Ինչու ԱՄՆ-ն և Իսրայելը տասնամյակներ շարունակ չեն ընդունում Թել Ավիվի՝ միջուկային զենք ունենալու փաստը. CNN

Իրան11:48 | նոյեմբերի 7, 2026Ինչու ԱՄՆ-ն և Իսրայելը տասնամյակներ շարունակ չեն ընդունում Թել Ավիվի՝ միջուկային զենք ունենալու փաստը. CNN
լսել հոդվածըԿիսվել նախընտրելի դարձնել

<!—>

]—>

ԱՄՆ-ն և Իսրայելը տասնամյակներ շարունակ Իսրայելի ենթադրյալ միջուկային զինանոցի հարցում հետևում են ռազմավարական անորոշության քաղաքականությանը՝ խուսափելով պաշտոնապես հաստատել դրա գոյությունը։ Սակայն Իրանի հետ պատերազմը, Մերձավոր Արևելքում միջուկային ծրագրերի զարգացումը և ԱՄՆ Կոնգրեսում աճող քննադատությունը կարող են վտանգել այս պայմանավորվածությունը, հայտնում է CNN-ը։

Փորձագետների կարծիքով՝ Իսրայելն ունի Մերձավոր Արևելքի միակ միջուկային զինանոցը։ Nuclear Threat Initiative ոչ առևտրային կազմակերպության գնահատմամբ՝ այն ներառում է մոտ 90 միջուկային մարտագլխիկ։ Իսրայելը չի ստորագրել Միջուկային զենքի չտարածման մասին պայմանագիրը և պաշտոնապես չի հաստատում միջուկային զենք ունենալու փաստը։

Անորոշության քաղաքականությունը ձևավորվել է Սառը պատերազմի տարիներին։ Վաշինգտոնը և Թել Ավիվը մտավախություն ունեին, որ իսրայելական զինանոցի գոյության բացահայտ ճանաչումն արաբական երկրներին կմղի սեփական միջուկային զենք ստեղծելու կամ ԽՍՀՄ-ից ռազմական երաշխիքներ ստանալու ուղիներ փնտրելու։ Բացի այդ, հրապարակային հաստատումը կարող էր բարդացնել ԱՄՆ-ի հարաբերություններն այլ երկրների հետ և ուժեղացնել Իսրայելի դեմ պատժամիջոցներ սահմանելու պահանջով ճնշումները։

Հունիսին ԱՄՆ պետքարտուղար Մարկո Ռուբիոն Կոնգրեսում լսումների ժամանակ հայտարարել է, որ երկրների մեծ մասն Իսրայելին միջուկային տերություն է համարում, սակայն ո՛չ Վաշինգտոնը, ո՛չ Թել Ավիվը պաշտոնապես դա չեն ընդունում։ Դեմոկրատ կոնգրեսական Խոակին Կաստրոն այս քաղաքականությունն անվանել է հնացած և վտանգավոր։ Նրա կարծիքով՝ ԱՄՆ-ն պետք է հասկանա, թե ինչ հանգամանքներում Իսրայելը կարող է միջուկային զենք կիրառել, հատկապես Իրանի դեմ համատեղ ռազմական գործողությունների պայմաններում։

Լրացուցիչ մտահոգություններ է առաջացնում Սաուդյան Արաբիայի միջուկային ծրագիրը։ Թագաժառանգ արքայազն Մուհամմեդ բին Սալմանն ավելի վաղ նախազգուշացրել էր, որ թագավորությունը կարող է միջուկային զենք ստեղծել, եթե Իրանն այն ձեռք բերի։ ԱՄՆ-ի հետ քննարկվող համաձայնագիրը նախատեսում է Սաուդյան Արաբիայի տարածքում ուրանի հարստացման հնարավորություն՝ որոշակի պայմանների պահպանմամբ։

Փորձագետները տարակարծիք են այն հարցում, թե արդյոք Վաշինգտոնը և Թել Ավիվը պետք է հրաժարվեն անորոշության քաղաքականությունից։ Ջորջթաունի համալսարանի քաղաքագետ Մեթյու Քրոնիգը կարծում է, որ իսրայելական զինանոցի գոյության բացահայտ ճանաչումը կարող է արագացնել միջուկային սպառազինությունների մրցավազքը տարածաշրջանում։ Այլ մասնագետների կարծիքով՝ ներկայիս իրավիճակը միջուկային զսպման հարցերում ավելի մեծ հստակություն է պահանջում։

Քարնեգի հիմնադրամի փորձագետ Ջեյմս Էքթոնի գնահատմամբ՝ առաջիկա երեք տարում Իրանի կողմից միջուկային զենք ստեղծելու հավանականությունը մոտ 50% է։ Միևնույն ժամանակ, CNN-ի տվյալներով, Թեհրանի տրամադրության տակ շարունակում է մնալ բարձր հարստացված ուրանի զգալի պաշար՝ չնայած միջուկային օբյեկտներին հասցված հարվածներին։

ԱՄՆ Պետդեպարտամենտում հայտարարել են, որ գերատեսչությունը հրապարակայնորեն չի մեկնաբանում սպառազինությունների կոնկրետ տեսակների և ռազմական ռազմավարությունների վերաբերյալ հաղորդումները։ Սպիտակ տունը և Իսրայելի վարչապետի գրասենյակը չեն պատասխանել հեռուստաալիքի հարցումներին։

<!—>

Հասանելի է

[—>русский

Տեղադրություն

ԻրանԻսրայելԱՄՆ

Թեմա

Միջուկային զենքի չտարածման պայմանագիրՄիջուկային զենք

Աղբյուրը՝ NEWS.am