Այսօր՝ օգոստոսի 19-ին, ողբերգական դեպք է տեղի ունեցել Գեղարքունիքի մարզում։ Ժամը 21:20-ի սահմաններում «Գազ 53» մակնիշի առանց համարանիշի բեռնատարը Ճամբարակ քաղաքից դեպի Վահան գյուղ տանող ճանապարհին վրաերթի է ենթարկել 6 հետիոտնի։

Ինչպես դեպքի վայրից հայտնում է ֆոտոլրագրող Գագիկ Շամշյանը, վրաերթի ենթարկվածներից 1-ը մահացել է, 5 հոգի տարբեր աստիճանի մարմնական վնասվածքներով տեղափոխվել են Ճամբարակի ամբուլատոր բժշկական կենտրոն։

Վիրավորներին առաջինն օգնության են հասել քաղաքացիները և ըստ քաղաքացիների հայտնածի՝ օպերատիվորեն ժամանած Ճամբարակ ամբուլատոր կենտրոնի շտապօգնության բժիշկները։

Դեպքի վայր են ժամանել ՀՀ Ներքին գործերի նախարարության ոստիկանության Պարեկային ծառայության Գեղարքունիքի մարզի գումարտակի պարեկները՝ գումարտակի հրամանատար Աղասի Խաչատրյանի, գումարտակի հրամանատարի տեղակալ Իգոր Ղազարյանի, գումարտակի ծառայության ավագ տեսուչներ Ներսիկ Գրիգորյանի, Բակուր Սարիբեկյանի, 2-րդ վաշտի հրամանատար Արթուր Եղիազարյանի և նույն վաշտի 1-ին դասակի հրամանատար Գրիգոր Ալեքսանյանի գլխավորությամբ։Ժամանել են նաև ՀՀ ՆԳՆ ոստիկանության համայնքային ոստիկանության գլխավոր վարչության Ճամբարակի բաժնի հերթապահ խումբը բաժնի պետի գլխավորությամբ։

Դեպքի փաստով քննչական բաժնում նախաձեռնվել է քրեական վարույթ, որտեղ էլ պարզում են ավտոմեքենայի սեփականատիրոջ, վարորդի, մահացածի և վիրավորների ինքնությունը։

Քննիչի հանձնարարականով ավտոմեքենան տեղափոխվում է ոստիկանության Ճամբարակի բաժնի պահպանվող հատուկ տարածք։

Աղբյուր՝ 24News.am

The post «Գազ 53»-ը Ճամբարակից Վահան գյուղ տանող ճանապարհին վրաերթի է ենթարկել 6 հետիոտնի․կա 1 զոհ, 5 վիրավոր appeared first on Norlur.am.

ՀՀ Սահմանադրության 151-րդ հոդվածի համաձայն՝ Կառավարության կազմավորումից հետո՝ քսանօրյա ժամկետում, վարչապետն Ազգային ժողով է ներկայացնում Կառավարության ծրագիրը: Վերոնշյալի կատարումն ապահովելու անհրաժեշտությամբ պայմանավորված՝ մշակվել է Հայաստանի Հանրապետության կառավարության ծրագիրը, որը կներկայացվի Կառավարության նիստին: Ազգային ժողովի կողմից Կառավարության ծրագրի հավանության արժանանալուց հետո Կառավարությունը եռամսյա ժամկետում կհաստատի Կառավարության գործունեության միջոցառումների հնգամյա ծրագիրը:

Կառավարությունը նախատեսում է Եկեղեցու բարենորոգման, ֆինանսական թափանցիկության և հոգևորականների բարեվարքության ապահովմանն ուղղված մի շարք քայլեր իրականացնել։

Արժեքահենք հոգևոր կյանք ունենալու խնդրի լուծման համար Հայաստանյայց Առաքելական Սուրբ Եկեղեցու բարենորոգումը կենսական անհրաժեշտություն է։ Հայաստանյայց Առաքելական Սուրբ Եկեղեցու բարենորոգման օրակարգը ծառայում է Եկեղեցին կանոնականության դաշտ բերելուն և Եկեղեցու քաղաքականացումը բացառելուն։ Հոգևոր անվտանգության խնդիրն ապահովելու, Հայաստանյայց Առաքելական Սուրբ Եկեղեցին հիբրիդային պայքարի հենակետ դարձնելու արտաքին ուժերի փորձերը բացառելու և Հայաստանյայց Առաքելական Սուրբ Եկեղեցին բարենորոգելու նպատակով ջանքեր են գործադրվելու հետևյալ օրակարգի իրագործման համար`

1) Ապահովվելու է Հայաստանյայց Առաքելական Սուրբ Եկեղեցու փաստացի պետի հեռացումը (հանգստի կոչումը), և սահմանված կարգով իրականացվելու է Կաթողիկոսական տեղապահի ընտրություն:

2) Ապահովվելու է Հայաստանյայց Առաքելական Սուրբ Եկեղեցու կանոնադրության ընդունումը, որով պետք է սահմանվեն ամրագրված սկզբունքների պահպանման, ֆինանսական թափանցիկության և հոգևորականների բարեվարքության ապահովման կառուցակարգեր:

3) Սահմանված կարգով ապահովվելու է Ամենայն Հայոց Կաթողիկոսի ընտրությունը: Կառավարությունը ձեռնամուխ է լինելու նաև հոգևոր ծառայողներին սոցիալական երաշխիքների պետական համակարգում ներառելուն և եկեղեցու ֆինանսավորման թափանցիկությունը ապահովելուն»,-ասված է ՀՀ Կառավարության հնգամյա ծրագրում։

Աղբյուր՝ 24News.am

The post Ջանքեր են գործադրվելու ապահովելու Հայաստանյայց Առաքելական Սուրբ Եկեղեցու փաստացի պետի հեռացումը appeared first on Norlur.am.

Հիդրոօդերևութաբանության և մոնիթորինգի կենտրոնը ներկայացրել է Երևանում մթնոլորտային օդի որակը օգոստոսի 12-18-ը:

Փոշու պարունակությունը գերազանցել է սահմանային թույլատրելի կոնցենտրացիան․

Կենտրոնում՝ օգոստոսի 13-17-ը,
Արաբկիրում՝ օգոստոսի 15-16-ը,
Շենգավիթում` չի գերազանցել,
Նոր Նորքում՝ չի գերազանցել։

Ազոտի երկօքսիդի պարունակությունը գերազանցել Է սահմանային թույլատրելի կոնցենտրացիան․

Կենտրոնում՝ օգոստոսի 12-ին և 15-18-ը,
Նոր Նորքում՝ օգոստոսի 12-ին և 15-18-ը,
Արաբկիրում՝ օգոստոսի 17-18-ը,
Շենգավիթում` չի գերազանցել։

Ծծմբի երկօքսիդի պարունակությունը չի գերազանցել սահմանային թույլատրելի կոնցենտրացիան:

Աղբյուր՝ 24News.am

The post Երևանի երկու վարչական շրջանում փոշու պարունակությունը գերազանցել է թույլատրելի կոնցենտրացիան appeared first on Norlur.am.

Հայաստանի փոխչեմպիոն «Նոան» ավարտեց համագործակցությունը գլխավոր մարզիչ Սանդրո Պերկովիչի հետ։ Այս մասին փաստում են խորվաթական աղբյուրները՝ մասնավորապես Index.hr և Germanijak պարբերականները։ Այս մասին հայտնում է armsport.am-ը։

Պաշտոնանկության հիմնական դրդապատճառը Կոնֆերենցիաների լիգայի որակավորման փուլից դուրս մնալն է։

«Նոան» չկարողացավ հաղթահարել շվեյցարական «Սիոնի» արգելքը. առաջին խաղում գրանցվեց 2:2 հաշիվը, իսկ պատասխան մրցավեճում հայկական ակումբը զիջեց 1:2 հաշվով։

«Նոան» դեռ հանդես չի եկել պաշտոնական հայտարարությամբ։

Աղբյուր՝ 24News.am

The post Պերկովիչը հրաժեշտ է տալիս Նոային appeared first on Norlur.am.

Եվրոպայում այս տարվա անտառային հրդեհների հետևանքով արդեն այրվել է շուրջ 576 հազար հեկտար տարածք՝ Լյուքսեմբուրգի մակերեսից ավելի քան երկու անգամ մեծ տարածք։ Այս մասին վկայում են Եվրոպական անտառային հրդեհների տեղեկատվական համակարգի՝ EFFIS-ի տվյալները, գրում է Reuters-ը։

Եվրոպական երկրներն արդեն փորձում են նոր մեխանիզմներ մշակել կլիմայական ռիսկերը կառավարելու համար։ Պորտուգալիան, օրինակ, դիտարկում է պարտադիր ապահովագրության համակարգ՝ աղետների հատուկ հիմնադրամի աջակցությամբ, իսկ Հունաստանը մեծացնում է ներդրումները կլիմայական վտանգներին դիմակայող ենթակառուցվածքներում։

ԵՄ մակարդակով քննարկվում են նաև կլիմայական ռիսկերի համատեղ կառավարման և հնարավոր պետական-մասնավոր վերաապահովագրական մեխանիզմների ստեղծման տարբերակներ։ Փորձագետների գնահատմամբ՝ կանխարգելիչ ներդրումները կարող են զգալիորեն նվազեցնել ապագա տնտեսական կորուստները։

Աղբյուր՝ 24News.am

The post Եվրոպայում անտառային հրդեհները շուրջ 576 հազար հեկտար տարածք են այրել appeared first on Norlur.am.

ՀՀ Սահմանադրության 151-րդ հոդվածի համաձայն՝ Կառավարության կազմավորումից հետո՝ քսանօրյա ժամկետում, վարչապետն Ազգային ժողով է ներկայացնում Կառավարության ծրագիրը: Վերոնշյալի կատարումն ապահովելու անհրաժեշտությամբ պայմանավորված՝ մշակվել է Հայաստանի Հանրապետության կառավարության ծրագիրը, որը կներկայացվի Կառավարության նիստին: Ազգային ժողովի կողմից Կառավարության ծրագրի հավանության արժանանալուց հետո Կառավարությունը եռամսյա ժամկետում կհաստատի Կառավարության գործունեության միջոցառումների հնգամյա ծրագիրը:

Ըստ Ծրագրի՝ Կառավարությունը վարելու է հավասարակշռված և հավասարակշռման արտաքին քաղաքականություն, շարունակվելու է ռազմավարական և գործընկերային հարաբերությունների խորացումը ԱՄՆ-ի, Վրաստանի, Չինաստանի, Ֆրանսիայի, ԵՄ-ի, ԵԱՏՄ-ի, Իրանի, ՌԴ-ի, Հնդկաստանի և այլ գործընկերների հետ։ Ծրագրում նշվում է նաև, որ ՀՀ-ն շարունակելու է Խաղաղության խորհրդում աշխատանքները և աշխատանքներ է տարվելու Շանհայի համագործակցության կազմակերպությանն անդամակցության ուղղությամբ։

ԵՄ-ի հետ ռազմավարական գործընկերության խորացման վերաբերյալ նշված է. «Շարունակվելու են ԵՄ–ի հետ ռազմավարական համագործակցության ոլորտային զարգացումը և ինտեգրումը՝ Համապարփակ և ընդլայնված գործընկերության համաձայնագրի լիարժեք և արդյունավետ կիրարկման, ինչպես նաև Եվրոպական միության ժողովրդավարության և օրենքի գերակայության, տնտեսական, ֆինանսական, շրջակա միջավայրի, սոցիալական և այլ ոլորտների չափանիշներին Հայաստանի համապատասխանեցման ուղղությամբ՝ 2025 թվականի «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի հիման վրա: Ավարտին է հասցվելու վիզաների ազատականացման գործողությունների ծրագիրը՝ Հայաստանի Հանրապետության քաղաքացիների համար ԵՄ մուտքի արտոնագրերի ազատականացման նպատակով»:

Ադրբեջանի և Թուրքիայի հետ հարաբերությունների վերաբերյալ Ծրագրում նշված է.

«Կառավարությունը շարունակելու է աշխատանքը «ՀՀ-ի և Ադրբեջանի միջև խաղաղության և միջպետական ​​հարաբերությունների հաստատման մասին» համաձայնագիրը ստորագրելու և վավերացնելու, Ադրբեջանի հետ պետական սահմանի սահմանազատման և սահմանագծման աշխատանքները շարունակելու, Հայաստանի և Ադրբեջանի քաղաքացիական հասարակությունների, գործարար համայնքների միջև շփումները և երկկողմ առևտուրը ակտիվացնելու ուղղությամբ:

Աշխատանքներ են տարվելու Հայաստան-Թուրքիա դիվանագիտական հարաբերությունները հաստատելու, Հայաստան-Թուրքիա սահմանը բացելու և առնվազն 2 արդիական անցակետ գործարկելու, տրանսպորտային, էներգետիկ և թվային ենթակառուցվածքները վերագործարկելու և ընդլայնելու, երկկողմ և բազմակողմ առևտուրը խթանելու ուղղությամբ»։

Աղբյուր՝ 24News.am

The post Մշակվել է ՀՀ կառավարության գործունեության միջոցառումների 5-ամյա ծրագիրը appeared first on Norlur.am.

ՆԳ նախարարությունը շարունակում է իրազեկման արշավը, որի նպատակն անչափահասների նկատմամբ բռնության և նման երևույթների կանխարգելման ուղղությամբ հանրային իրազեկվածության բարձրացումն է։

Շարքի հերթական թողարկման շրջանակում իրավաբանական գիտությունների թեկնածու, դոցենտ Դավիթ Թումասյանը ներկայացնում է անչափահասների նկատմամբ ֆիզիկական բռնության հնարավոր հետևանքներն ու կանխարգելման ուղղությամբ աշխատանքի կարևորությունը։

Մասնավորապես, անդրադարձ է կատարվել՝
– անչափահասների նկատմամբ ֆիզիկական բռնության լատենտայնությանը,
– ֆիզիկական բռնությունը որպես դաստիարակչական մեթոդի կիրառման անթույլատրելիությանը,
-բռնության ազդեցությանը երեխայի ֆիզիկական և հոգեկան առողջության վրա,
– բռնության դեպքերին պատշաճ արձագանքման կարևորությանը։

Աղբյուր՝ 24News.am

The post Երեխային դաստիարակելիս ֆիզիկական բռնությունն անթույլատրելի է․ ՆԳ նախարարությունն իրազեկում է appeared first on Norlur.am.

ԱՄՆ նախագահ Դոնալդ Թրամփը չի բացառել Իրանի հետ բանակցությունները վերսկսելու հնարավորությունը՝ նշելով, որ դա կարող է տեղի ունենալ որոշակի փուլում, սակայն այս պահին դրա անհրաժեշտությունը չի տեսնում։

Ինչպես հաղորդում է «Արմենպրես»-ը, վկայակոչելով «Ինտերֆաքս»-ը, այս մասին ասել է Թրամփը օգոստոսի 19-ին լրագրողների հետ զրույցում՝ պատասխանելով այն հարցին, թե արդյոք մտադիր է վերսկսել բանակցությունները Իրանի հետ։

«Հնարավոր է՝ ինչ-որ պահի։ Բայց հիմա, կարծում եմ, իրավիճակն առանց այդ էլ շատ լավ է»,-ասել է նա։ Թրամփը կրկին հայտարարել է, որ, իր կարծիքով, ներկայում ԱՄՆ-ն ամբողջությամբ վերահսկում է Հորմուզի նեղուցը։

Աղբյուր՝ 24News.am

The post Թրամփը չի բացառել Իրանի հետ բանակցությունների վերսկսումը appeared first on Norlur.am.

Հայաստանում իր աշխատանքն է սկսել Եվրասիական վարկանիշային գործակալության ներկայացուցչի գրասենյակը: Արմենիա Sputnik-ի փոխանցմամբ այս մասին հայտնում են գործակալության մամուլի ծառայությունից։

Երևանում ներկայացուցչությունը բացվել է ավելի քան կես տարվա կազմակերպչական աշխատանքների արդյունքում, որոնք իրականացվել են Հայաստանի առևտրաարդյունաբերական պալատի հետ համագործակցությամբ։

Գործակալության տնօրենների խորհրդի նախագահ Անդրեյ Բելյանինովը նշել է, որ Հայաստանում աշխատանքի մեկնարկը կառույցին թույլ կտա ընդլայնել գործունեության աշխարհագրությունը և տարածաշրջանի երկրների ներդրումային ներուժի գնահատման հնարավորությունները:

«Եվրասիան մեծ և բարդ տարածաշրջան է։ Հայաստանի Հանրապետության ներդրումային ներուժի գնահատման համակարգում ընդգրկումը, իմ կարծիքով, գործակալության հնարավորությունները ընդլայնող հերթական քայլն է», – ասել է Բելյանինովը։

Եվրասիական վարկանիշային գործակալության հայաստանյան ներկայացուցիչ է նշանակվել գործարար և հասարակական գործիչ Արմեն Խաչատրյանը: Ինչպես նշել են գործակալությունում, նա երկար տարիներ զբաղվել է Ռուսաստանի հետ Հայաստանի տրանսպորտային և տնտեսական փոխգործակցության հարցերով:

Աղբյուր՝ 24News.am

The post Եվրասիական վարկանիշային գործակալությունը Հայաստանում ներկայացուցիչ է նշանակել appeared first on Norlur.am.

Մեզ համար եվրոինտեգրումը Հայաստանի անվտանգությունն ապահովելու գործիք էր, ձեզ համար՝ Հայաստանը գործիք դարձնելու միջոց։ Այս մասին գրել է ՀՀԿ փոխնախագահ Արմեն Աշոտյանը։

«Ազգային ժողովի այսօրվա նիստը աչքի ընկավ մի շարք արձանագրումներով:

Նախ և առաջ իշխանական ուժն, առաջին իսկ «պատեհ», իսկ ավելի ճիշտ՝ անպատեհ առիթով վերջ դրեց բարեկրթության պատրանքին Ազգային ժողովի դահլիճում, որն ի սկզբանե կեղծ կերպով ներկայացված թակարդ էր ընդդիմության համար։

Իհարկե, բարեկրթությունը կամ բարեվարքությունը պարտադիր պայման են քաղաքական արդյունավետ աշխատանքի համար, սակայն բարեկրթության այն տարբերակը, որ առաջարկվում էր ՔՊ-ի կողմից, ի սկզբանե մեռելածին է, քանզի չի ուղեկցվում Հայաստանի ամբողջ տարածքում օրենքի գերակայության վերականգնման, մարդու իրավունքների ինստիտուտի նկատմամբ հարգանքի, քաղբանտարկյալների ազատ արձակման, քաղաքական հետապնդումների դադարեցման համապետական մոտեցումով։
Դա ոչ թե համատարած «ամնիստիա» է, այլ լոկալ «ամնեզիա»:

Եվ պատահական չէ, որ ՔՊ-ականները այսօր Ազգային ժողովում գործի դրեցին ոչ թե քաղաքական միտքը, այլ վարչական լծակները, կասեցնելով ընդդիմության ներգրավվածությունը նիստերի աշխատանքներին։

Ճակատագրի հեգնանքն այնտեղ է, որ այդ բիրտ ուժի սպառնալիքը տեղի է ունեցել հենց եվրոպական ինտեգրման հարցերով հանձնաժողովի նախագահի ընտրության առիթով, որի ընթացքում ամենաշատն են հնչել մարդու իրավունքներ, օրենքի գերակայություն, ժողովրդավարություն, բազմակարծություն բառերը։
Սակայն երկրորդ արձանագրումը շատ ավելի կարևոր է. ՔՊ-ականներին հանգիստ չեն տալիս Սերժ Սարգսյանը և Հանրապետական կուսակցությունը, որոնք անկախ այն հանգամանքից, որ ֆիզիկապես չեն գտնվում դահլիճում, շարունակում են փաստացի թելադրել քաղաքական օրակարգ։

Այսօրվա քննարկումների համատեքստում օրակարգի մաս էին դարձել արտաքին քաղաքականությանը վերաբերող, մասնավորապես՝ եվրասիական եւ եվրոպական ուղղությունների հետ կապված հարցեր։

Եթե իրոք հնարավոր է մեկ օրվա ընթացքում որևէ ազգային պետություն, մասնավորապես Հայաստանը, «մտցնել» ( իրենց բառապաշարով ասած) այս կամ այն վերազգային քաղաքական կամ տնտեսական կառույց, ինչպես իրենք են գնահատում 2013 թվականին Մաքսային միությանը միանալու Սերժ Սարգսյանի որոշումը, ապա խնդրում, հորդորում, պահանջում եմ ՔՊ-ականներից մեզ մեկ օրվա ընթացքում Հայաստանը «մտցնել» Եվրոպական Միություն։

Եթե դա հնարավոր է և իրենք չեն կարող, ապա հերթական անգամ կապացուցվի, որ Սերժ Սարգսյանը իրենցից ուժեղ տղա է։
Եթե դա հնարավոր է, բայց իրենք չեն ուզում, ապա կապացուցվի, որ իրենք մոլորեցնում են մեր ժողովրդին եվրոպական օրակարգով։
Եթե դա հնարավոր չէ, բայց նրանք դրա մասին խոսում են, ուրեմն նրանց գրագիտության և բարոյագիտության մասին հետևությունները թողնում եմ ձեզ։

Ի դեպ, Եվրասիական Միության անդամակցելու շնորհիվ է, որ Հայաստանի տնտեսությունը ոչ միայն կոլապսի չի ենթարկվել, այլ նաև զարգացումներ է ապահովել վերջին տարիներին, և դա արվել է երկու հիմնական գործոններով:

Առաջինը , ռուսական գազի գնի հետ կապված Սերժ Սարգսյանի շնորհիվ և օրոք ստորագրված պայմանագրի, և երկրորդը, Եվրասիական Միությանը անդամակցելու հետեւանքով մեծ շուկային անարգել մուտքով։

Սերժ Սարգսյանի այդ երկու որոշումների շնորհիվ Հայաստանը միտ 10 միլիարդից ավել օգուտ է ստացել։ Կասկածողներին խնդրում եմ հաշվել Հայաստանում և միջազգային շուկաներում գազի գների տարբերությունը գոնե 2018-ից առ այսօր, ինչպես նաև Եվրասիական շուկաներ Հայաստանի արտահանման կամ վերաարտահանման ծավալներից ստացած օգուտները։
Ինչ վերաբերում է եվրոպական ուղղությանը, ապա այստեղ ստիպված եմ ևս լիքբեզ անել ՔՊ-ական պատգամավորների համար, որոնց պրիմիտիվ ընկալումներով CEPA-ն դա ասոցացման համաձայնագիր հանած DCFTA տարբերակն է։

Իրականում մինչեւ 2013 թվականը Հայաստանը բանակցել է Եվրոպական Միության հետ երկու փաստաթուղթ։ Ասոցացման համաձայնագիր (AA), որը ներառում էր քաղաքական, հասարակական, իրավական բարեփոխումներ, և ազատ առևտրին վերաբերող DCFTA-ը։ 2013-ին չի հաջողվել փաթեթը ստորագրել ոչ թե հայկական, այլ եվրոպական կողմից խաղի կանոնների փոփոխության արդյունքում, ինչի մասին բազմիցս արձանագրվել և և վկայակոչվել է։

Այնուհանդերձ, Սերժ Սարգսյանի օրոք և շնորհիվ ստորագրված CEPA-ն մոտ 90-95% -ով, և սա եվրոպական քաղաքագետների և փորձագետների գնահատականն է, համընկնում է այդ երկու փաստաթղթերի բովանդակությանը։

AA – DCFTA = CEPA հավասարում գոյություն չունի: Իրական բանաձեւն է՝ (AA+DCFTA) x 0.95 = CEPA :

Ամենակարևոր տարբերությունը մեկն է՝ CEPA-յում արձանագրված է, որ Հայաստանի տնտեսական, ֆինանսական, մաքսային և այլ նմանատիպ ոլորտների բարեփոխումները չպետք է հակասեն այլ միջազգային կառույցներին անդամակցելու ընթացքում մեր ստանձնած պարտավորություններին։
Մնացած բոլոր ուղղություններով այդ փաստաթղթերը նույնատիպ են։

Զավեշտ է, երբ մեզ փորձում է քննադատել մի իշխանություն, որը «բարեհաջող» կերպով տապալել է և տապալում է CEPA-յի իմպլեմենտացիան։ Գեղեցիկ փաթեթավորված քաղաքական գնահատականների և պաշտոնական փաստաթղթերի արանքում չեք կարող թաքցնել այն հանգամանքը, որ այդ փաստաթղթով պայմանավորված բարեփոխումները դոփում են տեղում և լավագույն դեպքում համապատասխանում են ժամանակացուցային պարտավորությունների մոտ 40%-ին ( ավելի ճշգրիտ գնահատականներ տալ չեմ կարող այն պատճառով, որ թե հայկական, թե եվրոպական կողմերը կենացների հետևում թաքցնում են հայ և եվրոպական հասարակություններից բարեփոխումների իրական ընթացքը):
Որքան էլ գործող ռեժիմը փորձի ջանալ, թե իբր իրենց օրոք աննախադեպ նոր հաջողությունների է հասել Եվրոպական Միության հետ, այնուհանդերձ ստիպված հիշեցնում եմ, որ Եվրոպական Միության հետ իրենց կողմից ստորագրված բոլոր նոր փաստաթղթերի հիմքում ընկած է հենց CEPA-ն, այդ թվում՝ անվտանգային։
Համոզվելու համար բավարար է այցելել Արտաքին գործերի նախարարության պաշտոնակ կայք եւ ծանոթանալ վերջերս ստորագրված ամենաբարձր կարգի փաստաթղթի՝ ԵՄ Հայաստան ռազմավարական օրակարգի հետ, որտեղ սևով սպիտակի վրա 20-ից ավել անգամ գրված է, որ այդ բոլոր պարտավորությունները, գործողությունները, ոլորտները բխում են հենց «Սերժի CEPA-ից»։

Ավելին, հենց ներածության մեջ գրված է, որ այդ փաստաթուղթը հիմք է ընդունում CEPA-ն, նպատակ ունի հասնել CEPA-յով ուրվագծված վերջնարդյունքին և CEPA-ն է այն իրավական բազիսը, որի վրա ստորագրվել է այդ ճռճռան անունով փաստաթուղթը։

Էլ ավելին, ԵՄ անդամ մի շարք պետությունների հետ առանձին ստորագրված նմանատիպ փաստաթղթերի հիմքում նույնպես CEPA-ն է։

Այսքանով հանդերձ ուզում եմ անել երկու եզրակացություն։

Առաջինը, Հայաստանի արտաքին քաղաքականությունը Սերժ Սարգսյանի օրոք բխում էր Հայաստանի անվտանգային քաղաքականությունից և ծառայում էր գործիք Հայաստանի անվտանգությունը ապահովելու համար, իսկ գործող ռեժիմն արտաքին քաղաքականությունը վերածել է անվտանգային սպառնալիքի, ոչ թե հնարավորության։

Երկրորդը, եթե նախկինում եվրոպական ինտեգրումը Հայաստանի համապարփակ անվտանգությունը ապահովելու գործիք էր, ապա գործող ռեժիմը եվրոպական ինտեգրման անվան տակ Հայաստանն է վերածել եվրոպական, իսկ ավելի լայն իմաստով՝ արևմտյան քաղաքականության գործիքի։

Հ.Գ. CEPA-ն արձանագրում եւ ԵՄ-ի համար պարտադիր իրավական ուժ էր հաղորդում նաեւ Լեռնային Ղարաբաղի խնդրի կարգավորման այնպիսի տարբերակին, որտեղ Արցախի ժողովրդի ինքնորոշման իրավունքը անքակտելի սկզբունքներից մեկն էր։ Սա էլ ձեր կողմից «Սերժի ժառանգությունը» մսխելու մեկ այլ ողբեգական ապացույց…

Արմեն Աշոտյան
ՀՀԿ փոխնախագահ
«Ձորաղբյուր» ՏԿՀ
19/08/2026»։

Աղբյուր՝ 24News.am

The post Մեզ համար եվրոինտեգրումը ՀՀ-ի անվտանգությունն ապահովելու գործիք էր․ Աշոտյան appeared first on Norlur.am.