Բաժին : Հայաստան/Արցախ
Արցախցի աշակերտները ճանաչողական այցով եղել են Գերմանիայում
ԱՀ կրթության, գիտության և սպորտի նախարարության նախաձեռնությամբ և ՀՀ-ում Գերմանիայի Դաշնային Հանրապետության դեսպանության աջակցությամբ մեկշաբաթյա ճանաչողական այցով արցախցի 6 աշակերտներ եղել են Գերմանիայի Բեռլին, Նաումբուրգ և Լայպցիգ քաղաքներում:
«Արցախպրես»-ի թղթակցի հետ զրույցում խմբի անդամ, Ստեփանակերտի Ալեքսանդր Գրիբոյեդովի անվան N 3 դպրոցի 8-րդ դասարանի աշակերտ Արեգ Աբրահամյանն ասել է, որ իրեն գերել է հատկապես Գերմանիայի ճարտարապետությունը և մեծ ցանկություն ունի հետագայում այնտեղ սովորելու՝ իր փորձն ու գիտելիքները հայրենիքին ծառայեցնելու համար :
«Մենք ունեցանք դասալսումներ տարբեր գիմնազիաներում, ձեռք բերեցինք համապատասխան փորձ ու գիտելիքներ և կապեր հաստատեցինք մեր հասակակիցների հետ: Եղանք պատմամշակութային վայրերում և հիացանք գոթական ճարտարապետության հայտնի կոթողներով : Ինձ համար տպավորիչ էին հատկապես Բրանդենբուրգյան դարպասները և Ռայխստագի շենքը»,-նշել է Արեգ Աբրահամյանը:
Նույն դպրոցի 9-րդ դասարանի աշակերտուհի Հասմիկ Հովսեփյանը շնորհակալություն է հայտնել նախաձեռնողներին և աջակիցներին նմանատիպ այց կազմակերպելու համար և հույս հայտնել, որ ծրագիրը կկրի շարունակական բնույթ:
«Նույնպես տպավորված եմ Գերմանիայի յուրատիպ շքեղությամբ և ճարտարապետությամբ: Ցանկանում եմ բժիշկ դառնալ և ուսումս շարունակել Գերմանիայում, քանի
որ այդ երկիրն աշխարհում
հայտնի է պրոֆեսիոնալ բժիշկներով»,-մասնավորապես ասել է նա:
