Բաժին : Աշխարհ/Տարածաշրջան
ՌԴ-ն մեծ հեռահարության X-95 նորագույն ավիացիոն գերձայնային թրթիռ է մշակում
Ռուսաստանում մեծ հեռահարության X-95 նորագույն ավիացիոն գերձայնային թրթիռ են մշակում: Այդ մասին, ինչպես տեղեկացնում է «Արմենպրես»-ը, Գլխավոր շտաբի ռազմական ակադեմիայի պետ գեներալ-գնդապետ Վլադիմիր Զարուդնիցկին հայտնել է «Ռազմական միտք» հանդեսի համար հոդվածում:
Մարտական գործողությունների հաջող վարման կարևորագույն պայմանը նա համարում է գերիշխելը օդատիեզերական ոլորտում, իսկ այն ապահովել կարելի է հարվածային և կործանիչ ավիացիայի արդյունավետ կիրառման հաշվին:
«Այդ նպատակներով Օդատիեզերական ուժերի համար մշակվում և սպառազինման են ընդունվում այնպիսի նոր և արդիականացված սպառազինության նմուշներ, ռազմական և հատուկ տեխնիկա, ինչպիսիք են ռազմավարական Տու-160Մ հրթիռակիր-ռմբակոծիչը, «Դաշույն» ավիացիոն գերձայնային հրթիռային համալիրը, մեծ հեռահարության օդային բազավորման գերճշգրիտ զենքը, մասնավորապես X-95 գերձայնային հրթիռը»,-գրում է Զարուդնիցկին:
Բացի այդ, նա հավելել է, որ ստեղծվում են անօդաչու սարքեր, հորիզոնական հայտնաբերման ռադիոտեղորոշիչ կայաններ, զենիթային հրթիռային համակարգեր, նորագույն այլ ռազմական տեխնիկա:
Փետրվարին ՌԴ պաշտպանության նախարար Սերգեյ Շոյգուն հայտարարել էր, որ տարբեր բազավորման գերձայնային համալիրները կդառնան ոչ միջուկային զսպման ռուսաստանյան ուժերի հիմքը:
