Կորոնավիրուսի կանխարգելման միջոցառումները շարունակվում են. իրավիճակը վերահսկելի է:

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Նիկոլ Փաշինյանը:

Նախքան օրակարգային հարցերի քննարկումը վարչապետն Առողջապահության նախարար Արսեն Թորոսյանից հետաքրքրվել է կորոնավիրուսի դեմ տարվող պայքարի շրջանակում ձեռնարկվող միջոցառումների ընթացքից:

Արսեն Թորոսյանը տեղեկացրել է, որ բոլոր միջոցառումները շարունակում են իրականացվել: «Ունենք մեկ հաստատված դեպք, որը գտնվում է «Նորք» ինֆեկցիոն հիվանդանոցում, և 31 քաղաքացիներ, որոնք հատուկ մեկուսացված պայմաններում գտնվում են Ծաղկաձորում: Բոլորի ինքնազգացողությունը և առողջությունը լավ է: Որևէ մեկը գանգատ չունի, այդ թվում՝ հաստատված պացիենտը: Երեկ հետազոտել ենք նրա կնոջը, որի մոտ հերքվել է հիվանդության առկայությունը»,- ասել է նախարարը՝ հավելելով, որ ամեն օր կատարվում են նմուշառումներ և իրավիճակը վերահսկվում է: Արսեն Թորոսյանը նշել է նաև, որ Ծաղկաձորում կարանտինի մեջ գտնվող քաղաքացիներն ապահովված են անհրաժեշտ ամեն ինչով՝ սննդով, գրքերով, ինտերնետով և այլն: Նախարարի խոսքով՝ այս պահին մեկուսացված քաղաքացիներից ոչ մեկի մոտ ոչ մի ախտանշան չկա:

Արսեն Թորոսյանը տեղեկատվություն է ներկայացրել նաև աշխարհում կորոնավիրուսի տարածության, զարգացման միտումների մասին: «Չինաստանը, լինելով հիվանդության աղբյուրը, ամենաառաջինն էր սկսել միջոցառումները, նոր դեպքերի գրանցման և նոր մահերի տեմպը կտրուկ անկում է ապրել: Մեր տեղեկություններով արդեն նույնիսկ այն նահանգը, որում սահմանափակման միջոցառումներ են իրականացրել, աստիճանաբար վերադառնում է իր բնականոն կյանքին: Սակայն աշխարհի այլ երկրներում է իրավիճակը մի քիչ ավելի բարդանում. Հարավային Կորեայում, մեր հարևան Իրանում, ինչպես նաև Իտալիայում: Արդեն մի քանի հարյուր դեպքեր են արձանագրել Ֆրանսիայում, Գերմանիայում և Իսպանիայում: Ես իմ գործընկերների հետ ամենօրյա կապի մեջ եմ և ակնկալվում է, որ երկու-երեք շաբաթից հետո, եթե իմ նշած եվրոպական երկրները կարողանան ճիշտ միջոցառումներն իրականացնել, այդ ռիսկն անցնելուց հետո նորից նվազում կտեսնենք նաև այդ երկրներում: Հաշվի առնելով այս վիճակագրությունը՝ կարծում եմ, որ մենք էլ 2-3 շաբաթ հետո մեր բոլոր սահմանափակող միջոցառումներին կանդրադառնանք, այդ թվում՝ Չինաստանի հետ»,-նշել է նախարարը:

Արտաքին գործերի նախարար Զոհրաբ Մնացականյանն էլ նշել է, որ Իրանի հետ ձևավորվել է երկխոսություն տարբեր մակարդակներով և աշխատանքներ են տարվում՝ իրավիճակին միասին հակազդելու համար:

Կրթության, գիտության, մշակույթի և սպորտի նախարար Արայիկ Հարությունյանն էլ տեղեկացրել է, որ հավանաբար երկուշաբթի օրվանից` մարտի 9-ից, դասերն ուսումնական հաստատություններում կվերսկսվեն: «Ամենօրյա կապի մեջ ենք Առողջապահության նախարարության հետ: Այս պահին, ըստ էության, հատուկ ցուցումներ չունենք՝ դասերը չվերսկսելու համար: Եթե առաջիկա օրերին ևս ցուցում չունենանք, երկուշաբթիից դասերը կվերսկսենք»,- նշել է նախարարը:

Այնուհետև Նիկոլ Փաշինյանը Էկոնոմիկայի նախաար Տիգրան Խաչատրյանից հետաքրքվել է հայ-վրացական սահմանի մոտ կուտակված բեռնատար ավտոմեքենաների հարցից: Նախարարը տեղեկացրել է, որ մարտի 5-ին՝ մինչև օրվա ավարտը, այդ բեռնատարները կհատեն սահմանը:

Տարածքային կառավարման և ենթակառուցվածքների նախարար Սուրեն Պապիկյանը, անդրադառնալով բիտումի որոշակի քանակ ներկրելու անհրաժեշտությանը, առաջարկել է այդ հարցը փոխվարչապետներից մեկի մոտ քննարկման առարկա դարձնել: Անդրադառնալով հարցին՝ կառավարության ղեկավարը նշել է. «Շատ լավ: Կարծեմ՝ բիտումի որակի հետ կապված էլ խնդիր ունեինք: Պետք է առիթն օգտագործել, որ մեր շուկայում ճանապարհաշինարարական աշխատանքներում ավելի որակյալ բիտում օգտագործվի, մեր շուկաներն այդ առումով նույնպես դիվերսիֆիկացնենք, որպեսզի ճանապարհաշինության որակի վրա դրական ազդեցություն ունենա»:

Այնուհետև վարչապետը հետաքրքրվել է ճանապարհաշինական ծրագրերի ընթացքից: Սուրեն Պապիկյանը տեղեկացրել է, որ այս տարի պետական բյուջեով նախատեսված հիմնանորոգման ծրագրերից 244 կմ-ից 228-ն արդեն իսկ հայտարարված է: