Բաժին : Լուրեր
Թուրքիան չի պարտադրի սիրիացի փախստականներին հեռանալ երկրից. Չավուշօղլու
Անկարան չի պարտադրի սիրիացի փախստականներին հեռանալ Թուրքիայից: Այդ մասին հայտարարել է Թուրքիայի արտգործնախարար Մևլութ Չավուշօղլուն, գրում են թուրքական ԶԼՄ-ները:
Չավուշօղլուի խոսքով՝ սիրիացի փախստականները կվերադառնան «ահաբեկիչներից ազատագրված» Աֆրին կամավոր կերպով:
Արտգործնախարարը նշել է, որ չնայած նրան, որ «Աֆրինն ամբողջությամբ ազատագրվել է», քաղաքի ենթակառուցվածքները ոչնչացված են: Ըստ նրա՝ Թուրքիան առաջին հերթին կանցնի Աֆրինի ենթակառուցվածքների վերականգնմանը:
Հիշեցնենք, որ մարտի 18-ին Թուրքիայի զինված ուժերը և «Սիրիայի ազատ բանակ» խմբավորումը հայտարարել են Աֆրինի նկատմամբ լիարժեք վերահսկողություն սահմանելու մասին:
Թուրքիայի զինված ուժերի գլխավոր շտաբը հունվարի 20-ին հայտարարել էր սիրիական Աֆրին քաղաքում քրդական ջոկատների դեմ «Ձիթենու ճյուղ» գործողությունը սկսելու մասին:
Դամասկոսը դատապարտել է Թուրքիայի գործողությունները՝ նշելով, որ Աֆրինը Սիրիայի անբաժանելի մասն է: