Սահմանափակումների մեղմման երրորդ օրն` այսօր, գրանցվել է կորոնավիրուսային վարակի 163 նոր դեպք: Սա վարակի բռնկումից մինչև օրս ամենամեծ ցուցանիշն է: Առողջապահության նախարարության մամուլի քարտուղար Ալինա Նիկողոսյանը «Ազատությանը» հայտնեց` նախօրեին թեստավորվել է 1083 հոգի:
«Կորոնավիրուսային հիվանդությունից հենց մահվան դեպք չենք ունեցել, ունեցել ենք մեկ մահվան դեպք, երբ պացիենտի մոտ հաստատվել է վարակը, սակայն մահը վրա է հասել այլ հիվանդության պատճառով, և այդպիսի դեպքերի ընդհանուր թիվը յոթն է»,- ասաց նա:
Առողջապահության նախարարությունը վերջին օրերին առանձնացնում է կորոնավիրուսից մահացածների և կորոնավիրուս ունեցող, բայց այլ հիվանդության հետևանքով մահացածների վիճակագրությունը: Կորոնավիրուսային վարակի հետևանքով մահացել է 40 հոգի, ծայրահեղ ծանր վիճակում է 30 հոգի, ծանր է 80-ի վիճակը, 8 հիվանդներ արհեստական շնչառական սարքի օգնությամբ են շնչում:
Վիճակը գնալով բարդանում է, ասել է առողջապահության նախարար Արսեն Թորոսյանը` անդրադառնալով այսօր հրապարակված 163 նոր դեպքերին.- «Այս պահին բարձունքի վրա, այսինքն` բարձրանալու վրա ենք, դեռ դիմանում ենք, մնացածն էլ իրավիճակի զարգացմանը զուգընթաց»:
Նախարար Թորոսյանը հնարավոր է համարել արտակարգ դրության ժամկետի երկարաձգման սցենարը, հարցը կքննարկվի մինչև մայիսի 14-ը։ Արսեն Թորոսյանը շեշտել է՝ սահմանափակումների մեղմմանը զգուշավորությամբ է վերաբերվում, սակայն հնարավոր չէ անվերջ փակված ապրել.- «Մենք պետք է սովորենք ապրել, հիմա թե այդ սովորելու պրոցեսը մեզ մոտ ինչքան արագ և ինչքան անցավ կանցնի, կախված է մեր բոլորից, ոչ միայն ինձնից կամ կառավարությունից, որովհետև եթե ցավոտ սովորենք, իսկ ցավոտը մեծաթիվ դեպքերն են, շատ մահերն են, ծայրահեղ ծանր շատ դեպքերն են, դա դժբախտություն կլինի բոլորիս համար, բայց այլընտրանք չկա, մենք պետք է սովորենք ապրել: Սովորելն է օրինակ` դիմակ կրելը փակ վայրերում, իրարից հեռու կանգնելը»:
lragir.am
