Բաժին : Մշակույթ
«Ջիգարխանյանի տանը, հավանաբար, հուշատախտակ կփակցվի. հնարավոր է՝ նրա պատվին փողոցներ կամ թատրոն անվանակոչվեն». Մոսկվայի քաղաքային դումայի ներկայացուցիչ
Մոսկվայի քաղաքային դումայի մշակույթի և զանգվածային հաղորդակցության հարցերով հանձնաժողովի նախագահ, դերասան Եվգենի Գերասիմովը հայտարարել է, որ հայազգի դերասան Արմեն Ջիգարխանյանի տանն, ամենայն հավանականությամբ, հուշատախտակ կփակցվի: Դերասանի ընկերների, գործընկերների, թատրոնի կամ հասարակական կազմակերպությունների ներկայացրած առաջարկների հիման վրա՝ հնարավոր է, որ նրա պատվին որևէ փողոց կամ թատրոն անվանակոչվի, գրում է «ՌԻԱ Նովոստի» գործակալությունը:
«Ցավալի է, որ վերջին տարիներին նա ստիպված էր շատ փորձությունների միջով անցնել: Ջիգարխանյանը հրաշալի դերասան է: Նա իր խաղով առաջ անցավ բոլորից...չկար որևէ դեր, որից նա երբևէ կարող էր ամաչել»,- նշել է Գերասիմովը և հավելել, որ բախտ է ունեցել թատրոնում և անգամ նույն բեմի վրա աշխատել հայազգի դերասանի հետ:
«Հաճույքով նրան էի նայում ներկայացումներում, քանի որ ամեն անգամ նա ինքն իրեն չէր դավաճանում, սակայն ամեն անգամ տարբեր էր ներկայանում: Չեմ պատկերացնում մի դեր, որ նա չկարողանար խաղալ, նա ամեն դեր կարող էր կերտել: Երջանկություն է, որ նրա հետ մի բեմի վրա խաղալու հնարավորություն եմ ունեցել»,- նշել է Գերասիմովը:
Վերջինս կարծում է, որ Ջիգարխանյանն առաջ հերթին մարդկանց հուշերում կմնա որպես ականավոր դերասան:
