Հայաստանում անշարժ գույքի նվիրատվությունների գործարքները կտրուկ աճել են, ինչը ռիսկեր է պարունակում․ փոխնախարար

Այս մասին  ԱԺ-ում  հայտնեց Արդարադատության փոխնախարար Արա Մկրտչյանը:

«Նվիրատվության գործարքների անընդհատ աճը պարունակում է հիմնավոր ռիսկեր առ այն, որ դրանց թվում կարող են լինել այնպիսի գործարքներ, որոնք նպատակ ունեն թաքցնելու ապօրինի ճանապարհով ձեռք բերված գույքն ու, այսպես ասած, այն օրինականացնելու»,-ներկայացրեց  փոխնախարարը:

Մկրտչյանի խոսքով՝  «Փողերի լվացման և ահաբեկչության ֆինանսավորման դեմ պայքարի մասին» օրենքում փոփոխություն և լրացում կատարելու մասին օրենքի նախագիծը նպատակ ունի Հայաստանում նոտարների և Կադաստրի կոմիտեի համար նվիրատվությունների մասով ԿԲ-ին հաշվետվություններ ներկայացնելու պարտականություն սահմանել:

Օրինագծի քննարկման ժամանակ նիստը վարող ԱԺ փոխնախագահ Հակոբ Արշակյանն էլ արձագանքեց՝  այնպես չէ, որ  եթե որևէ մեկն ապօրինի գույք ունի, նվիրատվությամբ մաքրվելու է։