Մինչև Հայաստանում հերթական ընտրությունները, այսինքն՝ մինչև այս տարվա հունիս, մենք կարող ենք խաղաղության պայմանագիր կնքել. ադրբեջանցի պատգամավոր
Մինչև Հայաստանում հերթական ընտրությունները, այսինքն՝ մինչև այս տարվա հունիս, մենք կարող ենք խաղաղության պայմանագիր կնքել: Այս մասին Միլլի Մեջլիսի այսօրվա նիստում հայտարարել է Ադրբեջանի պատգամավոր Գուդրաթ Հասանգուլիևը:
Նրա խոսքով՝ դրա համար Հայաստանը պետք է պարտավորություն ստանձնի, որ իր նոր Սահմանադրության մեջ «տարածքային պահանջներ» չեն լինի Ադրբեջանի նկատմամբ:
«Մեր օրենսդրության համաձայն՝ Հայաստանի և Ադրբեջանի միջև պատերազմը ճանաչվում է որպես Հայրենական պատերազմ։ Հետևաբար, Սահմանադրության համաձայն, խաղաղության պայմանագիր ստորագրելու համար անհրաժեշտ է Միլլի Մեջլիսի համաձայնությունը։ Խաղաղության պայմանագիրը նախաստորագրվել է անցյալ օգոստոսին։ Այն պետք է քննարկվի խորհրդարանում։ Ես առաջարկում եմ այս հարցը ներառել գարնանային նստաշրջանի աշխատանքային ծրագրում։
Ներկայումս Հայաստան բեռները տեղափոխվում են Ադրբեջանի միջոցով։ Ադրբեջանը վառելիք է վաճառում Հայաստանին։ Եթե Հայաստան բեռները տեղափոխվում են Ադրբեջանի միջոցով, ապա կարծում եմ, որ Ադրբեջան բեռները նույնպես կարող են տեղափոխվել Հայաստանի միջոցով։ Մենք կարող ենք վերականգնել Ադրբեջանը Հայաստանի հետ կապող երկաթուղային գիծը, այդ թվում՝ Սադարակ-Երևան երկաթուղին։ Թուրքիայի և Հայաստանի միջև մինչև մարտ ամիսը ճանապարհների բացման հարցը նույնպես քննարկվում է։
Նախիջևանի զարգացումը արագացնելու համար բեռները պետք է Նախիջևան տեղափոխվեն երկաթուղով, և մենք պետք է Նախիջևան բեռներ տեղափոխենք Հայաստանի միջոցով։ Ես կարծում եմ, որ կառավարությունը պետք է որոշակի քայլեր ձեռնարկի այս ուղղությամբ»,-ասել է պատգամավորը:
