Բաժին : Տնտեսություն/Բիզնես
«Սպայկա»-ի՝ պետբյուջե չվճարած գումարի չափը կարող է ավելանալ
Պետական եկամուտների կոմիտեի նախագահ Դավիթ Անանյանը չի բացառում, որ «Սպայկա» ընկերության պետական բյուջե չվճարած 7 մլրդ դրամն ավելանալու է, քանի որ ՊԵԿ-ն ունի 3,5 տարվանն առնչվող առերևույթ հանցագործություն պարունակող վարքագիծ: Այդ մասին Անանյանը նշեց կառավարության նիստից հետո լրագրողների հետ զրույցում:
«Մենք այդ վարքագծի ընդամենը 30 տոկոսին առնչվող ժամանակագրական առումով ունենք փաստաթղթեր: Ինչ ցույց կտան հաշվարկները չեմ կարող ասել»,-ասել է Անանյանը:
Նա նաև շեշտել է, որ այս պահին վարչապետն ու ՊԵԿ նախագահն այդքան էլ իրավասու չեն տեղեկատվություն ներկայացնելու: «Իրավական գործընթաց է գնում, և այստեղ ամենակարևոր մարդը քննիչն է, ու ինքն է փաստական հանգամանքների վերաբերյալ դատողություններ անում մասնագետների հետ խորհրդակցելով: Եվ եթե ինքն ունի այնպիսի համոզմունք, որ, օրինակ, ազատության մեջ գտնվելով, կվնասի քննությանը, ինքը միջնորդում է դատարանին, որն էլ այդպիսի որոշում է կայացրել: Իրավական գործընթաց է գնում ու դրա վերաբերյալ վարչապետն ու ՊԵԿ նախագահը որևէ գնահատական չեն կարող տալ»: