Ժամը 16։00-ին դատարանը կհրապարակի ԱԺ պատգամավոր Արմեն Չարչյանի խափանման միջոցի փոփոխության վերաբերյալ որոշումը

Երևանի ընդհանուր իրավասության դատարանը «Հայաստան» խմբակցության  պատգամավոր, պրոֆեսոր Արմեն Չարչյանի խափանման միջոցի հարցով որոշումը կհրապարակի այսօր 16։00-ին։ Նշենք, որ Չարչյանը այս պահին կալանավորված է:  

 

Արտահերթ դատական նիստի ընթացքում քննարկվում էր Արմեն Չարչյանի  պաշտպանների միջնորդությունը նրան անհապաղ ազատ արձակելու վերաբերյալ։

Պաշտպան Էրիկ Ալեքսանյանը դատարանին ներկայացրեց ՍԴ-ի՝ երեկ հրապարակված որոշումը պատգամավորների անձեռնամխելիության վերաբերյալ:

 

«ՍԴ-ն վճռել է, որ անազատության մեջ գտնվող անձը պատգամավորի կարգավիճակ ստանալուց հետո չի կարող պահվել անազատության մեջ։ Ուստի խնդրում եմ անհապաղ գնալ խորհրդակցական սենյակ և որոշում կայացնել»,-ասաց նա։

Թեև դատախազը դատական նիստին ներկա չէր, բայց նախագահող դատավոր Վահե Միսակյանն ասաց, որ նույն դիրքորոշումն է արտահայտել։

Հիշեցնենք, որ Արմեն Չարչյանին մեղադրանք է առաջադրվել՝ ՀՀ ՔՕ 154.2-րդ հոդվածի 4-րդ մասի 2-դ կետի հատկանիշներով՝ ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը։

Նա մեղադրանքը չի ընդունում, նրա պաշտպանները պնդում են, որ պատգամավորն  ապօրինի է կալանավորված:

Մեկնաբանություններ
Լրահոս
Loading...
End of content.
No more posts to load.