Բաժին : Հասարակություն
Հրայր Թովմասյանի սանիկին նոր մեղադրանք է առաջադրվել
Հրայր Թովմասյանի սանիկին՝ Նորայր Փանոսյանին առաջադրված մեղադրանքը փոփոխվել է։ Այս մասին «Փաստինֆո»-ին հայտնեցին Հատուկ քննչական ծառայությունից։
«Նրան առաջադրված մեղադրանքը փոխվել է, նոր մեղադրանք է առաջադրվել»,-նշեցին ՀՔԾ-ից ՝ չհայտնելով այլ մանրամասներ։
Հիշեցնենք, որ Քննչական կոմիտեն սեպտեմբերի 28-ին հայտարարել էր, թե ՀՀ քննչական կոմիտեի ՀԿԳ քննության գլխավոր վարչության ընդհանուր բնույթի և ընտրական հանցագործությունների քննության վարչությունում քննվող քրեական գործի նախաքննության շրջանակներում, ՀՀ ոստիկանության ԿՀԴՊ ԳՎ ծառայողների հետ իրականացված մեծածավալ քննչական և դատավարական գործողությունների արդյունքում փաստական տվյալներ են ձեռք բերվել, որ ՀՀ արդարադատության նախարարության աշխատակազմի օրինականության վերահսկողության տեսչության պետի պաշտոնը զբաղեցրած Նորայր Փանոսյանի և ՀՀ ԱՆ ու Երևանի քաղաքապետարանի այլ պաշտոնատար անձանց կողմից իրենց պաշտոնեական լիազորությունները չարաշահելու դեպքերի վերաբերյալ: Եւ նրան մեղադրանք է առաջադրվել պաշտոնեական լիազորությունները չարաշահելու համար։
Ընդ որում՝ պաշտոնական հաղորդագրության մեջ նշվել էր, որ առերեւույթ չարաշահումները արձանագրվել են Հրայր Թովմասյանի՝ ՀՀ արդարադատության նախարար պաշտոնավարման ժամանակահատվածում։
