Արմավիրի դատարանի նախագահը դատի է տվել Արման Բաբաջանյանին

Արմավիրի մարզի ընդհանուր իրավասության դատարանի նախագահ Հրաչիկ Սարգսյանը հայցադիմում է ներկայացրել՝ ընդդեմ ԱԺ պատգամավոր Արման Բաբաջանյանի՝ զրպարտության համար։ Այս մասին «Փաստինֆո»-ին հայտնի դարձավ «Դատալեքս» դատական տեղեկատվական համակարգից։

Հայցադիմումը դատարան մուտք է եղել մայիսի 26-ին և մակագրվել է Երևանի ընդհանուր իրավասության դատարանի դատավոր Գրիգորի Վարդանյանին։
Նշենք, որ մայիսի 15-ին Արման Բաբաջանյանը ֆեյսբուքյան ուղիղ եթերում անդրադարձել էր «Դոն Պիպոյին» արդարացնելու մասին Հրաչիկ Սարգսյանի կողմից կայացված որոշմանը և դատավորին։ Բաբաջանյանը նշել էր, որ Արմավիրի մարզի ընդհանուր իրավասության դատարանի դատավոր Հրաչիկ Սարգսյանը, ով հայտնի է նախկին իշխանությունների օրոք դիզած հարստությամբ, արդարացրել է «Դոն Պիպո» մականունով հայտնի Արթուր Ասատրյանին։ Բաբաջանյանն ասել էր, որ Հրաչիկ Սարգսյանը դատական համակարգի անունից պատասխանեց՝ ոչ միայն դատավորների ամենաթողությունը հանդուրժող իշխանությանը, այլև՝ մեզ բոլորիս և բոլոր նրանց, ովքեր հավատում էին, որ 2018թ թավշյա հեղափոխության արդյունքում երկրում իրականացվելու են արմատական բարեփոխումներ, որ այլևս արդարադատություն չեն իրականացնելու ծախու դատավորները։