Բաժին : Մեկնաբանություն
Մանվելը վարդեր չպիտի նվիրեր, նա պետք է ներողություն խնդրի ու հրաժարական տա. «Հայաստան» խմբակցության պատգամավորը` Քաջարանի համայնքապետի մասին
«Հայաստան» խմբակցության պատգամավոր Գեղամ Նազարյանը ֆեյսբուքյան էջում անդրադարձել է Քաջարանի քաղաքապետ Մանվել Փարամազյանի՝ Աննա Հակոբյանին վարդերով դիմավորելու թեմայի շուրջ ծավալված քննարկումներին․
«Մանվելը, մեղմ ասած, կոպիտ սխալ է արել ոմն մեկին վարդեր նվիրելով։ Ոչ միայն վարդ չպետք է նվիրեր, այլ չպետք է հանդիպեր։
Մանվելից առավել կոպիտ վրիպում են թույլ տվել այն լրատվամիջոցները, որոնք գրել են, թե ոմն մեկը Սյունիք այցի շրջանակներում ժամանել է Քաջարան։
Լրատվամիջոցներ, դուք սթա՞փ եք։ Դուք ձեզ հարց չեք տալիս, թե նա ո՞վ է, որ այցով ժամանում է այստեղ կամ այնտեղ։
Հանրություն, դուք սթա՞փ եք, որ Մանվելին քննադատում եք վարդեր նվիրելու համար, բայց չեք աղաղակում, ասելով, թե նա ո՞վ է, որ այցով ինչ որ մի տեղ գնա։
Ֆեյսբուքում Մանվելին քննադատողներ, դուք եւս ոչ մի տարօրինակ բան չեք տեսնում, որ ինչ որ մի կին կարող է ձեր հաշվին այցեր կազմակերպել։
Մանվելը սխալ չի արել վարդեր նվիրելով, հանդիպելով նրան, նա ծանր վիրավորանք է հասցրել այդ նույն վարդերն իրենց զոհված որդիների շիրիմներին դնող արժանապատիվ ծնողներին, որոնք հասկանում են, թե Մանվելից վարդեր ստացածը ինչ դերակատարում է ունեցել 44 օրյա պատերազմում։ Գիտեմ, հիմա կասեք ինչ դերակատարում։ Միայն Էրատո անվանումով կրկեսային ներկայացումը բավարար կլիներ, բայց ցավոք միայն դա չէ։
Մանվելը պետք է ներողություն խնդրի եւ հրաժարական տա։ Սա քննարկման ենթակա չէ, բայց քաղաքականությունից եւ քաղաքամերձ իրականությունից պետք է չքվեն բոլոր նրանք, ովքեր իրար հերթ չտալով դնում են վարդերի նվիրման լուսանկարը ու գրում, թե ընդդիմությունը կամ Հայաստանը պարտվեց նիկոլիզմին։
Ծոծրակիդ վրա աչքեր կտեսնեք, բայց Հայաստանի պարտությունը նիկոլիզմին չեք տեսնի, իրական ընդդիմության պարտությունը չեք տեսնի։
Ես գիտեմ, դուք երազում եք, որ իրական ընդդիմությանը, նիկոլիզմի եւ դրա դրսեւորումների դեմ պայքարող ընդդիմությանը վարկաբեկեք ու հետո սպիտակ ձիու վրա նստած սպիտակ շլվարով գաք ու վերցնեք իշխանությունը։ Մոռացեք։ Չի լինելու նման բան։ Նիկոլի հետ միասին դուք եւս հեռանալու եք։
Իսկ Մանվելը այդ ծաղիկները չպետք է նվիրեր, քանի որ չպետք է հանդիպեր, եւ պետք է հրաժարական տա, չմոռանալով ներողություն խնդրել»
