Բաժին : Լուրեր
Երկրի տնտեսական աճը չի կարող մարդկանց կենսամակարդակի վրա անմիջապես ազդեցություն թողնել. Խոսրով Հարությունյան
Ազգային ժողովի պատգամավոր Խոսրով Հարությունյանը կարծում է, որ պետք չէ սպասել, որ երկրի տնտեսական աճն անմիջապես պետք է իր ազդեցությունն ունենա մարդկանց կենսամակարդակի վրա:
Նա այս մասին ասաց լրագրողների հետ զրույցում՝ պատասխանելով հարցին, թե ՀՀ ազգային վիճակագրական ծառայության հրապարակված տվյալների համաձայն՝ նախորդ տարի Հայաստանում գրանցված 7,5% տնտեսական աճը, արդյոք, ազդեցություն ունեցե՞լ է մարդկանց կենսամակարդակի վրա:
«Սա մենք համեմատում ենք 2016 թվականի աճի հետ, որը կազմել է 0,2 տոկոս, այսինքն՝ առաջին հայացքից այս տպավորիչ տնտեսական աճի բազան այդուհանդերձ բավական համեստ էր. ենթադրել, որ այս տնտեսական աճն իր ազդեցությունն անմիջապես պետք է թողներ կենսամակարդակի բարձրացման վրա, խիստ վիճելի է»,-ասաց նա:
Պատգամավորը ուշադրություն դարձրեց եւս մեկ հանգամանքի վրա, որ մեր աշխատող բնակչության 71-72 տոկոսը մինչև 150 000 դրամ աշխատավարձ ստացող մարդիկ են, և նրանց եկամուտների վրա այդ աճը շոշափելի չի կարող լինել: «Այսինքն՝ ամեն դեպքում չափազանցված կլիներ ենթադրել, որ այդ տնտեսական աճը միանգամից կարող էր ազդեցություն ունենալ: Մյուս կողմից՝ այն մի բան երաշխավորում է, որ գոնե կենսամակարդակի անկում չի արձանագրվել, ինչն արդեն իսկ դրական է: Եթե առաջիկա երկու-երեք տարիներին հաջողվի զարգացման այս տեմպերը պահել, կունենանք շոշափելի ազդեցություն կենսամակարդակի վրա»,-ասաց նա:
Փետրվարի 28-ին ՀՀ ազգային վիճակագրական ծառայությունը հրապարակեց 2017 թվականի համախառն ներքինարդյունքի աճի ցուցանիշը՝ 7.5 տոկոս: Վերջին 10 տարում այն ամենաբարձրն է: ՀՆԱ երկնիշ աճ արձանագրվել է2002-2007 թվականներին` միջինում 13 տոկոս: Համաձայն ԱՎԾ տվյալների` 2017 թվականին համախառն ներքինարդյունքը բացարձակ արժեքով կազմել է 5 տրիլիոն 580 միլիարդ 116.9 միլիոն դրամ: