Բաժին : Իրավունք
Հետպատերազմական ժամանակաշրջանում պետությունը պետք է ավելի մեծ ջանքերով երաշխավորի հաշմանդամություն ունեցող անձանց իրավունքները․ Հայաստանի մարդու իրավունքների պաշտպանի ուղերձը
Հայաստանի մարդու իրավունքների պաշտպան Արման Թաթոյանն ուղերձ է հղել հաշմանդամություն ունեցող անձանց միջազգային օրվա առթիվ։ Ուղերձում, մասնավորապես, ասվում է․
Հաշմանդամություն ունեցող անձինք մեր հասարակության լիիրավ անդամներն են: Նրանց նկատմամբ հարգանքի, արժանապատիվ կյանքի և ներառական միջավայրի ապահովումը պետք է լինի մեր պետության գլխավոր առաջնահերթությունների թվում: Նրանց իրավունքների ապահովումը ոչ թե պետության կամ պաշտոնյայի բարեգթության դրսևորում է, այլ ուղիղ պարտավորություն: Հաշմանդամություն ունեցող անձանց նկատմամբ հարգանքը և արժանապատիվ վերաբերմունքը պետք է լինի հանրության հետ պետության բոլոր հաղորդակցությունների հիմքում:
Ցավոք, այս պատերազմն ավելացրեց մեր այն հայրենակիցների թիվը, ովքեր ստացել են հաշմանդամություն։ Դա էլ իր հերթին առավել արդիական դարձրեց նրանց կարիքների, այդ թվում՝ խնամքի ծառայությունների, սոցիալական աջակցության, հասարակություն վերաինտեգրվելու խնդիրների արագ արձագանքման ապահովման հրամայականը։
Մարդու իրավունքների պաշտպանը «Հաշմանդամություն ունեցող անձանց իրավունքների մասին» ՄԱԿ-ի կոնվենցիայի անկախ մարմնի կարգավիճակով շարունակելու է իր լիազորությունների գործադրումը՝ հաշմանդամություն ունեցող մեր հայրենակիցների իրավունքների երաշխավորման նպատակով»։
