Բաժին : Լուրեր
«Դա բացահայտ սադրանք է»․ Թուրքիայում մեկնաբանել են ԱՄՆ դեսպանատան ուղղությամբ հնչած կրակոցները
Թուրքիայի իշխող «Արդարություն և զարգացում» կուսակցության խոսնակ Օմար Չելիքն Անկարայում ԱՄՆ դեսպանատան դեմ հարձակումն անվանել է սադրանք՝ հավաստիացնելով, որ իշխանությունները շատ ուշադիր են դեսպանատան տարածքի անվտանգության ապահովման հարցում։ Այս մասին գրում է artigercek.com կայքը։
«Դա բացահայտ սադրանք է։ Դեսպանատան տարածքը մեր պաշտպանության տակ է, անվտանգության նորմերի ապահովման հարցում մեծ նրբանկատություն է ցուցաբերվելու»,- ասել է Չելիքը։
Հիշեցնենք, որ այս առավոտ Թուրքիայի մայրաքաղաք Անկարայում 6 կրակոց է հնչել ԱՄՆ դեսպանատան ուղղությամբ։
Կրակողները գտնվել են սպիտակ մեքենայի մեջ, որով էլ փախուստի են դիմել դեպքի վայրից: Նրանց հանդեպ հետախուզում է հայտարարված։
Միջադեպի հետևանքով որևէ մեկը չի տուժել:
