Արթուր Ավանեսյանի (Կանդազ) գործով մեղադրյալը հայտարարել է, որ իրեն հարցաքննել են առանց փաստաբանի
Հակակոռուպցիոն դատարանում դատավոր Սարգիս Դադոյանի նախագահությամբ շարունակվեց Արթուր Ավանեսյանի (Կանդազ) գործով դատական նիստը:
Հարցաքննվեց գործով անցնող մեղադրյալ Գեղամ Զաքարյանը, որը երկար տարիներ եղել է ՊԲ զինծառայող:
«Հեռուստացույցով տեսել եմ, որ Արթուր Ավանեսյանը միացել է «Ուժեղ Հայաստան»-ին, ուրախացել եմ, զանգել եմ իրեն շնորհավորել եմ: Ցանկանում էի օգտվել 300 000 աշխատատեղից, որովհետև իմ վիճակը ծայրահեղ ծանր է»,-ասաց նա:
Անդրադառնալով վարույթում առկա իր և Արթուր Ավանեսյանի հեռախոսազրույցին, ասաց, որ միայն աջակցելու նպատակ է ունեցել Ավանեսյանին:
Հարցին, թե արդյոք եղե՞լ է, որ իրեն ասեն` ընտրեք մեզ, այս-այս բաները կանենք ձեզ համար, վկան ասաց` չի եղել:
Գործով անցնող Գեղամ Զաքարյանն ասաց, որ, եթե նույնիսկ այդ հեռախոսազանգը չլիներ, ինքը միևնույն է սատարելու էր Արթուր Ավանեսյանին:
«Եթե գիտեիք, որ պետությունը բնակապահովման ծրագիր ունի, ինչո՞ւ էիք ցանկանում «Ուժեղ Հայաստանին» սատարել այդ նպատակով»,- հարցրեց հանրային մեղադրողը:
Գեղամ Զաքարյանն ասաց, որ իր ենթադրությունն է եղել, որ գուցե ավելի մատչելի պայմաններով հնարավոր լինի բնակարան ձեռք բերել:
Հանրային մեղադրողը հարցրեց, թե ինչու՞ Արթուր Ավանեսյանի հետ խոսակցության ժամանակ նա ծրագրից որևէ հարց չի տվել, մեղադրյալն ասաց, որ չգիտի:
Հանրային մեղադրողի հարցին ի պատասխան Գեղամ Զաքարյանն ասաց, որ քննիչը թույլ չի տվել, որ փաստաբան ներգրավվի և առանց փաստաբանի իրեն հարցաքննել են ու ինքը այդ հարցաքննությունից ոչինչ չի հիշում, քանի որ լարված իրավիճակում է եղել:
«Ես մտածել եմ, որ ձայն տամ, իրենք կանցնեն, մի օր էլ լավ կլինի արցախցիների համար»,-ասաց մեղադրյալ Գեղամ Զաքարյանը:
Դատական նիստն ավարտվեց, դատավորը հայտարարեց, որ դատարանը ևս հարցեր ունի և հարցաքննությունը շարունակվելու է հաջորդ դատական նիստին:
Աղբյուր՝ 24News.am
