«Ժողովուրդ» օրաթերթը գրում է. ««Ժողովուրդ» օրաթերթի իշխանական աղբյուրները փոխանցում են, որ Անկախության 35-ամյակի առթիվ պետական պարգևների ու դիվանագիտական աստիճանների արժանացած պաշտոնյաների հետ կապված ԱԳՆ-ում հատկապես չորս ներկայացուցիչների հետ կապված լուրջ քննարկումներ են ընթանում։

Հիշեցնենք, որ նախագահ Վահագն Խաչատուրյանի սեպտեմբերի 16-ի հրամանագրով Նելլի Սարոյանին շնորհվել է արտակարգ և լիազոր դեսպանի, իսկ Հայկ Դարբինյանին, Անի Բադալյանին և Լենա Թերզիկյանին՝ արտակարգ դեսպանորդ և լիազոր նախարարի դիվանագիտական աստիճան։ Հրամանագրի համաձայն՝ աստիճանները շնորհվել են վարչապետի առաջարկությամբ։

«Ժողովուրդ» օրաթերթն արդեն անդրադարձել էր Անի Բադալյանի դեպքում առաջացած հարցերին՝ նշելով, որ ԱԳՆ-ում զարմանք է առաջացրել նախարարի մամուլի քարտուղարին նման բարձր դիվանագիտական աստիճանի շնորհումը։ Այս անգամ Բադալյանի պատմությանը մանրամասն չենք անդրադառնա՝ կենտրոնանալով մյուս երեք պարգևատրվածների անցած ճանապարհի վրա։

Առավել ուշագրավ է Լենա Թերզիկյանի դեպքը։

Այսօր նա ԱԳՆ Եվրոպական ինտեգրման վարչության պետն է։ Հենց այդ վարչությունն է, ըստ ԱԳՆ պաշտոնական նկարագրության, պատասխանատու ԵՄ ուղղությամբ կառավարության արտաքին քաղաքականության իրականացման, ԵՄ-ի հետ քաղաքական երկխոսության, ԵՄ կառույցների հետ համագործակցության համակարգման և Հայաստան-ԵՄ գործընկերության շրջանակներում աշխատանքների համար։ Վարչությունն ունի նաև ԵՄ-ի հետ քաղաքական գործընկերության և ոլորտային համագործակցության առանձին բաժիններ։

Այսինքն՝ Թերզիկյանի ղեկավարած կառույցի անունն ինքնին բավական խոսուն է՝ Եվրոպական ինտեգրում։

Սակայն այստեղ էլ հարց է առաջանում՝ այս վարչության աշխատանքի արդյունքները որքանո՞վ են տեսանելի հանրությանը։ Իշխանությունը վերջին տարիներին ակտիվորեն խոսում է Հայաստանի եվրոպական հեռանկարի, ԵՄ-ին անդամակցության օրակարգի և եվրոպական ինտեգրման մասին։ Բայց անդամակցության պաշտոնական դիմումը դեռ ներկայացված չէ։ Նիկոլ Փաշինյանը դեռ օգոստոսին հայտարարել էր, որ նախ պետք է պաշտոնական դիմում ներկայացվի ԵՄ-ին, և դրանից հետո միայն հնարավոր կլինի ունենալ գործընթացի վերաբերյալ ճանապարհային քարտեզ։

Էլ չասենք, որ եվրոպական վիզաների ազատականացման մասին ինչքան խոսվում է, այնքան բարդացնում են վիզա ստանալը՝ ՀՀ քաղաքացիներին ստիպելով անցնել նվաստացուցիչ ճանապարհով։

Ուստի Թերզիկյանի դեպքում հետաքրքիր հարցը ոչ թե այն է, թե «ԵՄ ինտեգրում կա՞, թե՞ չկա», այլ՝ ինչ արդյունք է արձանագրվել այդ գործընթացում և ինչ չափելի առաջընթաց է ապահովվել այն կառույցի կողմից, որը հենց դրա համար է ստեղծված։

Մյուս պարգևատրվածը՝ Նելլի Սարոյանը, ԱԳՆ միջազգային պայմանագրերի և իրավունքի վարչության ղեկավարն է։ Նա ստացել է այս քառյակից ամենաբարձր դիվանագիտական աստիճանը՝ արտակարգ և լիազոր դեսպանի աստիճան։ Նրա ղեկավարած վարչությունն իրականացնում է միջազգային պայմանագրերի կնքման, դրանց վավերացման, միջազգային իրավական հարցերի և նախարարության իրավական ապահովման հետ կապված աշխատանքները։

Այսինքն՝ Սարոյանի դեպքում խոսքը ոչ թե հանրային ու քաղաքական ամենօրյա տեսանելի աշխատանքի, այլ ԱԳՆ-ի բավական կարևոր, բայց առավելապես իրավական և պայմանագրային աշխատանքի համակարգման մասին է։

Հետաքրքիր անցած ճանապարհ ունի նաև Հայկ Դարբինյանը։

Նա այսօր ԱԳ նախարարի խորհրդականն է և ստացել է արտակարգ դեսպանորդի և լիազոր նախարարի աստիճան։ Սակայն Դարբինյանի անցած ճանապարհը դասական դիվանագիտական կարիերայի շրջանակում չէ։ Նա տարիներ շարունակ աշխատել է առողջապահական համակարգում, այդ թվում՝ ավելի քան 11 տարի զբաղեցրել է առողջապահության նախարարի առաջին տեղակալի պաշտոնը։ Պաշտոնական կենսագրական տվյալներում նրա աշխատանքային ճանապարհը հասնում է մինչև խորհրդային տարիներ, իսկ առողջապահության ոլորտում նրա գործունեությունը ներառել է նաև 1988-ի երկրաշարժից տուժածների և Արցախյան պատերազմի տարիներին վիրավորների բուժօգնության կազմակերպման աշխատանքները։

Այսպիսով, մեկ հրամանագրով դիվանագիտական բարձր աստիճաններ ստացած չորս անձանցից յուրաքանչյուրը ԱԳՆ համակարգում ունի իր ուղղությունը․ մեկը միջազգային իրավունքի պատասխանատուն է, մյուսը՝ նախարարի խորհրդական, երրորդը՝ մամուլի խոսնակ, իսկ չորրորդը՝ հենց եվրոպական ինտեգրման վարչության ղեկավարը։

Ի վերջո, դիվանագիտական աստիճանը միայն կոչում չէ։ Դրա հետևում պետք է լինի նաև աշխատանքի արդյունք, որը, հատկապես եվրոպական ինտեգրման դեպքում, հասարակությունը պետք է կարողանա տեսնել հայտարարություններից զատ կոնկրետ գործընթացների և արդյունքների տեսքով»։

Առավել մանրամասն թերթի այսօրվա համարում

The post «Ժողովուրդ». ԱԳՆ-ում միանշանակ չեն ընդունել մի շարք գործընկերների պարգևատրումները appeared first on Norlur.am.

«Փաստ» թերթը գրում է. «Դեղագործությունը սովորական բիզնես չէ. այստեղ շրջանառվում են հսկայական գումարներ, սակայն վաճառվող ապրանքն ուղղակիորեն կապված է մարդու առողջության և կյանքի հետ։ Դեղամիջոց գնելիս քաղաքացին վճարում է ոչ միայն իր դրամական միջոցները, այլև վստահում է, որ տուփի ներսում հենց այն պատրաստուկն է, ինչ նշված է պիտակին, այն համապատասխանում է սահմանված չափանիշներին, և վտանգ չի սպառնում իրեն։ Հետևաբար, դեղագործական շուկայի նկատմամբ պետական վերահսկողությունը լոկ տնտեսական կարգավորման հարց չէ, այլ հանրային անվտանգության և առողջապահական համակարգի առանցքային հենասյուներից է։

Հայաստանի դեղագործական շուկայի վերաբերյալ տվյալները, սակայն, լուրջ մտահոգությունների տեղիք են տալիս։

Մրցակցության պաշտպանության մարմնի ուսումնասիրությունները, պաշտոնական վիճակագրությունը և լրագրողական հետաքննական հրապարակումները վկայում են շուկայի բարձր կենտրոնացվածության, խոշոր ընկերությունների դեմ տարիներ շարունակ հարուցվող հակամենաշնորհային վարույթների, դեղբիզնեսի ու պետական ապարատի միջև առկա փոխկապակցվածությունների, չգրանցված դեղերի վաճառքի և դրանց որակի վերաբերյալ ահազանգերի մասին։ Այս ամենին զուգահեռ՝ պետական վերահսկողության համակարգը հաճախ խախտումն արձանագրում է միայն այն ժամանակ, երբ անորակ կամ ապօրինի ապրանքն արդեն հասել է սպառողին։

Տնտեսական մրցակցության պաշտպանության հանձնաժողովի տվյալներով՝ դեռևս 2019 թվականին Հայաստանում դեղերի ամբողջ ներմուծման 60,3 տոկոսը բաժին էր ընկնում ընդամենը երեք խոշոր ընկերությունների՝ «Վագա Ֆարմ», «Ալֆա Ֆարմ Իմպորտ» և «Նատալի Ֆարմ» օպերատորներին։

Առանձին ապրանքային խմբերում շուկայի կենտրոնացվածությունն ավելի բարձր է եղել։ Գերիշխող դիրքն ինքնին օրենքի խախտում չէ, սակայն երբ շուկայի ավելի քան 60 տոկոսը կենտրոնացած է երեք ընկերության ձեռքում, այդ հանգամանքն անհնար է անտեսել, հատկապես, երբ նույն շուկայում պարբերաբար արձանագրվում են հակամենաշնորհային օրենսդրության խախտման դեպքեր։

Ուշագրավ է «Նատալի Ֆարմ» ընկերության փորձառությունը։ 2009–2010 թվականներին հակամենաշնորհային մարմինն արձանագրել էր ընկերության կողմից «Սզնի» մրցակցի նկատմամբ գերիշխող դիրքի չարաշահում։ «Հետք»-ի հրապարակումների համաձայն՝ ընկերության գնային քաղաքականությունը նպատակ է ունեցել մրցակցին դուրս մղել շուկայից, ինչի համար «Նատալի Ֆարմ»-ը տուգանվել էր 20 մլն դրամով։ 2012 թվականին ընկերությունը դարձյալ հայտնվել էր հակամենաշնորհային մարմնի ուշադրության կենտրոնում և պետական գնումների ոլորտում իրականացված գործողությունների համար տուգանվել 50 մլն դրամով։ Մեկ այլ դրվագով՝ «Ցեֆտրիաքսոն» դեղամիջոցի պետական մրցույթում մրցակցի հաղթանակից հետո, «Նատալի Ֆարմ»-ը հիվանդանոցին առաջարկել էր նույն դեղամիջոցը տրամադրել անվճար։

Չնայած այս դեպքերը վերաբերում են տարբեր ժամանակահատվածների, դրանց համադրությունը ցույց է տալիս, որ դեղագործական շուկայում մրցակցային միջավայրի խնդիրները քրոնիկ բնույթ են կրում, իսկ ազատ մրցակցության սահմանափակման հետևանքով նվազում է նաև սպառողի ընտրության հնարավորությունը։

Խնդրի մյուս կողմը դեղագործական բիզնեսի և պետական առողջապահական համակարգի փոխհարաբերություններն են։ «Հետք»-ի հետաքննություններից մեկում անդրադարձ էր կատարվել «Արմֆարմացիա» ընկերությանը, որը նախկինում ղեկավարել էր առողջապահության նախկին փոխնախարար և նախարար Անահիտ Ավանեսյանը։ Ըստ հրապարակված տվյալների՝ ընկերությունում ղեկավար պաշտոններ էին զբաղեցրել նաև նրա ընտանիքի անդամները։ 2017– 2020 թվականների ընթացքում «Արմֆարմացիան» 44 պետական կառույցների հետ կնքել էր 240 պայմանագիր՝ ընդհանուր շուրջ 606,7 մլն դրամ ծավալով։ Այդ պայմանագրերի մի մասը կնքվել էր արդեն Ավանեսյանի՝ պետական պաշտոն ստանձնելուց հետո։ Անահիտ Ավանեսյանը հերքել էր իր կամ ամուսնու մասնաբաժնի առկայությունն ընկերությունում՝ նշելով, որ «Արմֆարմացիայում» իր նախկին աշխատանքը կապ չունի պետական համակարգում իր հետագա գործունեության հետ։ Հետևաբար, սա ինքնին իրավական խախտում չի արձանագրում, այնուամենայնիվ, նման փաստերը հանրային վերահսկողության կարիք ունեն։ Երբ մասնավոր դեղագործական ոլորտից եկած անձը ստանձնում է նույն շուկան կարգավորող պետական պաշտոն, իսկ պետությունը հանդիսանում է խոշոր պատվիրատու, շահերի բախման կանխարգելումն ու թափանցիկությունը դառնում են առաջնային պահանջ։

Առավել մտահոգիչ է այն փաստը, որ չգրանցված դեղամիջոցները հեշտությամբ հասնում են սովորական գնորդին։ Լրատվամիջոցի իրականացրած ստուգայցերի ընթացքում Հայաստանի դեղատներից ձեռք էին բերվել երկրում պաշտոնապես չգրանցված 13 անուն դեղամիջոց, այդ թվում՝ «Ozempic», «Tegretol», «Forxiga» և այլն։ Մի շարք դեպքերում փաթեթների վրա առկա են եղել ակցիզային դրոշմանիշներ, իսկ վաճառքի ժամանակ տրամադրվել են ՀԴՄ կտրոններ։ Սա վկայում է, որ խոսքը ոչ թե ստվերային կամ «սև» շուկայի, այլ սովորական մանրածախ առևտրի ցանցում չգրանցված դեղերի լայն շրջանառության մասին է։ Դեղի պետական գրանցումը ձևական ընթացակարգ չէ. այն վերահսկողության հիմնական մեխանիզմն է, որով գնահատվում են դեղամիջոցի որակը, ծագումը, անվտանգությունը և պահպանման պայմանները։ Երբ դեղը հայտնվում է այդ համակարգից դուրս, քաղաքացին զրկվում է պետական երաշխիքներից։

Հայաստանի վերահսկող մարմինները դեղերի շրջանառության ոլորտում պարբերաբար խախտումներ են արձանագրում։ 2023 թվականին տեսչական մարմինը հայտնել էր 463,29 մլն դրամի տուգանքների մասին, որոնց զգալի մասը վերաբերում էր չգրանցված կամ ապօրինի ներմուծված դեղերին։ «Ֆակտոր» լրատվականի տվյալներով՝ 2024 թվականին տուգանքների ընդհանուր գումարը հասել էր մոտ 3 մլրդ դրամի, որից շուրջ 2,9 մլրդ դրամը վերաբերում էր հենց չգրանցված կամ օրենսդրության խախտմամբ ներմուծված դեղամիջոցների վաճառքին։ Այս թվերը փաստում են հայտնաբերված խախտումների ահռելի ծավալները, սակայն տուգանքն ինքնին չի լուծում խնդիրը։ Եթե նույնաբնույթ խախտումները շարունակվում են, նշանակում է՝ պատժամիջոցները չեն վերացնում դրանց առաջացման պատճառները։

Լրատվամիջոցները պարբերաբար ահազանգում են նաև համացանցում չգրանցված դեղերի ապօրինի վաճառքի և պետական մարմինների լիազորությունների սահմանափակ լինելու մասին։ Պետությունը հայտնաբերում է խախտումը, տուգանում, սակայն ապօրինի շրջանառության ալիքը չի դադարում։ Առանձնակի զգայուն խնդիր է դեղերի որակը, որտեղ անհամապատասխանությունն անմիջականորեն սպառնում է մարդու առողջությանը։ Միջազգային հետազոտությունների շրջանակում Հայաստանում ստուգված 189 դեղերի նմուշների 20 տոկոսը չէր համապատասխանել որակի պահանջներին. օրինակ՝ 2023 թվականին Հայաստան էին ներմուծվել «Doxobyra» և «CTX-GLS» դեղամիջոցներ (յուրաքանչյուրից 400 միավոր)։ Առողջապահության նախարարությունը պարզաբանել էր, որ միջազգային կազմակերպություններից կամ օտարերկրյա կարգավորող մարմիններից այդ դեղերի վերաբերյալ բացասական տվյալներ չստանալու պատճառով համապատասխան քայլեր չի ձեռնարկել, թեև լրագրողները պնդում էին, որ ուսումնասիրության արդյունքները նախապես փոխանցել էին նախարարությանը։ Խնդիրը, սակայն, չի սահմանափակվում դեղատնային ցանցով. լրագրողական հետաքննություններն ահազանգել էին նաև հայկական էսթետիկ կլինիկաներում բոտուլինային տոքսին պարունակող չգրանցված դեղամիջոցների օգտագործման մասին, որտեղ պաշտոնապես գրանցված է ընդամենը երեք դեղամիջոց, մինչդեռ բժշկական պրակտիկայում լայնորեն կիրառվում են անհայտ ծագման այլ միջոցներ։

Փաստերի համադրումը ուրվագծում է հստակ պատկեր. շուկայի մեծ մասը կենտրոնացած է սահմանափակ թվով ներմուծողների ձեռքում, տարիներ շարունակ արձանագրվում են հակամենաշնորհային խախտումներ, դեղբիզնեսի և պետական ապարատի միջև առկա են շահերի բախման ռիսկեր, իսկ չգրանցված դեղերն ազատ վաճառվում են դեղատներում ու կլինիկաներում։ Այս շղթայի ամենաթույլ օղակը կանխարգելիչ վերահսկողության անարդյունավետությունն է։ Պետական համակարգը գործում է արդեն կատարված փաստից հետո, իսկ երբ վերահսկողությունը չի կարողանում փակել ապօրինի շրջանառության ճանապարհը, հետևանքները կրում է պացիենտը. խախտողը կարող է տուգանվել, պետական մարմինը՝ վիճակագրություն ապահովել, սակայն վնասված առողջությունը վերականգնելն այլևս անհնար է դառնում, եզրափակում է հետաքննող լրագրողների «Aniarm.info» հարթակի վերլուծաբանը։

Առավել մանրամասն թերթի այսօրվա համարում

The post «Փաստ». Հայաստանի դեղագործական շուկան. մեծ փողեր, նեղ շրջան և պետական վերահսկողության ձախողումները appeared first on Norlur.am.

«Ժողովուրդ» օրաթերթը գրում է. «ՀՀ վարչապետ Նիկոլ Փաշինյանի՝ դատական համակարգի վերաբերյալ վերջին հայտարարություններից հետո դատավորների շրջանում լարվածություն է նկատվում։

«Ժողովուրդ» օրաթերթի տեղեկություններով՝ դատավորները ներքին զրույցներում մտահոգություն են հայտնել, որ իրենց աշխատասենյակներում կարող է ներքին ու արտաքին դիտարկում իրականացվել, իսկ դատարանների շենքերի հարակից տարածքները՝ տեսանկարահանվել։

«Ժողովուրդ»-ի աղբյուրների փոխանցմամբ՝ իրավիճակն այն աստիճանի է հասել, որ որոշ դատավորներ միմյանց հետ զգայուն հարցեր քննարկելիս անձնական հեռախոսները թողնում են աշխատասենյակում, հեռանում դատարանի տարածքից և միայն դրանից հետո զրուցում։

The post «Ժողովուրդ». Փաշինյանի հայտարարությունից հետո դատական համակարգում լարվածություն է appeared first on Norlur.am.

Տիգրանաշենի հարցը կարող է խնդիր դառնալ Վայոց ձորի և Սյունիքի, իսկ հետո նաև Հայաստանի ամբողջ պետականության համար։ Այդ մասին սեպտեմբերի 17-ին լրագրողների հետ զրույցում հայտարարել է Հայաստանի նախկին արտգործնախարար, «Ժառանգություն» կուսակցության ղեկավար Րաֆֆի Հովհաննիսյանը։

Նա նախազգուշացրել է երկրի համար սպառնացող վտանգների մասին, եթե հասարակությունը չփոխվի և չկանգնեցնի այդ գործընթացը։ Նա ընդգծել է, որ Հայաստանի իշխանություններն ամեն օր հիշեցնում են, որ հետևողական կլինեն իրենց ստի մեջ՝ առաջ մղելով այսպես կոչված խաղաղության օրակարգը, որը հանգում է միակողմանի զիջումների։

Հովհաննիսյանն ավելացրել է, որ «հարևան երկրի բռնապետի հանցակիցը Հայաստանում ընդառաջում է նրան»։

«Սա կհանգեցնի Հայաստանի պետականության կործանմանը։ Նա չի բացառել, որ նման քաղաքականությունը կարող է հանգեցնել նրան, որ թուրքական և ադրբեջանական զորքերը մտնեն Երևան։ Մենք չենք կարող դա թույլ տալ։ Կամ մեկ տարվա ընթացքում պետք է փոխենք իրավիճակը, կամ հաշտվենք աներևակայելի իրականության հետ»,- նշել է նախկին նախարարը։

The post Հայաստանի նախկին արտգործնախարարը նախազգուշացրել է պետականությանը սպառնացող վտանգների մասին appeared first on Norlur.am.

«Սևան» քրեակատարողական հիմնարկի պահպանության ապահովման բաժնի ծառայողը սեպտեմբերի 15-ին՝ ժամը 21։50-ի սահմաններում, դիտաշտարակում հերթապահություն իրականացնելիս, ահազանգել է այն մասին, որ հիմնարկի քողարկող պատից դուրս նկատել է մարդկային շարժ։ Ահազանգից անմիջապես հետո «Սևան» քրեակատարողական հիմնարկի ծառայողներն իրականացրել են նշված հատվածի տեղազննություն, որի արդյունքում հայտնաբերել են ներնետված 2 պոլիէթիլենային շիշ՝ կպչուն ժապավենով փաթեթավորված։ Զննությամբ փաթեթներում հայտնաբերվել են բջջային հեռախոս, USB լար, բջջային հեռախոսի լիցքավորիչ և պատյան»,- նշված է հաղորդագրության մեջ։

The post «Սևան» քրեակատարողական հիմնարկի ծառայողները բացահայտել են ներնետման դեպք appeared first on Norlur.am.

2027 թվականի հունվարի 1-ից Հայաստանի իշխանության տարբեր ճյուղերի բարձրաստիճան ներկայացուցիչների պաշտոնային դրույքաչափերը էականորեն կբարձրանան։ Կառավարությունը սեպտեմբերի 17-ի նիստում հավանություն է տվել օրենսդրական փաթեթին, որի իրականացման համար պետական բյուջեից տարեկան հավելյալ ավելի քան 25 միլիարդ դրամ է պահանջվելու։

Աշխատավարձերի բարձրացումը կվերաբերի պետական ապարատի տասնյակ հազարավոր աշխատակիցների, այդ թվում՝ երկրի ղեկավարությանը, նախարարներին, պատգամավորներին, դատավորներին և իրավապահ մարմինների ղեկավարներին։

natnews.am-ը մանրամասնում է՝ ըստ նախագծի՝ Նիկոլ Փաշինյանի աշխատավարձը կբարձրանա շուրջ 1.7 անգամ՝ ներկայիս 1.58 միլիոնից հասնելով 2.66 միլիոն դրամի։ Նույնքան կազմելու է նաև նախագահի աշխատավարձը։ Ազգային ժողովի նախագահի դրույքաչափը կսահմանվի շուրջ 2.5 միլիոն դրամ, իսկ փոխվարչապետինը՝ 2.16 միլիոն դրամ (1.29 միլիոնի փոխարեն)։

Նախարարների աշխատավարձերը կկրկնապատկվեն՝ 998 հազարից հասնելով մոտ 2 միլիոն դրամի։ Պատգամավորների դրույքաչափը 832 հազարից կբարձրանա մոտ 1.5 միլիոն դրամի (1.8 անգամ)։ Սահմանադրական դատարանի նախագահի աշխատավարձը կկազմի 2.41 միլիոն դրամ, Գլխավոր դատախազինը՝ 1.83 միլիոն, իսկ մարզպետներինը՝ 1.46 միլիոն դրամ։

Իշխանությունները աշխատավարձերի կտրուկ բարձրացումը հիմնավորում են պետական ծառայությունը մրցունակ դարձնելու և որակյալ մասնագետներ ներգրավելու անհրաժեշտությամբ։ Միևնույն ժամանակ նախատեսվում է վճարումների մի մասը կապել գերատեսչությունների և աշխատակիցների արդյունավետության ցուցանիշների հետ։

Փոփոխությունների առանձին բլոկ է վերաբերում տեղական ինքնակառավարման մարմիններին, որտեղ նույնպես նախատեսվում է համայնքների ղեկավարների դրույքաչափերի բարձրացում և հավելավճարների ներդրում։

Հատկանշական է, որ աշխատավարձերի այս բարձրացումը հաջորդում է պարգևատրումների նոր համակարգի ներդրմանը․ 2026 թվականի հուլիսին կառավարությունն արդեն իսկ 5 միլիարդ դրամ էր հատկացրել պաշտոնյաներին պարգևատրելու համար, ընդ որում՝ դրույքաչափերի ավելացումը չի չեղարկելու արդյունավետության համար տրվող հավելյալ պարգևատրումները։

The post Փաշինյանի ու Խաչատուրյանի աշխատավարձը կբարձրանա՝ դառնալով 2,66 միլիոն դրամ, նախարարների աշխատավարձը կկրկնապատկվի appeared first on Norlur.am.

ArmLur.am ահազանգած Աշոտ Խաչատրյանը պատմում է, որ շուրջ երեք տարի իր ավտոմեքենան կայանել է շենքի բակում։ Քանի որ աշխատում է որպես «Յանդեքս»-ի վարորդ և էլեկտրամոբիլ է շահագործում, առաջին հարկի պատին տեղադրել է նաև մեքենայի լիցքավորման սարք՝ հիմնականում գիշերային ժամերին մեքենան լիցքավորելու համար։ Խաչատրյանի խոսքով՝ որոշ ժամանակ անց առաջին հարկի բնակչի ամուսինը պահանջել է ոչ միայն մեքենան այլևս չկայանել այդ հատվածում, այլև պատից հեռացնել լիցքավորման սարքը։ Քաղաքացին պնդում է՝ պահանջը կատարել է և լիցքավորման սարքը տեղափոխել ավելի հեռու հատված։ Սակայն դրանով վեճը չի ավարտվել. ըստ նրա՝ հարևանն արդեն պահանջել է ամբողջությամբ հեռացնել լիցքավորման սարքը և մեքենան ընդհանրապես չկայանել այդ տարածքում։ Մինչդեռ իր բնակարանը երկրորդ հարկում է: Հարցն այստեղ արդեն դուրս է գալիս սովորական հարևանական վեճի շրջանակից. եթե խոսքը շենքի ընդհանուր օգտագործման տարածքի մասին է, ապա ի՞նչ իրավական հիմքով կարող է որևէ բնակիչ այն դիտարկել որպես իր բացառիկ օգտագործման տարածք և արգելել մյուս բնակչին այնտեղ մեքենա կայանել։

The post «Եթե չհանես, ջարդելու եմ». Գեղարքունիքի մարզպետը սպառնացել է քաղաքացուն ու հասցրել ոստիկանություն appeared first on Norlur.am.

ՀՀ վարչապետի աշխատակազմի տարածած հաղորդագրության մեջ նշվում է, որ Ֆինանսների նախարար Վահե Հովհաննիսյանը ներկայացրել է 2027–2029 թթ. հիմնական մակրոտնտեսական, հարկաբյուջետային ցուցանիշներն ու շրջանակները։ Մանրամասներ են ներկայացվել ոլորտային ծախսերի, ռազմավարական նշանակություն ունեցող ծախսային ուղղությունների վերաբերյալ։ Անդրադարձ է կատարվել նաև ՀՀ Կառավարության առաջնահերթություններին, հարկաբյուջետային քաղաքականության կանխատեսումներին:

2027 թ. պետական բյուջեի նախագծի առնչությամբ ծավալվել է մտքերի փոխանակություն, ներկայացվել են տարբեր առաջարկություններ և դիտարկումներ:

The post ՀՀ վարչապետի գլխավորությամբ քննարկվել է 2027 թվականի պետբյուջեի նախագիծը appeared first on Norlur.am.

ԱԺ նախկին պատգամավոր Մարտուն Գրիգորյանի կալանքը երկարաձգվել է 3 ամսով։

The post Մարտուն Գրիգորյանի կալանքը երկարաձգվել է appeared first on Norlur.am.

«Ժողովուրդ» օրաթերթը գրում է. «Հովիկ Աբրահամյանի որդու՝ Արգամ Աբրահամյանի ճակատագիրը այժմ կախված է Վերաքննիչ քրեական դատարանի դատավոր Սևակ Համբարձումյանի որոշումից։ Ինչպես հայտնի է, դատավորը մոտ 10 օր ժամանակ է խնդրել՝ որոշելու համար՝ փոխե՞լ Արգամ Աբրահամյանի նկատմամբ կիրառված խափանման միջոցը, թե՞ ոչ։ Ուշագրավ է, որ Սևակ Համբարձումյանը Վերաքննիչ քրեական դատարանի այն դատավորներից է, որի վարույթում հայտնվում են հանրային մեծ հետաքրքրություն առաջացրած քրեական գործեր։ Մասնավորապես, վերջերս նա մերժել էր «Չաղ Ռուստամ» մականունով հայտնի Ռուստամ Ստեփանյանի վերաբերյալ բողոքը և նրան կրկին ուղարկել էր կալանքի տակ։ Այս ֆոնին «Ժողովուրդ» օրաթերթը ուսումնասիրել է, թե ով է Սևակ Համբարձումյանը և ինչ ունեցվածք է հայտարարագրել դատավորը։ Ուսումնասիրել ենք նրա հայտարարագրերը՝ սկսած 2021 թվականից մինչև 2025 թվականը։

Սևակ Համբարձումյանը ծնվել է 1966 թվականին Թալին քաղաքում։ 1991 թվականից աշխատել է ՀՀ Գերագույն դատարանում, իսկ 1996 թվականից՝ ՀՀ Սահմանադրական դատարանում՝ որպես աշխատակազմի իրավախորհրդատվական ծառայության ղեկավար։ 1999 թվականից առ այսօր Սևակ Համբարձումյանն աշխատում է ՀՀ վերաքննիչ քրեական դատարանի դատավոր։

2021 թվական․ 31.8 մլն դրամ կանխիկ գումար և հինգ անշարժ գույք

2021 թվականի սկզբին դատավորի հայտարարագրում առկա է եղել հինգ անշարժ գույք։ Դրանցից երկուսը Արագածոտնի մարզի Թալինում գտնվող հողամասեր են, որոնք ձեռք են բերվել դեռևս 1991 թվականի մարտի 30-ին։ Թալինում Համբարձումյանը ունեցել է նաև հասարակական նշանակության շինություն՝ 2/4 բաժնային սեփականությամբ, որը ձեռք է բերվել 2012 թվականի ապրիլի 13-ին՝ նվիրատվության եղանակով։ Դատավորի ունեցվածքում եղել են նաև երկու անհատական բնակելի տներ՝ տնտեսական շինություններով։ Դրանցից մեկը գտնվել է Թալինում և ձեռք է բերվել 2003 թվականի հոկտեմբերի 20-ին, իսկ մյուսը՝ Երևանի Դավթաշեն վարչական շրջանում, որը ձեռք է բերվել 2003 թվականի դեկտեմբերի 23-ին։

2021 թվականի ընթացքում Համբարձումյանը որևէ անշարժ գույք չի ձեռք բերել կամ օտարել, և տարեվերջին հայտարարագրում պահպանվել են նույն հինգ անշարժ գույքերը։ Նույն տարվա սկզբին դատավորի հայտարարագրում եղել է 2013 թվականի արտադրության Lexus մակնիշի ավտոմեքենա։ Այն ձեռք է բերվել 2014 թվականի նոյեմբերի 15-ին՝ գնման եղանակով։ 2021 թվականի ընթացքում մեքենան չի օտարվել, և այն պահպանվել է նաև տարեվերջին։

2021 թվականին Սևակ Համբարձումյանը աշխատանքի վարձատրության և դրան հավասարեցված այլ վճարների տեսքով ստացել է 15 մլն 50 դրամ եկամուտ։ Եկամուտը վճարել է ՀՀ վերաքննիչ քրեական դատարանը։ Դատավորի բանկային հաշվի մնացորդը 2021 թվականի սկզբում կազմել է 5 մլն 504 հազար 310 դրամ, իսկ տարեվերջին՝ 4 մլն 543 հազար 758 դրամ։ Այսինքն՝ բանկային հաշվի միջոցները մեկ տարվա ընթացքում նվազել են 960 հազար 552 դրամով։ Միևնույն ժամանակ, կանխիկ դրամական միջոցները տարվա սկզբի 29 մլն 800 հազար դրամից տարեվերջին հասել են 31 մլն 800 հազար դրամի՝ ավելանալով 2 մլն դրամով։

2025 թվական․ Jaguar և 31.7 մլն դրամ կանխիկ

Եթե 2021 թվականին Սևակ Համբարձումյանի հայտարարագրում առկա էր Lexus մակնիշի ավտոմեքենա, ապա 2025 թվականի հայտարարագրում արդեն նշված է 2018 թվականի արտադրության Jaguar։ Այն ձեռք է բերվել 2024 թվականի հուլիսի 1-ին՝ գնման եղանակով, և 2025 թվականի վերջին շարունակում էր մնալ դատավորի ունեցվածքում։

2025 թվականի սկզբին և տարեվերջին Համբարձումյանի հայտարարագրում առկա է եղել նույն՝ հինգ անշարժ գույքը։ Դրանցից մեկը Արագածոտնի մարզի Թալինում գտնվող անհատական բնակելի տուն է, որի 2/3 բաժինը նա ձեռք է բերել 2023 թվականի օգոստոսի 11-ին՝ նվիրատվության եղանակով։ Մյուս բնակելի տունը գտնվում է Երևանի Դավթաշեն վարչական շրջանում և ձեռք է բերվել 2003 թվականի դեկտեմբերի 23-ին։ Նրա գույքում է նաև Թալինում գտնվող հասարակական նշանակության շինությունը, որի 2/4 բաժինը ձեռք է բերվել 2012 թվականին՝ նվիրատվության միջոցով, ինչպես նաև 1991 թվականին ձեռք բերված երկու հողամասերը։

Դատավորի եկամուտը 2025 թվականին կազմել է 18 մլն 581 հազար 244 դրամ։ Այն ներկայացված է որպես աշխատանքի վարձատրություն և դրան հավասարեցված այլ վճարումներ, որոնք ստացել է Բարձրագույն դատական խորհրդի աշխատակազմից՝ Դատական դեպարտամենտից։

2025 թվականի սկզբին Սևակ Համբարձումյանի բանկային հաշիվների մնացորդը կազմել է 3 մլն 900 հազար 675 դրամ, իսկ տարեվերջին՝ 4 մլն 333 հազար 852 դրամ։ Կանխիկ դրամական միջոցները տարվա ընթացքում ավելացել են 2 մլն 100 հազար դրամով։ Եթե 2025 թվականի սկզբին նա հայտարարագրել էր 29 մլն 600 հազար դրամ, ապա տարեվերջին կանխիկ գումարը կազմել է 31 մլն 700 հազար դրամ։

Այսպիսով, բանկային հաշվի և կանխիկ միջոցների համադրությամբ՝ 2025 թվականի սկզբի 33 մլն 500 հազար 675 դրամի փոխարեն տարեվերջին Սևակ Համբարձումյանի դրամական միջոցները կազմել են 36 մլն 33 հազար 852 դրամ՝ ավելանալով 2 մլն 533 հազար 177 դրամով։

2021-2025 թվականներին Սևակ Համբարձումյանի անշարժ գույքի քանակը չի փոխվել՝ պահպանվել է հինգ միավորը, սակայն Lexus-ը փոխարինվել է Jaguar-ով, եկամուտը 15 մլն 50 դրամից հասել է 18 մլն 581 հազար 244 դրամի»։

Առավել մանրամասն թերթի այսօրվա համարում

The post «Ժողովուրդ». Հովիկ Աբրահամյանի որդու ճակատագիրը որոշող դատավորը ի՞նչ ունեցվածք ունի appeared first on Norlur.am.