Դաշնային պահուստային համակարգի որոշումից հետո Ուոլ սթրիթը փակվել է աճով
Կենտրոնական բանկեր10:40 | հոկտեմբերի 29, 2026Դաշնային պահուստային համակարգի որոշումից հետո Ուոլ սթրիթը փակվել է աճով
լսել հոդվածըԿիսվել
նախընտրելի դարձնել
<!—>]—>
ԱՄՆ ֆոնդային ինդեքսները չորեքշաբթի օրվա սակարկություններն ավարտել են աճով. ներդրողները գնահատում էին ամերիկյան Կենտրոնական բանկի նիստի արդյունքները, ինչպես նաև ընկերությունների ֆինանսական ցուցանիշները։
ԱՄՆ Դաշնային պահուստային համակարգը (ԴՊՀ), ինչպես և սպասվում էր, անփոփոխ թողեց հիմնական տոկոսադրույքը՝ տարեկան 3,75-4% մակարդակում։ Որոշմանը կողմ են քվեարկել Բաց շուկայի գործառնությունների դաշնային կոմիտեի (FOMC) 12 անդամներից 10-ը, իսկ երկուսը հանդես են եկել տոկոսադրույքը 25 բազիսային կետով բարձրացնելու օգտին։
«Գնաճը դեռևս բարձր է։ Լրացուցիչ տեղեկատվությունը կօգնի FOMC-ին սահմանել այնպիսի դրամավարկային քաղաքականություն, որը նպատակահարմար կլինի գնաճը ժամանակին 2% թիրախային ցուցանիշին վերադարձնելու համար: FOMC-ն կապահովի գների կայունությունը», – նշված է ԿԲ-ի հայտարարության մեջ։
ԴՊՀ-ի ղեկավար Քևին Ուորշը նիստի արդյունքներն ամփոփող մամուլի ասուլիսի ժամանակ ընդգծել է, որ ԱՄՆ-ում գնաճը դեռևս «չափազանց բարձր է», մինչդեռ գների կայունացումը շարունակում է մնալ կարգավորողի առաջնահերթությունը։
«ԴՊՀ-ի նիստը ոչ մի անակնկալ չմատուցեց։ Սպասվում էր, որ նրանք անփոփոխ կթողնեն տոկոսադրույքը, այնպես որ ոչ մի անսպասելի բան չեղավ», – նշել է Carson Group-ի գլխավոր շուկայական ստրատեգ Ռայան Դեթրիկը։
Շուկայի մասնակիցները դեռևս ակնկալում են, որ դեկտեմբերին Դաշնային պահուստային համակարգը կխստացնի դրամավարկային քաղաքականությունը։ Դեկտեմբերի 8-9-ը կայանալիք նիստում փոխառությունների արժեքի բարձրացման հավանականությունը գնահատվում է 79,4%՝ համաձայն CME FedWatch-ի տվյալների։
Շուկայի կանխատեսումները կարող են փոխվել հինգշաբթի օրը հրապարակվելիք ամերիկացիների ծախսերի և եկամուտների վերաբերյալ սեպտեմբերյան զեկույցից հետո, որը ներառում է PCE և Core PCE ինդեքսները, որոնց ԴՊՀ-ն ուշադրություն է դարձնում գնաճային ռիսկերը գնահատելիս։ Նույն օրը կհրապարակվի նաև երրորդ եռամսյակում ԱՄՆ-ի ՀՆԱ-ի փոփոխության նախնական գնահատականը։
S&P 500-ի բաղադրիչների շրջանում աճի առաջատարը Vertiv-ն էր (+16,5%)։ Թվային ենթակառուցվածքների ոլորտում լուծումներ տրամադրող ընկերությունը բարելավել է շահույթի և հասույթի տարեկան կանխատեսումը՝ եռամսյակային ուժեղ արդյունքների ֆոնին։
Հարավկորեական SK Hynix-ի հաշվետվությունը, որը հուլիս-սեպտեմբեր ամիսներին բազմապատկել է զուտ շահույթն ու հասույթը, դրական է ազդել ամերիկյան չիպ արտադրողների վրա. Micron Technology-ի բաժնետոմսերը թանկացել են 5,9%-ով, Marvell Technology-ինը՝ 3,3%-ով, Advanced Micro Devices-ինը՝ 3,2%-ով, իսկ Intel Corp.-ինը՝ 1,9%-ով։ Միևնույն ժամանակ, Nvidia Corp.-ի արժեթղթերն էժանացել են 1,2%-ով։
Etsy-ի գնանշումներն աճել են 5,4%-ով։ Առցանց առևտրի հարթակը երրորդ եռամսյակում ավելացրել է հասույթը 11%-ով և գրանցել փորձագետների սպասումները գերազանցող շահույթ։ Բացի այդ, վերջին երկու տարվա ընթացքում առաջին անգամ ավելացել է նրա հարթակի ակտիվ գնորդների թիվը։
Նավթավերամշակող Phillips 66 ընկերության բաժնետոմսերը թանկացել են 2%-ով։ Նախորդ եռամսյակում ընկերության զուտ շահույթը հասել է ռեկորդային 5,6 մլրդ դոլարի՝ նախորդ տարվա 133 մլն դոլարի դիմաց, իսկ ճշգրտված ցուցանիշը գերազանցել է վերլուծաբանների կանխատեսումը։
Alphabet Inc.-ի շուկայական արժեքն աճել է 1,3%-ով՝ լրատվամիջոցների այն հրապարակումներից հետո, թե OpenAI-ը ծրագրում է արհեստական բանականության չիպեր գնել Google-ից:
Wendy’s-ի գնանշումները թռիչքաձև աճել են 15,2%-ով այն լուրերի ֆոնին, որ ամերիկյան Trian Fund Management հեջ-ֆոնդի գլխավորած ներդրողների կոնսորցիումն առաջարկել է գնել արագ սննդի ռեստորանների ցանցը մոտ 1,4 մլրդ դոլարով։
Նավթային ծառայություններ մատուցող Baker Hughes ընկերության կապիտալիզացիան նվազել է 7,4%-ով, թեև նախորդ եռամսյակում նրա ճշգրտված շահույթն ու հասույթը գերազանցել են շուկայի սպասումները։
Boston Scientific-ի բաժնետոմսերն էժանացել են 5,8%-ով։ Բժշկական սարքավորումներ արտադրող ընկերությունը երրորդ եռամսյակում նվազեցրել է զուտ շահույթը, ինչպես նաև վատթարացրել է տարեկան կանխատեսումը։
GE Vernova-ի արժեթղթերի գինը նվազել է 1,9%-ով այն բանից հետո, երբ ընկերությունը հայտարարեց բարձրավոլտ սարքավորումներ արտադրող Trench Group-ը 9 մլրդ դոլարով գնելու մասին։
Կենսատեխնոլոգիական Biogen-ի շուկայական արժեքը նվազել է 3,4%-ով, իսկ վճարային համակարգի օպերատոր Visa Inc.-ինը՝ 0,3%-ով՝ չնայած նրանց ուժեղ եռամսյակային արդյունքներին:
Robinhood Markets-ի գնանշումները նվազել են 3,3%-ով։ Ֆոնդային և կրիպտոարժույթների շուկաներում առևտրի հանրաճանաչ հարթակի օպերատորը 2026 թվականի երրորդ եռամսյակում զուտ շահույթը կրճատել է 16%-ով՝ չնայած հասույթի աճին։
Apple Inc.-ի կապիտալիզացիան, որը չորեքշաբթի ներկայացրել էր առաջին սենսորային էկրանով MacBook-ը, նվազել է 0,9%-ով։
Dow Jones Industrial Average ինդեքսն աճել է 0,19%-ով՝ հասնելով 52475,1 կետի։
Standard & Poor’s 500-ի արժեքը բարձրացել է 0,28%-ով՝ հասնելով 7743,98 կետի։
Nasdaq Composite ինդեքսն ավելացել է 0,27%-ով և փակվել 26549,85 կետի վրա։
Հասանելի է
Թեմա
Կենտրոնական բանկերՏնտեսությունՖոնդային շուկա
Տեղադրություն
Աղբյուրը՝ NEWS.am
