7 հազար կմ-ը, իսկ մարտական շառավիղը կազմում է մոտ 1,85 հազար կմ։ Այդ բնութագրերը դեռ պետք է հաստատվեն փորձարկումներով։

Մշակողների մտահղացմամբ՝ X-BAT-ի գլխավոր առավելությունը սովորական օդանավակայաններից անկախ գործելու հնարավորությունն է։ Դա հնարավորություն կտա սարքն օգտագործել նավերից, հեռավոր կղզիներից և սահմանափակ ենթակառուցվածք ունեցող այլ հարթակներից։ Սակայն առայժմ խոսքը նախատիպի մասին է. առաջին ինքնուրույն թռիչքի ժամկետներն ու ինքնաթիռի իրական մարտական հնարավորությունները դեռ պետք է պարզվեն։

Հասանելի է

русский

Թեմա

ԱվիացիաՌազմական

Օբյեկտ

ԱԹՍ-ներ

Աղբյուրը՝ NEWS.am