Բաժին : Հասարակություն
Հայաստանի պետական սեկտորում մոտ 3 հազար թափուր աշխատատեղ կա
Հայաստանում մասնավոր հատվածում 5 և ավելի աշխատակիցներ ունեցող շուրջ 5700 ուսումնասիրված ընկերություններում կա 2525 թափուր աշխատատեղ։ Պետական սեկտորում թափուր աշխատատեղերի թիվը 2989 է: «Արմենպրես»-ի հաղորդմամբ՝ այս մասին պաշտոնավարման 100 օրն ամփոփող ասուլիսին ասաց Աշխատանքի և սոցիալական հարցերի նախարար Զարուհի Բաթոյանը:
Նա նշեց, որ նախարարությունը հիմնականում աշխատանք է տանում անմրցունակ քաղաքացիներին աշխատանքով ապահովելու ուղղությամբ:
Բաթոյանը նշեց նաև, որ քաղաքացիները կարիք ունեն սոցիալական աշխատողի ինստիտուտի զարգացման: «Մարդու կարիքը պետք է հասցեական լինի և այն պետք է նախ սոցաշխատողը ճանաչի: Քաղաքացիները կարիք ունեն սոցաշխատողի, որպեսզի իրենց խնդիրների մասին պետությունը, գերատեսչությունը տեղեկանա ինքնուրույն և ոչ թե մարդը գնա դիմի այս կամ այն կառույցին իր մասին իմաց տալու համար»,-ասաց աշխատանքի և սոցիալական հարցերի նախարարը: