Բաժին : Տնտեսություն/Բիզնես
Իրանի շուկա մուտքի բարելավումը լուրջ խթան է ԵԱՏՄ երկրների տնտեսական ակտիվության համար. Տիմուր Մաքսիմով
Իրանի և ԵԱՏՄ անդամ երկրների միջև ազատ առևտրի գոտու ձևավորումը կարող է լուրջ խթան լինել Հայաստանի տնտեսության համար: «Արմենպրես»-ի հաղորդմամբ, Մոսկվա-Երևան տեսակամուրջի ժամանակ այս մասին նշել է ՌԴ տնտեսական զարգացման փոխնախարար Տիմուր Մաքսիմովը: Նա կարևորեց Իրանի և ԵԱՏՄ անդամ երկրների միջև ազատ առևտրի գոտու ձևավորմանն ուղղված աշխատանքները և նշեց, որ լավագույն օրինակներից է, թե ինչպես ԵԱՏՄ միջազգային ակտիվությունը կարող է իր ներդրումն ունենալ անդամ երկրների զարգացման գործում:
Տիմուր Մաքսիմովը նկատեց, որ Հայաստանը շահեկան դիրքերում է՝ Իրանի հետ ունենալով ընդհանուր սահման, և տրանսպորտային միջանցք: Դա հնարավորություն կտա Իրանի հետ միության առևտրաշրջանառության ծավալն ավելացնել Հայաստանի տարածքով:
«Երբ ավարտվի միության անդամ երկրների ներսում համաձայնագրի վավերացման ընթացակարգերը, հույս ունեմ կտեսնենք կոնկրետ արդյունքներ: Նորից եմ կրկնում, կա հսկայական պահանջարկ, և ԵԱՏՄ-ն կարող է այն բավարարել»,-ասաց նա:
ՀՀ Ազգային ժողովը մարտի 27-ին ընդունեց Իրանի և ԵԱՏՄ անդամ երկրների միջև ազատ առևտրի գոտու ձևավորման մասին ժամանակավոր համաձայնագիրը վավերացնելու մասին օրենքի նախագիծը։
