Բաժին : Աշխարհ/Տարածաշրջան
Ռուսաստանցիների մեծ մասը կողմ է Սիրիայում Ռուսաստանի ռազմական գործողություններն ավարտելուն
Ռուսաստանցիների մեծամասնությունը՝ 55 տոկոսը, կողմ է Սիրիայում Ռուսաստանի ռազմական գործողություններն ավարտելուն: Այդ են վկայում «Լևադա կենտրոնի» հարցման արդյունքները:
Սոցիոլոգիական կենտրոնի կողմից ապրիլին անցկացված հարցումների համաձայն՝ 30 տոկոսը կարծում է, որ ռուսաստանցի զինվորականները պետք է շարունակեն մնալ այդ երկրում:
Երկու տարի առաջ Սիրիայում Ռուսաստանի ռազմական գործողություններն ավարտելուն կողմ էր արտահայտվել ռուսաստանցիների 49 տոկոսը:
Այսօր Սիրիայի հարցում Կրեմլի քաղաքականությանն աջակցում է հարցվածների կեսից քիչ ավելին, 35 տոկոսը կտրականապես դեմ է կամ մասամբ չի աջակցում:
Ռուսաստանը Սիրիայիում ռազմական գործողություններ է իրականացնում 2015 թվականից: Ութերորդ տարին շարունակվող սիրիական հակամարտությունում Մոսկվան ռազմական աջակցություն է ցուցաբերում իր դաշնակից Բաշար ալ-Ասադի զորքին:
