/// Իրավապահ մարմինները պետք է այս հարցը քննության տակ առնեն. Տ.Մարգարյանը՝ այսօր քաղաքապետարանում տեղի ունեցած իրադարձությունների մասին

Իրավապահ մարմինները պետք է այս հարցը քննության տակ առնեն. Տ.Մարգարյանը՝ այսօր քաղաքապետարանում տեղի ունեցած իրադարձությունների մասին

Երևանի քաղաքապետ Տարոն Մարգարյանը իջավ քաղաքապետարանի դիմաց հավաքված ցուցարարների մոտ: Այդ պահին արդեն քաղաքապետի հրաժարականը պահանջող ցուցարարների զգալի մասը հեռացել էր. մնացել էին Մարգարյանի աջակիցները:

Մինչ լրագրողների հարցերին պատասխանելը Տարոն Մարգարյանը ծափողջույնների ներքո ողջագուրվում էր իրեն սատարողների հետ:

«Իմ շա՛տ սիրելի համաքաղաքացիներ, շնորհակալ եմ, որ եկել եք, այստեղ եք, շնորհակալ եմ, որ միշտ եղել եք մեր կողքին՝ հավատալով մեր աշխատանքին: Ձեր խոսքը լսեցինք ու միշտ լսել ենք, խնդրում եմ՝ միացե՛ք ձեր ընտանիքներին, ձեզ լավ օր եմ մաղթում: Շնորհակալ եմ, որ եկել ու պաշտպանում եք ձեր քաղաքապետին, մենք միասին կառուցելու ենք մեր Երևան քաղաքը»,- ասաց Մարգարյանը:

Ինչ վերաբերում է հարցին, թե ինչու քաղաքապետը չէր իջնում ներքև, երբ իր հրաժարականը պահանջող ցուցարարներն էին հանդիպում պահանջում, քաղաքապետը պատասխանեց, թե աշխատանքային այցով այլ վարչական շրջանում էր գտնվում:

«Երբ լսեցի, որ բողոքի ակցիա կա, փորձեցի արագ ավարտել ու միանալ մեր քաղաքացիներին՝ լսելու նրանց դժգոհությունը: Հարգում եմ մեր երևանցիների խոսքը, մենք միշտ լսել ենք երևանցիներին և անպայման հաշվի ենք առնելու բոլոր խնդիրները: Մեր ծրագրերը, որոնք առաջիկա 5 տարվա համար նախատեսել ենք, իրականացնում ենք, արդեն իսկ 1 տարի է՝ աշխատում ենք այդ անելիքները կյանքի կոչելու համար»,- շարունակեց Մարգարյանը:

Երևանի քաղաքապետը գտնում է, որ նախորդ պաշտոնավարման ժամանակ էլ իրենք արդարացրել են քաղաքացու վստահությունը, ինչի ապացույցն այն է, որ երևանցին կրկին իր վստահության քվեն վստահեց իրենց: Քաղաքապետը, խոսելով իր  հրաժարականը պահանջող քաղաքացիների գործողությունների մասին, շեշտեց, թե ինքը դատապարտում է կատարվածը:

«Հստակ երևում է, որ օրենքի խախտում է եղել, ակտիվիստները ներխուժել են քաղաքապետարան՝ փորձելով խանգարել քաղաքապետարանի բնականոն աշխատանքը: Կոչ եմ անում իրավապահ մարմիններին զբաղվել այս հարցով: Տեղական ինքնակառավարման մարմինն անկախ է, մենք մեր աշխատանքներն ենք իրականացնում ու նման անօրինականություն չենք հանդուրժի: Իրավապահ մարմինները պետք է այս հարցը քննության տակ առնեն»,- ընդգծեց քաղաքապետը:

Տարոն Մարգարյանն անդրադարձավ նաև Ալեքսանդր Մյասնիկյանի արձանի հետևում գտնվող այգու բարեկարգման հետ կապված դժգոհություններին: Նա հիշեցրեց, որ այգին 10 տարի է, ինչ վարձակալությամբ էր տրված, և շնորհակալություն հայտնեց վարձակալին տարածքը քաղաքապետարանին վերադարձնելու համար: Նրա խոսքով՝ այգին «Վարդանյան ընտանիք» հիմնադրամի կողմից նվեր է Երևանի 2800 -ամյակի կապակցությամբ:

«Այգում իրականացվում են բարեկարգման աշխատանքներ, աշխատանքներն իրականացվում են արդեն մի քանի ամիս: Խնդրել եմ Վարդանյան ընտանիքին լրատվամիջոցներով ներկայացնել ամբողջ ծրագիրը: Վստահեցնում եմ՝ այգին առևտրային, սրճարանային տարածքի չի հատկացվելու, պատկանելու է Երևան քաղաքին: Ծառերի հատում եղել է, բայց եղել է մասնագիտական եզրակացություններով, կանաչ տարածքն ավելանալու է»,- ընդգծեց Տարոն Մարգարյանը:

Ինչ վերաբերում է իր հրաժարականի պահանջին, քաղաքապետն ասաց, թե աշխարհում ընդունված չէ, որ երբ մի քաղաքական ուժ գալիս է իշխանության, ապա ՏԻՄ մարմինը փոխվի:

 

Գրեք մեկնաբանություն և եղեք ակտիվ
By | 2018-05-16T19:30:07+00:00 Մայիսի 16 19:30|Քաղաքականություն|0 Comments
//
//