Իրանի նախագահը խոստացել է կոշտ պայքար մղել կոռուպցիան արմատախիլ անելու համար
Կոռուպցիա22:09 | նոյեմբերի 14, 2026Իրանի նախագահը խոստացել է կոշտ պայքար մղել կոռուպցիան արմատախիլ անելու համար
լսել հոդվածըԿիսվել
նախընտրելի դարձնել
<!—>]—>
Իրանի նախագահ Մասուդ Փեզեշքիանը հայտարարել է կոռուպցիայի, կաշառակերության և պետական ռեսուրսներից արտոնյալ օգտվելու միջոցով ապօրինի եկամուտներ ստանալու դեմ պայքարելու՝ իշխանությունների վճռականության մասին, հայտնել է Tasnim-ը։
Նա խոստացել է խիստ միջոցներ ձեռնարկել օրինախախտների նկատմամբ և վերացնել նման չարաշահումների կրկնությանը նպաստող պատճառները։
Շաբաթ օրը Թեհրանում պետական աջակցության հասցեական բաշխմանը նվիրված խորհրդակցության ժամանակ Փեզեշքիանն ընդգծել է կոռուպցիայի նկատմամբ առավել խոցելի ոլորտները բացահայտելու և չարաշահումների համար պայմաններ ստեղծող համակարգային խոչընդոտները վերացնելու անհրաժեշտությունը։ Նա կոչ է արել հատուկ ուշադրություն դարձնել առողջապահության ոլորտին, դատական համակարգին, մաքսային ծառայությանը և պետական ղեկավարների աշխատանքին։
Նախագահը պահանջել է արագ և վճռականորեն կասեցնել նրանց գործողությունները, ովքեր կաշառք են վերցնում դատական գործերով ապօրինի միջամտությունների դիմաց, ապօրինաբար գումար են շորթում հիվանդներից կամ վարձատրության դիմաց աչք են փակում խախտումների վրա։
Փեզեշքիանի խոսքով՝ պետության նկատմամբ քաղաքացիների դժգոհություններից շատերը կապված են հենց նման չարաշահումների և տնտեսական կոռուպցիայի հետ։ Նա վստահեցրել է, որ կառավարությունը մտադիր է առանց ներողամտության հակազդել այդ երևույթներին և վերացնել դրանց արմատական պատճառները։
Պետության ղեկավարն ընդգծել է, որ բավարար չէ միայն մեղավորներին բացահայտելը. անհրաժեշտ է հասնել նրան, որ օրինախախտներն իրականում պատասխանատվության ենթարկվեն, և կիրառել նոր հանցագործությունները կանխելու ունակ միջոցներ։ Նրա կարծիքով՝ արդյունավետ և անխուսափելի պատիժը թույլ կտա զգալիորեն կրճատել կաշառակերության, կոռուպցիայի և տնտեսական այլ իրավախախտումների ծավալները։
Փեզեշքիանն առանձին անդրադարձել է երկրի տնտեսության կառավարման գործում էկոնոմիկայի և ֆինանսների նախարարության դերին։ Նա նախարարին ասել է, որ կառավարության վճռականությունը կարող է օգնել տնտեսական համակարգը մաքրել կոռուպցիայից, կաշառակերությունից և արտոնությունների հաշվին ապօրինի հարստացումից։
Նախագահը նաև ողջունել է հարկերի վճարումից խուսափելու հետևանքով կորցրած զգալի գումարների վերադարձի և անբարեխիղճ տնտեսական գործարքները կանխելու միջոցառումների մասին հաղորդումները։ Նա իշխանություններին կոչ է արել հանրությանն ուղիղ տեղեկացնել հակակոռուպցիոն աշխատանքի արդյունքների մասին։
Հասանելի է
Թեմա
Տեղադրություն
Անձ
Աղբյուրը՝ NEWS.am
