Հայաստանից 4 բռնցքամարտիկ կմեկնի Բուլղարիա` մասնակցելու Ստրանջայի մրցաշարին

Հայաստանի բռնցքամարտի տղամարդկանց և կանանց հավաքականները նախապատրաստվում են Օլիմպիական խաղերի վարկանիշային մրցաշարերին:

Այդ մասին հայտնում է Հայաստանի Բռնցքամարտի ֆեդերացիան:

Հայաստանի բռնցքամարտի տղամարդկանց և կանանց հավաքականները` Կարեն Աղամալյանի և Խաչիկ Խաչատրյանի գլխավորությամբ ֆիզպատրաստության հավաք են սկսել Ծաղկաձորում, որը կտևի մինչև փետրվարի 12-ը։ Տղաների հավաքին մասնակցում է 24, իսկ կանանց հավաքին՝ 5 բռնցքամարտիկ։

Ծաղկաձորյան հավաքին կհետևի ևս մեկ ուսումնամարզական հավաք` արդեն Օլիմպավանում։

Այս օրերին Հայաստանի 4 բռնցքամարտիկ Արթուր Մելքումյանի գլխավորությամբ կմեկնի Բուլղարիա` մասնակցելու Ստրանջայի մրցաշարին։