Նախնական տվյալներով՝ թուրքերի հարձակումից Ֆրանսիայում տուժել է 10 հայ, այդ թվում՝ կին և երեխա. ականատեսը պատմում է միջադեպի մանրամասները (տեսանյութ)

Ֆրանսիայում այսօր հայերի կողմից կազմակերպված խաղաղ ցույցի ընթացքում հայերի և թուրքերի միջև տեղի ունեցած միջադեպի հետևանքով, նախնական տվյալներով, մոտ տասը հայ է վիրավորվել, որոնց թվում կա նաև կին և երեխա: Վիրավորներից մի քանիսին տեղափոխել են հիվանդանոց: Այս մասին իր ֆեյսբուքյան էջի ուղիղ եթերում տեղեկացրեց ֆրանսաբնակ հայ և ակցիայի մասնակից Ստելլա Դավթյանը:

Ավելի վաղ Tert.am–ը հայտնել էր, որ ֆրանսաբնակ հայերը փակել էին դեպի Վալանս տանող ճանապարհը: Ակցիայի ժամանակ, մինչ հայ ցուցարարները պահանջում էին Ֆրանսիայի նախագահ Էմանուել Մակրոնից և ողջ Եվրոպայից ճանաչել Արցախի անկախությունը և կանգնեցնել պատերազմը, հայերին են մոտեցել թուրքեր և սադրանքի դիմել, մուրճով հարվածներ հասցրել:

Ստելլա Դավթյանը պատմեց, որ մինչ թուրքերի մոտենալը որևէ խնդիր չի եղել ֆրանսիացիների կամ այլ քաղաքացիների հետ: Ակցիայից մոտ 30 րոպե էր անցել, բայց ոստիկանները դեռ չէին հասել ակցիայի վայր, քանի որ խցանում էր, սակայն երբ հակառակ կողմի, դեպի Լիոն գնացող ճանապարհի մեքենաներից դուրս եկան, միանգամից պատերի վրայով թռչելով՝ հայ ժողովրդի վրա են հարձակվել մոտ 5 հոգի: «Մուրճերով, դանակներով, մահակներով, ծառի հաստ ճյուղերով. չգիտեմ՝ թե այլ ինչ զենք ունեին, բայց դրանք հաստատ տեսել եմ: Երեխաս էլ էր մեզ հետ, սթրեսի մեջ է հիմա»:

Ականատեսը պատմեց, որ հայերը ևս հարվածներ են հասցրել, դեպքի վայր ժամանակ ոստիկանները տեսել են օգտագործված մուրճերը, դանակները և մյուս իրերը: Հարձակվողների հեռախոսներց երկուսը ընկել էին գետնին, հայերը վերցրել են, տեսել, որ էկրանների  վրա Թուրքիայի նախագահ Էրդողանի նկարն էր` դրոշով և հեռախոսների մեջ բավականին ինֆորմացիներ են եղել:

«Ոնց հասկացա՝ նրանք ֆրանսերեն գրեթե չէին խոսում, ինձ թվում է՝ նրանք Ֆրանսիայի բնակիչ չէին, հավանաբար՝ կապեր ունեին Թուրքիայի հետ և միջադեպն ամբողջովին  հատուկ պատրաստված է եղել: Միգուցե մեզ հետևել են, կամ չգիտեմ, չեմ կարող հստակ ասել, բայց հաստատ նրանք Ֆրանսիայի կամ Եվրոպայի թուրքերից չէին»,- ասաց նա և հավելեց, որ ոստիկաններն էլ են դա հասկացել, վերցրել են հեռախոսները, իսկ հայերին խնդրել, հորդորել, որ ակցիան դադարեցնեն և գնան տուն:

Ականատեսը նշեց, որ այս ամենը պետք է աշխարհը տեսնի, քանի որ նույնը կարող է մյուս երկրներին սպառնալ:

Մանրամասները՝ տեսանյութում։