Բաժին : Աշխարհ/Տարածաշրջան
Ստոլտենբերգը ՌԴ-ին կոչ է արել նվազեցնել լարվածությունը Ուկրաինայի սահմանի մոտ
Հյուսիսատլանտյան դաշինքի գլխավոր քարտուղար Ենս Ստոլտենբերգը Ռուսաստանի Դաշնությանը կոչ է արել նվազեցնել լարվածությունը Ուկրաինայի սահմանի մոտ։
Ինչպես հաղորդում է UNIAN-ի թղթակիցը, այս մասին Ստոլտենբերգն ասել է Բրյուսելում՝ Լեհաստանի նախագահ Անջեյ Դուդայի հետ համատեղ մամուլի ասուլիսում։
«Մենք տեսնում ենք ուժերի մեծ և անսովոր կենտրոնացում (Ուկրաինայի սահմանին՝ Խմբ.)՝ զուգորդված Մոսկվայի ագրեսիվ հռետորաբանությամբ և ապատեղեկատվությամբ: Ուստի մենք Ռուսաստանին կոչ ենք անում բաց լինել, նվազեցնել լարվածությունը և իրականացնել ապաէսկալացիա»,- ասել է Ստոլտենբերգը:
Նա ասել է, որ ՆԱՏՕ-ն զգոն է և շարունակում է քաղաքական և գործնական աջակցություն ցուցաբերել Ուկրաինային: Ստոլտենբերգն ընդգծել է, որ Ուկրաինային աջակցությունը վտանգ չի ներկայացնում Ռուսաստանի Դաշնության համար։
«Սա օգնում է Ուկրաինային պաշտպանվել ագրեսիայից»,- ընդգծել է գլխավոր քարտուղարը։
Ստոլտենբերգը հայտնել է նաև, որ հաջորդ շաբաթ Ռիգայում տեղի կունենա ՆԱՏՕ-ի անդամ երկրների արտգործնախարարների հանդիպումը, որոնք կգնահատեն անվտանգության իրավիճակը և կհանդիպեն Ուկրաինայի և Վրաստանի ԱԳ նախարարների հետ։
«Սա մեր աջակցության ևս մեկ ուժեղ վկայություն է», - հավելել է նա։
